1 Hiram da king fo Tyre sen messenja guys by David. Da messenja guys bring guys dat know how fo build one wall wit stones, an carpinta guys. Dey come fo build one palace fo David. Hiram sen logs from da cedar tree too. 2 Dass how David know fo shua dat Da One In Charge wen make him come solid fo be king fo da Israel peopo, an wen make his country get plenny respeck. An he know Da One In Charge do all dat cuz he get love an aloha fo his peopo, da Israel peopo.

3 Inside Jerusalem, David take mo wifes, an come da faddah fo mo boys an girls. 4 Dese da names fo da kids dat wen born fo him ova dea: Shammua, Shobab, Nathan, Solomon, 5 Ibhar, Elishua, Elpelet, 6 Nogah, Nefeg, Jafia, 7 Elishamma, Beeliada, an Elifelet.

8 Wen da Filisha guys hear dat all da Israel peopo put oil on top David head an make him come king, dey try fo capcha him. But David hear bout um, an he go out fo fight dem. 9 Da Filisha guys come inside da Refaim Valley an rip off da peopo dea. 10 So David aks God, “Good me an my guys go afta da Filisha guys, o wat? You goin give um to me, o wat?”

Da One In Charge tell him, “Go. I goin give dem to you.”

11 So David an his guys go up by Baal-Perazim, an ova dea he win ova da Filisha guys. He tell, “God use me fo bus up da guys dat stay agains me, jalike wen da big watta broke out!” So dey call dat place Baal-Perazim, cuz dat mean “Da Boss broke out.” 12 Da Filisha guys wen leave dea idol kine gods ova dea an dig out. So den David tell his guys fo burn up da idols.

13 Laytas, da Filisha guys take ova da valley one mo time. 14 Az why David aks God one mo time wat fo do. An dis time God tell um, “No go up strait afta dem fo attack. Go aroun behind dem, fo wack dem from in front da balsam trees. 15 Wen you hear wat soun jalike get army guys stay march in da tops a da balsam trees, go out fo fight. Dat mean dat me, God, go out awready in front you guys fo wack da Filisha army guys.” 16 So David make jalike Da One In Charge wen tell um fo do, an dey wack da Filisha army guys all da way from Gibeon to Gezer.

17 Dass how erybody all ova all da odda countries hear bout David, an Da One In Charge make all da peopos sked David.