61
Da Year Da One In Charge
Make Good To Da Peopo
Make Good To Da Peopo
(Matthew 11:5; Luke 4:18-19; 7:22)
He stay in charge a me,
Cuz he wen put oil on top my head
Fo show he pick me.
He sen me fo tell good kine stuff
To da peopo dat odda peopo tink not importan,
An fo help da peopo dat feel all bum out
Fo dem feel good inside one mo time,
Fo tell da ones da army guys wen take to dea country,
Dey can go home now,
An fo tell all da prisona guys,
Da prison stay open now fo dem go.
2 ✡ 61:2: Matt 5:4Fo tell, “Dis, da year Da One In Charge goin make good to his peopo,
An dis da time oua God goin pay back da bad guys.”
He sen me fo give good kine words
To erybody dat stay sad inside.
3 Da One In Charge sen me fo help da peopo Mount Zion side
Dat stay sad inside.
He tell me fo give dem
One nice haku lei fo put on top dea head,
An take away da ashes.
An make dem stay feel good inside wit perfume
Fo dem no stay sad inside no moa.
He sen me fo give um one nice robe fo wear
Dat make erybody like tell, “Da One In Charge, da greates!”
So dea spirit no feel jalike dey lose fight no moa.
Dey goin show dat Da One In Charge make dem get um right wit him,
Jalike dey strong oak trees dat Da One In Charge wen plant
Fo show how awesome he stay.
4 Dey goin build da ol broke down buildings one mo time
An make um come jalike dey new.
Dey goin build da broke down towns an make um new,
No matta dey stay broke from dea ancesta guys time.
5 Peopo you donno goin come
Fo help take kea yoa sheeps,
An peopo from anodda place
Goin be da farma guys
Inside yoa fields an grape farms.
6 But you guys, peopo goin call you
“Prieses fo Da One In Charge.”
Dey goin call you guys
“Helpa guys fo oua God.”
You guys goin get plenny food
From da odda countries,
An talk big cuz a da awesome tings dey get
An you goin get um too.
7 Befo time, you guys had shame.
Bumbye, you goin get double da stuffs you get befo time.
Befo time, nobody respeck you guys.
Bumbye, yoa peopo goin yell cuz dey feel good inside.
So, yoa peopo goin own double da land,
An dey goin dance an sing all da time
Cuz dey feel good inside.
8 Cuz me, Da One In Charge,
Wen peopo judge da right way
Dat make me feel good inside!
Wen peopo steal stuff cuz dey bad,
I no like dat.
Dey can trus me fo do wat I tell I goin do.
I goin give dem wat dey wen work fo,
An make one deal wit dem dat stay foeva.
9 Da peopos in da diffren countries
Goin know who da ones dat come from my peopo.
Erybody dat see dem goin tell
Dat dey da ohana
Dat Da One In Charge do good tings fo dem.
10 ✡ 61:10: JShow 21:2I stay feel plenny good inside cuz a Da One In Charge.
I feel real good cuz a my God.
Cuz jalike he give me clotheses fo wear
Dat show he da One get me outa trouble,
An jalike he give me one nice robe
Fo show I get um right wit him.
I feel jalike one guy dat goin get married
An wear one fancy hat jalike da pries guys,
An I feel jalike da lady dat goin marry too,
An wear all kine jewelry!
11 Cuz jalike da groun make da plants come up,
An da garden make da seeds grow,
Dass how Da One In Charge a me
Goin make peopo get um right wit him
An tell good tings bout him
In front da peopos from all da diffren countries!