26
1 If you show respeck fo one dumb buggah
Dat tink he no need learn notting,
Make eryting stay hamajang.
Az jalike wen get snow summa time,
O get plenny rain wen time fo harves da food.
2 Wen you like put kahuna on top somebody,
Jus cuz you no like um,
No goin hurt him notting,
Jalike no hurt wen da sparrow bird fly all ova da place
O da swallow bird zigzag across da sky.
3 Fo make da horse go,
You need one whip. Fo make da donkey carry stuff,
You need one strap aroun da head an nose.
But fo make da dumb buggahs do someting,
Da ones dat tink dey no need learn notting,
Gotta wack dea back wit one stick fo make um move!
4 Wen one guy talk to you dat tink he no need learn notting,
No talk to him da same way he talk to you,
Jalike he one stupid head kine guy wit attitude.
Cuz den you goin be jalike him!
5 Wen one guy talk to you dat tink he no need learn notting,
Good you talk to him
Jalike he one stupid head kine guy wit attitude.
Den he no goin tink he da kine guy
Dat know wat fo do erytime!
6 Wen you tell one dumb buggah
Dat tink he no need learn notting
Fo tell somebody someting fo you,
Az jalike you cut off yoa feets
O let somebody bus you up.
7 Wen one dumb buggah
Dat tink he no need learn notting
Try fo tell importan kine stuff
Fo make odda peopo tink plenny,
He jalike one guy dat no can walk
Cuz his leg no can work.
8 Wen you tell odda peopo
Bout one dumb buggah
Dat tink he no need learn notting,
An you tell um dat da guy importan,
Az jalike you tie one rock inside one sling,
An den wen you ready fo throw um,
Da rock no can fly cuz stay stuck.
9 Wen one dumb buggah
Dat tink he no need learn notting
Try fo tell importan kine stuff
Fo make odda peopo tink plenny,
Fo shua he goin hurt somebody,
Jalike wen one piloot guy
Get one kiawe plant wit plenny thorn
Fo wack somebody.
10 Anybody dat hire one dumb buggah
Dat no like learn notting,
O jus hire anybody,
He jalike one guy wit one bow an arrow
Dat shoot plenny arrow fo hit anybody
An he hit um.
11 ✡ 26:11: 2Pet 2:22Wen one guy dat no like learn notting
Stay do da same stupid kine stuff
Ova an ova, an get attitude,
He stay ack jalike one dog dat bahf,
Den layta, he come back an eat wat he wen bahf.
12 Mo easy, fo teach one dumb buggah
Dat no like learn notting,
Den fo teach one guy
Dat tink he know wat fo do erytime,
But yet he donno.
13 Da guy dat too lazy fo go work, he tell,
“Get one wild lion outside dea!
Outside, on top da road!”
14 One lazy buggah turn dis way an dat way
On top da punee,
Jalike one door turn on da hinge.
15 Da lazy buggah, he put his hand inside one plate
Fo pick up someting fo grind,
But fo bring da hand back to his mout,
He too tired awready!
16 One lazy buggah tink he know mo betta
Wat fo do erytime,
Den seven guys
Dat can tell you how come dey do
Wat dey stay do.
17 If you hear odda peopo talk jalike dey stay beefing
An you jump in, no matta az not bout you,
Az stupid, dat!
Jalike you stay grabbing one wild dog by da ears.
18-19 Wen one guy bulai his fren,
An den he tell um, “Az ony one joke, you know!”
Az jalike he snap
An shoot burning arrows fo kill somebody.
20 Wen no mo enuff kiawe wood,
Da fire pio.
Wen nobody talk bad,
No get peopo fo talk back,
Jalike dey like beef.
21 From charcoal, can get hot ashes.
From kiawe, get fire.
From da kine guy dat like beef,
Get all kine argue.
22 Wen da kine peopo dat talk bad talk plenny,
Odda peopo take wat dey tell, jalike az good kine candy!
Wat dey hear, stay inside dem.
23 Wen somebody talk nice to you,
Jalike eryting stay okay,
But inside, dey like hurt you,
Az jalike wen peopo put da junks from melt silva
All ova one clay pot
Fo make um look fancy kine,
But still, az ony one clay pot.
24 Cuz wen get somebody dat hate peopo,
But den he talk real nice to you,
Inside, he stay try fo bulai you.
25 No tink az fo real
Wat dat kine guy tell,
No matta he make eryting he tell
Soun real good.
Cuz inside him, da guy get
All pilau kine stuff he tink.
26 Da guy like make um
Fo you tink someting good goin happen,
But he ony talk
Fo you foget he stay hate you.
But wen he come in front all da odda peopo,
Den he no can hide from dem wat he do,
Cuz dey know wat he do stay bad.
27 You dig one hole fo catch somebody,
You da one goin fall down inside!
You push one big rock fo smash somebody,
You da one goin get smash!
28 If somebody bulai you,
Dat mean he hate you an like hurt you.
If smooth, da words from da guy mout,
Den somebody goin come jam up plenny.