1  ✡ 13:1: Rules2 17:6; 19:15Dis da numba three time I stay go ova dea fo see you guys. Da Bible tell, “Fo show proof someting, gotta get two o three odda guys dat show proof da same ting. Dass how gotta make um in front da judge.” 2 Wen I wen stay wit you guys da secon time, I awready wen tell you guys, an now I stay tell you one mo time: Wen I come ova dea I no goin let go da guys dat wen do da bad kine stuff befo time. Dass how goin be fo odda guys dat stay do bad kine stuff too, you know. 3 Plus, you guys like me show proof dat Christ da One stay talk wen I stay talk. Christ no stay weak wen he do tings fo you guys. He get plenny powa. 4 Christ neva have powa wen dey wen kill him on top da cross. But Christ get da powa fo live now. Dass jalike us guys. Us no mo powa wen we stay tight wit Christ. But us an you goin live wit Christ fo real kine cuz a da powa God give you guys.

5 Look inside you fo make shua you guys trus Christ fo real kine. Check out real good how you stay. You guys donno dat Jesus Christ stay tight wit you guys, o wat? If he no stay tight wit you guys, den you not his guys. But dass not how stay fo you guys! Dass da tes, you know! 6 I trus you guys goin see dat Christ stay tight wit us. 7 Now us guys stay aks

God fo you guys no do notting wrong. Us guys no worry bout wat odda peopo tink, if dey tink us stay do da right ting o not. But us like you guys stay do wat stay right, no matta us guys look jalike we no pass da tes. 8 Us no can do notting fo go agains wat stay true. Us ony can do wat stay true. 9 Us guys happy wen us look weak, fo show dat you guys stay strong. Us stay aks God fo help you guys come mo an mo betta. 10 Dass why I write dis stuff wen I no stay ova dea wit you guys, so dat wen I come ova dea, I no goin need presha you guys out an give you guys hard time. God wen tell me fo make you guys strong inside, dass not fo wipe you guys out.

11 Aloha, my braddahs an sistahs. Do eryting right. Lissen wat I tell. Tink da same way wit each odda. Be good to each odda. God get plenny love an aloha fo you guys. He goin stay wit you guys all da time an help you guys stay good wit each odda.

12 Go hug an kiss each odda cuz you da peopo dat stay spesho fo God. 13 All da peopo dat stay spesho fo God ova hea tell you guys “Aloha.” 14 I like Da One In Charge, Jesus Christ, do plenny good tings fo you guys. I like God show you guys his love an aloha. An I like da Good An Spesho Spirit come tight wit all you guys.