3
God Boy Mo Importan Den Moses
(Census 12:7)
1 My braddahs an sistahs, you guys real spesho fo God in da sky. He wen tell all you guys fo come be his guys, an dass wat you guys wen come awready. So try tink lidis bout Jesus! Us guys tell all da peopo dat he da Guy dat God wen sen fo tell peopo wat God tell, an he da Main Pries Guy fo us guys. 2 ✡ 3:2: Census 12:7God wen sen Jesus, an Jesus do eryting God wen trus him fo do, jalike Moses wen do eryting God wen trus him fo do wit all God peopo. 3 Jesus stay mo awesome den Moses. Az jalike da guy dat build one house suppose to get mo respeck den da house he build. 4 Ery house, you know, get somebody dat build um. But God da One wen make eryting.
5 Moses was one worka guy fo God. He do eryting dat God trus him fo do fo all God peopo. He do all dis fo show da peopo wat God was goin talk bout bumbye. 6 But Christ, he God Boy, an cuz a dat, he stay in charge a God peopo. An you know, us guys God peopo. If we hang in dea, an no shame fo come tight wit God, we erytime goin talk bout da good kine stuffs we stay wait fo God do bumbye.
God Make His Peopo Res
(Songs 95:7-11; Outa Egypt 17:7; Census 20:2-5; 14:21-23)
7 ✡ 3:7: Songs 95:7-11So, jalike da Good An Spesho Spirit tell inside da Bible,
“Today, wen God tell you guys someting,
8 No come hard head,
Jalike yoa ancesta guys wen do
Dat time dey go agains Moses,
Ova dea inside da boonies.
Dey even try fo tes God
Fo see if he goin punish um.”
9 God tell,
“Yoa ancesta guys wen tes me.
Fo find out if I goin punish um.
Den fo forty year dey see wat I do.
10 Cuz a all dat, I wen had it
Wit da peopo dat wen go agains Moses.
I tell, ‘Dem guys get bad kine attitude.
Dey erytime go agains me.
Dey neva like lissen me.’
11 Wat dem guys do, I tell ‘Laytas’ to dat.
Az why I wen make one strong promise:
‘No way dem guys eva going inside
Da land I wen give um fo res!’ ”
12 Eh, my braddahs an sistahs, watch out! Make shua dat nobody get one pilau kine attitude, da kine wea dey no trus God, an da kine attitude wea dey tell God, da One dat stay alive fo real kine, “Laytas wit you!” 13 Mo betta do dis: all you guys give each odda good kine words an do dat ery day. Cuz now, da “Today” God stay talk bout befo time inside da Bible, dass fo us guys today too. An cuz a dat, no mo nobody from you guys goin get hard head cuz now you no do bad kine stuff. Cuz da bad kine stuff jam up how you tink. 14 You know, God make all us guys stay tight wit Christ. But we gotta hang in dea an go all out fo trus God, jalike wen we wen trus him da firs time.
15 ✡ 3:15: Songs 95:7-8Jalike da Bible tell,
“Today, wen God tell you guys someting,
No go come hard head,
Jalike yoa ancesta guys wen do,
Dat time dey go agains Moses.”
16 ✡ 3:16: Census 14:1-35Who da peopo dat wen hear all dis an go agains Moses, afta dey hear wat Moses tell? Dass all da peopo dat Moses wen bring outa Egypt. 17 An wen God tell, “Forty year awready, I had it wit dem guys!” who he stay talking bout? Az da peopo dat wen do bad kine stuff, an bumbye dey all mahke in da boonies, an dea bodies stay dea. 18 Who da peopo God stay talking bout wen he make dis strong promise: “No way dem guys eva goin go inside da land I give um fo res”? Az da peopo dat no like lissen him. 19 Now us guys know fo shua how come dem guys no can “go inside da land God give um fo res.” Cuz dey neva trus God, dass why.