2
(Matthew 3:17; Mark 1:11; Luke 3:22; 9:35; Jesus Guys 4:25-26; 13:33; Hebrews 1:5; 5:5; 2 Peter 1:17; Jesus Show 2:26-27)
1 How come da diffren nations
Make secret kine plan?!
An how come da diffren peopos
Tink plenny—but ony wase time?!
2 Get king guys all ova da world stan up
An tell wat dey goin do.
Da leada guys come togedda fo talk
Agains Da One In Charge
An agains da spesho guy
He pick fo come king!
3 Dey tell:
“Eh! God wen tie up us guys
Wit yoke straps,
But we go broke um!
He tie us wit ropes,
But we get rid a dem!”
4 Da One In Charge, dat sit on top his throne inside da sky,
He ony laugh!
Da Boss Up Dea, he make fun a dem!
5 But den, he talk to dem,
Cuz he huhu.
He goin get real mad,
An make dem real sked.
Dis wat he goin tell:
6 “No matta wat you guys tink,
I awready wen give
My king guy da powa
Fo stay in charge fo me!
He da king on top Zion Hill,
Jerusalem town,
On top da mountain
Dass spesho fo me!”
7 ✡ 2:7: JGuys 13:33; Heb 1:5; 5:5Dat king, he tell:
“I goin tell wat Da One In Charge
Wen tell gotta happen.
He tell me dis:
‘You, you my boy.
An today, I tell dat I yoa faddah.
8 You ony gotta aks,
An I goin give you
All da diffren peopos
Fo be yoa property.
Da whole world, dass goin be
Yoa land.
9 ✡ 2:9: JShow 2:26-27; 12:5; 19:15You goin smash um wit one iron bar,
An bus um up
Jalike dey ony clay pots.’ ”
10 Az why, you odda king guys, wise up!
You leada guys hea inside da world,
Lissen wat God tell you fo do,
An do um!
11 Work fo Da One In Charge,
Real serious kine!
Stay sore inside, stay sked an shaking!
12 Go down in front da king
An show respeck.
Cuz if you guys no like do dis,
Watch out!
Cuz if you make him come huhu
Even litto bit,
Right den an dea, you guys
Goin come wipe out,
Cuz he come huhu real quick!
But all da peopo dat let God
Take kea dem,
Dey stay good inside.