1 Afta da Filisha army guys take ova God Box, dey take um from Ebenezer wea dey wen start fo fight to dea big town Ashdod. 2 Dey take da Box inside da temple fo dea god Dagon, an dey put um nea da Dagon statue. 3 Wen da Ashdod peopo get up early da nex morning, you know wat? Dey find Dagon wen fall down on his face on top da floor, in front da Box Fo No Foget Da Deal Wit Da One In Charge! So dey take Dagon an put um back on top his place. 4 But den, da nex morning wen dey get up, dey see Dagon stay fall down one mo time on his face, on top da floor in front Da Box Fo No Foget Da Deal Wit Da One In Charge! Dis time, Dagon head an his hands stay chop off, an stay ova dea on top da board unda da door. Ony da body stay by da place wea dey put da statue. 5 (Az why even now, da pries guys fo Dagon, an da odda peopo dat go inside Dagon temple, Ashdod side, dey no step on top da board undaneat dat door.)

6 Den Da One In Charge start fo give da Ashdod peopo an da odda peopo aroun dem plenny trouble. He wack um hard wit one real bad kine sick on top dem—erybody get someting jalike lumps unda da skin. 7 Wen da Ashdod guys see wat stay happen, dey tell, “Dat box fo da Israel god, mo betta if no stay wit us. Cuz he give us guys an oua god Dagon plenny trouble!” 8 So dey call togedda da leadas fo all da Filisha peopo, an aks dem, “Wat we goin do wit da box fo da Israel god?”

Da leada guys tell, “Pass da box fo da Israel god, Gat side!” So dey move da Box Fo Da Israel God.

9 But afta dey move um Gat side, Da One In Charge wack da Gat peopo real hard too. He make all da peopo ova dea come plenny sked. All da peopo inside Gat get lumps unda da skin, da ol peopo an da young peopo. 10 So den da Gat peopo sen God Box Ekron side.

But wen da Box stay come nea Ekron, da peopo ova dea start fo yell, “Dey stay bring da box fo da Israel god aroun by oua side, fo dem kill us guys hea, an all oua peopo!” 11 So dey call togedda da leada guys fo all da Filisha peopo an tell, “Sen da box fo da Israel god back wea suppose to stay, o da ting goin kill us guys hea, an all oua peopo.” Cuz some a da peopo mahke awready, all da odda peopo come real sked. God give da Ekron peopo plenny trouble too. 12 An da peopo dat no mahke, dey get lumps unda da skin, an all da peopo stay yell fo help real loud, jalike fo da sky hear um.