34
Da Edges A Da Canaan Land
1 Da One In Charge tell Moses, 2 “Tell da Israel peopo fo do dis: Wen you guys go inside da Canaan land, dass da land dat goin come you guys property. Da land goin get dese bordas:
3 “Da south borda goin get some a da Zin Boonies by da borda a da Edom land. From da east side, da south side goin start from da end part a da Big Salt Lake. 4 From dea, goin go south a da Scorpion Pass. Den goin go by Zin, an from dea, go south a Kadesh-Barnea. Den goin go by Hazor Addar, an by Azmon. 5 Da side goin turn from Azmon, fo go da Egypt Borda Stream, an from dea to wea da stream go inside da Mediterranean Sea.
6 “Da west side goin be da coast fo da Mediterranean Sea. Az all da west side.
7 “Da north side goin go from da Mediterranean Sea by Mount Hor, 8 an den by Lebo-Hamat, den by Zedad, 9 den by Zifron, an stop by da way to Hazar Enan. Az da north side.
10 “Fo da east side, go from Hazar Enan to Shefam. 11 Dat side goin come down from Shefam an go Riblah, da east side a Ain, an den go on top da hills da east side Kinneret Lake. 12 From dea, goin go down to da Jordan Riva all da way to wea da Riva go inside da Big Salt Lake.”
13 ✡ 34:13: Census 26:52-56✡ 34:13: Josh 14:1-5Moses tell da Israel peopo “Pull straw fo give ery ohana dea property. Da One In Charge tell dat ony da nine an one half ohanas goin get um. 14 Cuz da Reuben ohana, da Gad ohana, an one half da Manasseh ohana awready get dea properties. 15 Dat two an a half ohanas get dea land da east side a da Jordan Riva da odda side from Jericho town, da side wea da sun come up.”
16 Da One In Charge tell Moses, 17 “Dis da names fo da guys dat goin tell who get wat land fo dea property: Eleazar da pries guy an Joshua, Nun boy. 18 An you goin pick one leada guy from ery ohana fo help tell who goin get wat land. 19 Dese dea names:
Caleb, Jefunneh boy, from da Judah ohana.
20 Shemuel, Ammihud boy, from da Simeon ohana.
21 Elidad, Kislon boy, from da Benjamin ohana.
22 Bukki, Jogli boy, da leada from da Dan ohana.
23 Hanniel, Efod boy, da leada from da Manasseh ohana dat come from Joseph.
24 Kemuel, Shiftan boy, da leada from da Efraim ohana dat come from Joseph.
25 Elizafan, Parnak boy, da leada from da Zebulun ohana.
26 Paltiel, Azzan boy, da leada from da Issakar ohana.
27 Ahihud, Shelomi boy, da leada from da Asher ohana.
28 Pedahel, Ammihud boy, da leada from da Naftali ohana.”
29 Dese da guys Da One In Charge tell fo pick da parts a da Canaan land dat goin come da property fo da Israel peopo.