29
1 Da kine guy dat make deaf ear
Cuz peopo tell um ova an ova
He do wrong an he betta stop,
Fo real Da One In Charge goin bring down dat guy one time.
Cuz no way da guy can come good bumbye.
2 Wen da peopo dat stay do wass right, come da main one,
Erybody stay good inside.
Wen da bad peopo stay in charge,
Erybody like tell, “Bummahs! Bummahs!”
3 Whoeva fo real kine like know wat fo do erytime,
Dea faddah guy goin feel real good inside bout dem.
Whoeva hang out wit da wahines dat fool aroun fo money,
Dey ony throw way wat dey get fo notting.
4 Wen da king judge da right way,
Make da whole land come strong.
But if get somebody dea dat make peopo give um unda da table kine money,
He make da whole land come mo worse!
5 Wen you talk nice kine fo bulai anodda guy,
Watch out!
Jalike you put down one net
Fo trap yoa feets!
6 Wen da bad kine peopo go agains God,
Wat dey do, goin catch dem jalike one trap.
But da peopo dat stay do wass right,
Dey no need worry.
Dey can dance an sing cuz dey feel good inside.
7 Da guys dat do wass right erytime,
Dey know dat da peopo dat no mo powa
Get rights wen dey gotta go in front da judge.
Da guys dat stay do bad kine stuff,
Dey no even tink bout da rights da odda guys get.
8 Da kine peopo dat like talk bad fo make peopo feel bad,
Dey make erybody inside dea town come huhu.
But da kine peopo dat know wat fo do erytime,
Dey make da odda guys come so notting bodda dem.
9 Wen one guy dat know wat fo do erytime
Take one kine guy wit attitude dat tink he know mo den him
In front da judge,
Da guy wit attitude ony goin talk bad kine an laugh
An no can shut um up.
10 Da kine guys dat like kill peopo,
Dey hate da guys dat do wass right,
An go look fo dem fo kill um.
11 Da stupid kine buggahs dat tink dey no need learn notting,
Dey make shua dat erybody know wat dey tink.
But da peopo dat know wat fo do erytime,
Dey stay cool head,
An dey hold back fo no tell wat dey tink.
12 Wen one leada guy lissen da bulaia guys,
Erybody dat work fo him goin come jalike him,
Bulaia too.
13 Da peopo dat no mo notting,
An da peopo dat put presha on dem,
Dey all same same, you know.
Cuz Da One In Charge, him da One let dem live.
14 Wen one king judge da pooa peopo da way dey can trus,
Fo shua his ohana line goin get king guys, foeva.
15 Teach yoa kids da right way fo ack
An use da paddle if dey need um.
Den dey goin come da kine peopo
Dat know wat fo do erytime.
But if you no punish um fo teach um how fo ack,
Dey goin make shame fo dea muddah.
16 Wen da crooked kine peopo get powa,
Get mo plenny bad kine stuff happen.
But wen get peopo dat do wass right,
Dey goin see dose bad guys come wipe out.
17 Wen yoa kids do someting bad,
Punish um fo teach um da right ting fo do.
Den bumbye, you no need worry bout dem.
Den dey goin do all da good kine stuff you wen teach um fo do,
Dat goin make you stay real good inside.
18 Wen no mo nobody talk fo God,
Da peopo buckaloose.
But anybody dat stay do wat da Rules tell,
Dey can stay good inside.
19 If you ony talk to yoa worka guys an no do notting,
Dey no goin bodda fo lissen.
Maybe dey undastan da words you tell dem,
But still yet, dey no goin change notting.
20 Wen get one guy dat talk befo he tink,
Goin be mo hard fo teach dat guy fo tink befo he talk,
Den fo teach one stupid guy fo know wat fo do erytime,
21 If one young guy work fo you,
An you make um real easy fo him do wateva he like,
Bumbye he goin give you attitude.
22 Anybody dat stay real huhu all da time,
Dey like beef erybody.
Anybody dat stay mad all da time,
Dey erytime goin go agains you.
23 Anybody dat ack high makamaka,
Dey goin come notting cuz a dat.
Anybody dat no ack high makamaka,
Dey goin get plenny respeck.
24 If you help one steala guy fo steal stuff,
Fo shua, you hate yoa life!
You hear dat get kahuna on top you if you no tell wat you know,
But still yet, you no tell notting!
25 Anybody stay sked an shaking
Cuz a how dey tink odda peopo tink bout dem,
Az jalike one trap dat catch da guy dat stay sked.
But anybody stay trus Da One In Charge,
Da One In Charge goin make shua notting hurt dem.
26 Get plenny peopo
Dat like make da guy in charge a dem tink dey stay okay.
But Da One In Charge, he da ony one dat know
Who stay okay an who no stay okay
Fo real kine.
27 Da peopo dat stay do wass right,
Dey tink az pilau, wen peopo do wass wrong.
Da bad kine peopo,
Dey tink az pilau, wen peopo live da right way!