19
Sad Song Fo Da Israel Prince Guys
1 “Eh Ezekiel! Go sing one sad song fo da Israel prince guys. 2 Tell dis:
“ ‘Wat kine muddah you Judah guys get?!
Yoa muddah, jalike one lion wahine,
Dat live wit da odda lions.
She take kea her bebes till dey grow up.
3 Da muddah, she pick one a her bebes fo teach um stuff.
He grow up an come one strong lion,
An he learn how fo rip up da animals he kill,
An he eat up peopo too.
4 Da odda peopos hear bout um,
An dey trap him down inside one deep hole dey wen dig.
Dey tie um up an take um
To da Egypt land.
5 “ ‘Wen da muddah see wat she stay wait fo
No goin happen,
She take anodda bebe,
An teach him fo come one strong lion.
6 He come da leada ova all da odda lions
Cuz he strong.
He learn how fo rip up da animals he kill,
An he eat up peopo too.
7 He bus up da towns dat get strong wall in da nations aroun dea,
An wipe out da odda towns aroun dem.
All da peopo inside da land
Come real sked wen he make noise.
8 Den da odda peopos attack him,
Da ones from da countries aroun dea.
Dey lay dea net fo catch um,
An dey trap him down inside one deep hole dey wen dig.
9 Dey tie um up
An pull um inside one cage
Fo bring um by da Babylon king.
Dey put um inside one prison ova dea,
So no can hear his voice one mo time on top da Israel mountains.
10 “ ‘Yoa muddah jalike one grape plant inside yoa grape farm.
She grow by da watta.
She get plenny fruits an plenny branches
Cuz get plenny watta ova dea.
11 Da branches come real strong—
Strong enuff fo make da kine stick
Dat da king guys carry fo show dat dey king.
Stay tall wit plenny leafs.
Can see um cuz mo tall den all da odda grape plants
An cuz get choke plenny branch.
12 But da plant get pull out cuz somebody plenny huhu,
Dey throw um down on top da groun.
Da hot wind from da boonies make um come dry
An make da fruits fall down.
Da strong branches come dry
An da fire burn um up.
13 Now, dat grape plant stay grow inside da boonies,
On top dry groun wea no mo watta.
14 Da fire go from one a da main branches
An burn up all da fruits.
No mo strong branch on da plant
Dat can use fo make da kine stick dat one king carry fo show he da king.’ ”
Dis one sad song, an da peopo suppose to sing um wen dey stay sad.