1 Den da leadas fo da blood lines inside da Levi ohana come by Eleazar da Main Pries Guy, Joshua Nun boy, an da leadas fo da odda Israel ohanas. 2  ✡ 21:2: Census 35:1-8Da Levi leada guys come by da Israel leada guys Shiloh side in da Canaan land. Dey tell um, “Da One In Charge tell Moses dat you guys suppose to give us Levi guys towns wea us can live, an grass fields fo oua animals.” 3 So jalike Da One In Charge wen tell um fo do, da Israel peopo give da Levi ohana towns an grass fields from dea property.

4 Wen dey pull straw, da firs towns come fo da Kohat blood line an dea families. Dey give da Levi peopo dat get Aaron da pries guy fo dea ancesta, thirteen towns from da Judah ohana, da Simeon ohana, an da Benjamin ohana. 5 Da odda peopo dat come from Kohat, wen dey pull straw dey get ten towns from da Efraim ohana, da Dan ohana, an da Manasseh ohana.

6 Da peopo dat get Gershon fo dea ancesta, wen dey pull straw, dey get thirteen towns from blood lines inside da Issakar ohana, da Asher ohana, an da Naftali ohana, an half da Manasseh ohana inside Bashan.

7 Da peopo dat get Merari fo dea ancesta, wen dey pull straw, da small ohanas inside da Merari ohana get twelve towns from da Reuben ohana, da Gad ohana, an da Zebulun ohana. 8 Dass how da Israel peopo pull straw, fo give da Levi ohana dese towns an da grass fields dat go wit da towns, jalike Da One In Charge wen tell Moses fo do.

9 From da Judah an Simeon ohanas da Israel leada guys give da Levi ohana da names a dese towns fo come dea property. 10 Dey pull straw, an da numba one towns go to da Levi peopo dat get Aaron fo dea ancesta, an Kohat fo dea ancesta. So dey get dese towns fo dea property: 11 Da Israel leadas give da Levi guys Kiriat-Arba town (az Hebron), an da grass fields aroun um, up country Judah land. (Arba, you know, az da ancesta fo da Anak peopo.) 12 But da odda fields an towns aroun Hebron, dey awready give dem to Caleb, Jefunneh boy, fo come his property.

13 So fo da peopo dat get Aaron da pries guy fo dea ancesta, da Israel leadas give da Levi guys Hebron (az one City A Refuge town fo peopo dat kill somebody), Libnah an da grass fields aroun dea, 14 Jattir, Eshtemoa, 15 Holon, Debir, 16 Ain, Juttah, an Bet-Shemesh, an dea grass fields. Dass nine towns da Levi guys get from dese two ohanas.

17 From da Benjamin ohana da Israel leadas give da Kohat blood line dese towns: Gibeon, Geba, 18 Anatot, an Almon, an dea grass fields, dass four towns. 19 Dass thirteen towns an dea grass fields fo da pries guys dat get Aaron fo dea ancesta.

20 Da odda Levi peopo dat get Kohat fo dea ancesta get towns inside da Efraim ohana lands. 21 Up country Efraim, dey get Shekem (one City A Refuge town fo peopo dat kill somebody), an Gezer, 22 Kibraim, an Bet-Horon, an dea grass fields, dass four towns.

23 An from da Dan ohana da Levi guys get dese towns: Eltekeh, Gibbeton, 24 Aijalon, an Gat-Rimmon, an dea grass fields, dass four towns.

25 From half da Manasseh ohana da Levi guys get dese towns: Taanak, an Gat-Rimmon, an dea grass fields, dass two towns. 26 Dey give all dese towns an dea grass fields to da odda peopo dat get Kohat fo dea ancesta.

27 Da peopo dat get Levi an Gershon fo dea ancestas, dey get Golan town inside Bashan (az one City A Refuge town fo peopo dat wen kill somebody), an Be-Eshtarah, an dea grass fields, dass two towns.

28 From da Issakar ohana da Levi guys get Kishion, Daberat, 29 Jarmut, an En-Gannim, an dea grass fields, dass four towns.

30 From da Asher ohana da Levi guys get dese towns: Mishal, Abdon, 31 Helkat, an Rehob, wit dea grass fields, dass four towns.

32 From da Naftali ohana da towns da Levi guys get: Kedesh inside Galilee (one City A Refuge town fo peopo dat wen kill somebody), Hammot-Dor, an Kartan, an dea grass fields, dass three towns. 33 All da towns fo da Gershom blood line, dass thirteen towns an dea grass fields.

34 Da Merari blood line, dey da odda peopo dat get Levi fo dea ancesta. From da Zebulun ohana dey get dese towns: Jokneam, Kartah, 35 Dimnah, an Nahalal, an dea grass fields, dass four towns.

36 From da Reuben ohana da towns dat da Levi peopo get: Bezer, Jahaz, 37 Kedemot, an Mefaat, an dea grass fields, dass four towns.

38 From da Gad ohana da Levi peopo get dese towns: Ramot town inside Gilead (az one City A Refuge town fo peopo dat wen kill somebody), Mahanaim, 39 Heshbon, an Jazer, an dea grass fields, dass four towns.

40 Da Merari peopo, dey da odda peopo dat get Levi fo dea ancesta, an dey get twelve towns.

41 Da Levi ohana get forty-eight towns an dea grass fields inside da Israel land. 42 Dese da Levi towns. All dea towns get grass fields aroun um.

43 Dass how Da One In Charge give da Israel peopo all da land. Befo time he wen make one strong promise to dea ancestas fo give um da land fo dea property, an dey take um ova, an live dea. 44 Da One In Charge let dem res all aroun, jalike he wen make one strong promise to dea ancestas fo do. All da peopo dat stay agains dem no can win ova dem, but Da One In Charge make da Israel peopo win ova all dose guys. 45 All da good kine stuff Da One In Charge wen make one promise fo do fo da Israel peopo, he do um all. No mo notting dat he neva do!