1 Marrkapmirri Dätitj, ŋarra Bolyu wukirri yukurra nhuŋu, ŋunhi ŋarranydja dhuwala Godku djämamirri, ga bo'puyŋunydja ŋarra Djesu-Christku. Ŋayi ŋarranha djarr'yurrunanydja, bala djuy'yurrunana ḻakaranharawu dhiyakuyi dhäwu'wuna, märr yurru ŋunhinydja walala ŋunhi ŋayi Godthu djarr'yurruna walalanha, walala yurru märr-yuwalkthirri Djesuwala, ga yuwalkkuma yana marŋgithirrinydja Godku, bala walala yurru nhinanydja yukurra Godkala yana yuwalkŋura romŋuranydja. 2 Ŋarranydja yukurra ŋuli djäma Godku, märr yurru yolŋunydja walala nhina yukurra ŋayaŋu-gatjpu'yun yana ŋurikina ḏaykun'ku ŋunhi walala yurru nhina yukurra ŋunhala Godkalana wäŋaŋura gupaḏal'nha. Yo, Godtja dhuwala yaka bothinyaramirri yolŋu, yakana ŋayi ŋuli ḻakarama bothirrinydja. Ŋäthilinydja ŋunhinydja ŋurruŋuranydja Godthu dhawu'-nherrara, ŋayi waŋananydja bitjarra, “Ŋarrakunydja yurru yolŋu walala nhina yukurra walŋana yana, bitjan liŋgu yurru.” 3 Bala ŋunhinydja walu ŋunhi ŋayi ŋäthili nherrara bunanana, ga ŋulinyaramirriyunydjayi ŋayi maḻŋ'maranhaminana ŋunhi yuwalknha wal'ŋu walŋa, djiwarr'wuynha ŋunhina wal'ŋu; ŋayi warraŋulkuŋalana yolŋu'-yulŋuwala ŋuliwitjan nhanukalay dhärukkurrunydja, ŋunhi ŋayi wekaŋalanydja ŋunhi dhäruktja ŋarrakalana dharraylilinydja. Bala ŋarranydja ḻakaramana ŋuli marrtji birrka'mirrililina wäŋalilinydja, liŋgu dhuwalayinydja djäma Godthu wekaŋala ŋarrakala, ŋunhi ŋayinydja Garray walŋakunharamirri ŋilimurruŋgu.

4 Ŋarra yukurra wukirrinydja dhuwala nhuŋu Dätitj, liŋgu nhenydja bitjan marrkapmirrina ŋarraku gäthu'mirriŋu, liŋgu nhenydja ŋunhi märr-nherraṉmina Djesu-Christkala balakurru ŋarrakala djämakurru. ŋarra yukurra bukumirriyama nhuŋu yulŋunydja, märr yurru Godthu Bäpayu ga ŋilimurruŋgala Walŋakunharamirriyu Garrayyu Djesu-Christthu gäma yukurra nhuna galkikuma yana nhanukalay ŋayi märr-ŋamathinyarayu, märr yurru nhe nhina yukurra ŋayaŋu-yal'yunara yana.

5 Yo, gonha'yurrunanydja ŋarra ŋunhi nhuna ŋunhiwala runu'lili Guritalilinydja, märr nhenydja yurru dhawar'maramana marrtji bitjanna djämana malanha, ŋunhi ŋarra ŋurru-yirr'yurruna ŋunhiliyi. Nhe yurru marrtji yukurra birrka'mirrilili wäŋalili ga wäŋalili, djarr'yun marrtji yolŋu'-yulŋunha ŋunhi walala yurru djäkamirri walala Godkalaŋumirriwu yolŋu'-yulŋuwu birrka'mirriŋura wäŋaŋura. Yo, nhena yurru nherraṉdja ŋunhiyi eldersnha dhiyakuyi djämawunydja, yurru guyaŋiya ŋunhinydja ŋunhi ŋarra nhokala ḻakaraŋala ŋäthili. 6 Elderstja yurru ŋunhi balanyara gam' yolŋu. Nhina ŋayi yurru ŋamathama ŋula nhämiriw, dhuwurr-yätjmiriw yana, ga ŋunhi ŋayi yurru märrama miyalknhanydja, ga ŋunhina liŋgu waŋganynha yulŋunydja ŋayi yurru ḏälkumanydja, ga djamarrkuḻiny'tja nhanŋu yurru märr-yuwalkthinyamirri walala yana, yaka balanyara gam', ŋayi yurru waṉḏirri winya'yun wakinŋukunharamirri ŋanyapinyay ŋayi. 7 Yo, ŋurruŋunydja dhuwala Garraywu miṯtji yurru nhina ŋamathama yana wal'ŋu, ŋula nhämiriw yana, liŋgu ŋayi djäkamirri ŋurikinydja ŋunhi walala nhanŋuwaynha yana Godkuna yolŋu'-yulŋu. Yaka ŋayi yurru yukurra guyaŋinyaramirri ŋanyapinyay ŋayi bathala ḻakaranharamirri, ga yaka ŋayi waḏutja yurru maḏakarritjthirri, ga yaka ŋayi yolŋu ŋänitji-ḻukanharamirri ga bunharamirri ŋayi yolŋu, ŋayi yurru marrtji buma. Ga wiripunydja, yaka ŋayi wanaŋa-ḏumurru ŋula nhäku märranharawu yukurranharawu. 8 Ga ŋurruŋunydja yurru yolŋu yana wal'ŋu ŋunhiyina, balanyara bitjan ŋayi yurru djäka ŋuriki mulkuruwu yolŋu'-yulŋuwu nhanukalayi wäŋaŋura, ga bitjandhiyi ŋayi yurru ŋayaŋu-wuyunaramirri, ga guŋga'yunaramirri bukmakku. Ŋayi yurru guyaŋirri märr-yunupa yana, ga djäma rom-dhunupayama. Yakana ŋayi yurru malthun djälwu nhanukalayŋuwunydja ŋayi, yana ŋayi yurru nhina ganaŋ'thunna wal'ŋu yätjŋuru, liŋgu ŋayinydja ŋunhi nhanŋuwaynha yana Godkuna yolŋu. 9 ŋayi yurru yukurra ŋayathama baṯ bitjan ŋunhi yuwalk dhäruk yana, ŋunhi ŋayi ŋanapurruŋguŋu märraŋala, märr ŋayi yurru ŋula yolnha marŋgikuma yukurra dhärukthu walŋakunharamirriyu ŋuriŋi. Ga ŋunhi yurru ŋayi ŋula yolthu ḻakarama yukurra wiripunydja dhäwu', ga ŋayinydja yurru ŋuriŋiyinydja djäkamirriyunydja yolŋuyu yana dhunupakumana ḻakaramana nhanŋu, märr yurru ŋayi bilyunna, bala yana ŋapana-wekama nhanukalaŋuŋuru ŋayi djarrpi'ŋurunydja dhärukŋuru.

10 Yo, djarr'yundja nhe yurru yolŋunhanydja balanyaranhayi, ŋunhi ŋayi yurru yuwalk wal'ŋu nhina yukurra Godkala yana romŋura, liŋgu guḻku' mirithirri yurru yolŋuyu walalay yakanydja yukurra ŋäma Godku yuwalkŋu dhäwu'. Walala yurru ḻakarama mayali'miriwnha, yakana yuwalk dhäwu', ga guḻku'nhana walala yurru mayali'-wilkthundja yukurra. Guḻku'yuna ŋuli Djuwsthu dhäwu' ḻakarama djarrpiny'tja bitjandhiyi. 11 Ga ŋunhiyinydja walala ŋunhi walala ŋurru'-ŋurruŋu Godkalaŋumirriwu yolŋu'-yulŋuwu, walala yurru dhäruk mukmarama ŋunhinhayi walalanha ŋunhi walala yurru yukurra ḻakarama bothinyaramirri dhäwu', liŋgu ŋuriŋinydjayi walalay ŋuli yukurra yolŋu'-yulŋunhana galkinyamarama, gatjpaḻ'marama ŋuliŋuru yuwalkŋuŋuruna, bala gurruṯu'mirrinydja yukurra malthunna walalaŋgalaŋuwuna bothinyarayŋuwuna romgu. Yo, walala yukurra marŋgikuma djarrpi'kumana yana märranharawu rrupiyawu ŋula nhäkuna walalaŋgalaŋuwuna walala.

12 Waŋganydhunydja walala miṯtjiyu Guritapuyŋuyunydja yolŋuyu waŋana ḻakaraŋala bitjarrana walalanha, “Ŋanapurru Guritapuynydja yolŋu'-yulŋu bothinyaramirrina walala. Ŋanapurru ŋuli bitjan liŋgu djäma yätj dhika wal'ŋu yana, bunharamirri ŋuli yukurra bitjanna bitjan ŋuli ŋunhi maḏakarritj wäyin malanha. Ga ḏuŋḏuŋmirrina ŋanapurru; yana ŋanapurru yukurra nhinana ga ḻukana maranhuyirrina.” 13 Yuwalk yana ŋayi yukurra ŋunhiyi yolŋu ḻakaranhamirri bitjanmirrinydja. Dhiyakuyina märrwu nhuma yurru yukurra waŋa wirrkinydja walalanha dhika raypirri'yun, märr yurru walala marŋgithirri wal'ŋu yuwalkŋuwu, bala märr-yuwalkthirrina ŋurikiyi walŋa-wekanharamirriwunydja dhäwu'wu, 14 ga yakana biyapulnydja ŋayathama baṯ bitjan yurru ŋunhi ŋäthiliŋunydja dhäwu' malanha, ŋunhi ŋuli yukurra Djuwsthu ḻakarama. Yakana ŋunhiyinydjayi ŋamakurru' ŋunhi walala ŋuli wirrki märrama romnha ŋunhiyi yolŋuwuŋu nherraṉara, ŋurikiŋi ḏarramuwurruŋguŋu ŋunhi walala ŋuyulkthina, bala djalkthurrunana Godku yuwalkŋunydja ŋunhi dhäruk. 15 Walalanydja ŋuli ŋunhi romnha nherraṉ balanyara warray gam', “Yaka ḻukiya dhuwalanydja ga dhuwalanydja ŋatha,” bitjan. Yaka mäkiri'-witjurra walalaŋgu dhärukku, liŋgu bukmak ŋunhi nhänydja malanha ŋamakurru' yana ḻukanharawunydja nhuŋu, ŋunhi nhuŋu ŋayaŋu ḏarrtjalktja. Ga ŋunhi ŋuli yolŋuwu ŋayaŋu yätjtja wal'ŋu, yakanydja ḏarrtjalk, ga yakanydja ŋayi märr-yuwalkthirri yukurra Djesu-Christku, bala yakayi yurru yana ŋathayunydja ŋayaŋu ŋanya ḏarrtjalkkuma, liŋgu ŋayaŋu nhanŋu ŋunhi yätjthinana wal'ŋu wirrkina, ga ŋunhi ŋayi ŋuli djäma yätjkumanydja, bala ŋayaŋunydja nhanŋu yurru goŋmirriyirrina dhikana wal'ŋu, yanapi djäma ŋayi yukirri ŋunhiyinydja ŋamakurru'na. Ga yakana ŋayi goranydja yukurra nhanukalay yätjthunydja. 16 Ŋayi ŋuli waŋa bitjan, “Ŋarra marŋgi Godkunydja,” yurru ŋuriŋi yätjthunydja nhanukalay milkuma yukurra ḻakarama ŋunhi ŋayinydja yakana yuwalk yolŋu nhanŋu Godku. Godtja ŋuli ŋuyulkthirri nyinyaŋdhun ŋuriki yätjkunydja ŋunhi ŋayi yukurra djäma, liŋgu yakana ŋayi dhäruk märrama ŋuli yukurra Godnhanydja, ga yaka ŋayi ḏukṯuk djämawu ŋamakurru'wunydja.