4
Da Tings Da Pries Guys Use
Inside Da Temple
Inside Da Temple
(1 Kings 7:23-26, 38-51)
1 ✡ 4:1: Outa 27:1-2Solomon make one bronze altar fo sacrifice, thirty feet long, thirty feet wide, an fifteen feet high. 2 He make da big tank fo watta from metal dat dey melt, roun, fifteen feet from one side to da odda side, seven an one half feet high, an bout forty-five feet aroun. 3 Unda da edge dey make pichas a cows aroun um, six cows fo ery foot. Dey make um in two rows wen dey pour da metal fo da tank.
4 Da watta tank stan on top da statues a twelve cows. Three cows look north, three look west, three look south, an three look east. Da tank stay on top um, an da cow okole stay undaneat da middo a da tank. 5 Da tank metal stay three inch thick, jalike one hand stay wide. Da rim jalike one cup rim, jalike one lily flowa. Da tank hold bout 16,500 gallon watta.
6 ✡ 4:6: Outa 30:17-21Den he make ten small tanks fo wash, an put five on da south side an five on da north side. Inside um dey wash da tings dey goin use fo da burn up kine sacrifices. But da pries guys take watta from da big tank fo wash dem.
7 ✡ 4:7: Outa 25:31-40✡ 4:7: Outa 25:23-30He make ten gold lamp stans fo da olive oil lamps, jalike da plan tell, an put um inside da temple, five on da south side, an five on da north side.
8 He make ten tables, an put um inside da temple, five on da south side an five on da north side. An he make one hundred gold bowls fo sprinkle blood.
9 He make da open lanai wea da pries guys work, an da big open lanai aroun da whole temple, an da doors fo da open lanai. He put bronze metal all ova da doors. 10 He put da big watta tank nea da south side, da southeast corna.
11 Huram make da pots, da shovels, an da bowls fo sprinkle blood too.
Dass how da work pau dat Huram do fo King Solomon inside da Temple Fo Da One In Charge:
12 da two pos,
da pieces on top da two pos dat look jalike bowls,
da tings dat look jalike two nets fo go all ova da pieces on top da poses dat look jalike bowls,
13 da tings dat look jalike four hundred pomagrams fo da two nets
(az two rows pomagrams fo da two nets on top da pieces dat look jalike bowls on top da poses),
14 da watta carts wit dea tanks,
15 da one big watta tank an da twelve cows unda um,
16 He make da pots, da shovels, da forks fo da meat,
an all da stuff fo um.
All da tings dat Huram-Abi make fo King Solomon fo da Temple Fo Da One In Charge was da kine bronze dey polish. 17 Da king tell um, “Melt da bronze. Shape um inside da clay molds. Dig da molds inside da thick groun, ova dea inside da plain by da Jordan Riva. Get Sukkot on one side an Zaretan on da odda side.” 18 All dese tings dat Solomon make was real plenny. Dey no even try fo find out how much da bronze weigh.
19 An Solomon make all kine tings da pries guys use inside da Temple Fo God:
da gold altar,
da tables fo da bread dey put in front God,
20 da gold lamp stans fo da olive oil lamps
fo burn in front da Real Real Spesho Place,
jalike God tell um fo make,
21 da gold flowa buds, da gold olive oil lamps, da gold tongs dey make, eryting wit da bestes gold,
22 da gold tings fo cut da wicks, da bowls fo sprinkle blood, da dishes, da fire pans,
da doors fo da temple—dass da inside doors fo da Real Real Spesho Place, an da doors fo da main room—all gold.