19
Godku rom malanha dhapirrkmirrinydja djämawuyŋurana ŋunhana
19:1–14 (God’s glory in creation)
1 Nhäna ŋunha gäraktja? . . . ḻatju'na dhikana ŋiniya?
Gärakthunydja ŋuriŋiyi yukurra ḻakarama Godnhana,
nhäyinyara ŋunhi ŋayinydja Godtja ḻatju' wal'ŋu ŋanya dhika.
Ŋayinydja ŋunhi goŋ‐djana'mirrina God ŋiniya?
liŋgu gäraktja ŋunha nhanukuŋuway yana djämawuy.
2 Bitjan liŋgu walu‐ŋupan ŋayi gärakthunydja yukurra ḻakaramana Godnha,
ga munha‐ŋupandja yolŋuyu walalay ŋuli gäraklilinydja bakuruma,
bala marŋgiyirrina yukurra Godku, ŋunhi ŋayinydja mirithirrina wal'ŋu ḻatju'na dhikana ŋanyana.
3 Ŋunhayi gäraktja rirrakaymiriw yana,
yakana ŋayi yukurra dhäruktja waŋa,
4 yurru yolŋu walala ŋuli buku‐ḻiw'marama marŋgiyirri Godku nhänharayuna yukurranharayu,
ŋunhi walala ŋuli bakuruma gäraklili, ga nhäma;
Birrka'mirriŋurana wäŋaŋuranydja yolŋuyu walalay ŋuli dharaŋanna ŋäma dhäwuny'tja,
ŋunhi yukurra nhaltjan gärakthu ḻakarama Godnha.
5 Ŋunhayi gäraktja balanyara bitjan yindi wal'ŋu buṉbu djämawuy Godkuŋu ŋuriki waluwu.
Bitjan liŋgu djaḏaw'yunarayunydja ŋayi ŋuli walunydja gaŋgathirri goŋmirriyirrina dhikana wal'ŋu,
ŋayaŋu‐yiŋgathirrina ŋayi marrtjinydja ŋuli gärakkurrunydja bala,
bitjanna bitjan ŋuli yuṯa ḏarramu ŋunhi waṉḏirri yukurra bata'yunaralili bala.
6 Marrtjinydja ŋayi ŋuli yukurra waŋganyŋuru gali'ŋuru,
yana liŋgu ga ŋunhana bala gali'ŋura gärrinydja ŋayi ŋuli;
Bala ŋayi yukurra waluyunydja ŋunhi ḻithanmaramanydja birrka'mirrina wäŋanydja,
yakana yukurra waŋgany wäŋa ŋorra djuḻuḻ'yundja nhanukalanydja goŋŋuru.
7 Yo, Garraywunydja dhuwala rom ḻatju' warray ŋanya, dhapirrk warray dhika,
balanyara warray bitjan buŋgaṯmarama ŋayi ŋuli ŋunha ŋayaŋu.
Ŋilimurrunydja dhuwalanydja yolŋu'‐yulŋunydja, yaka ŋali marŋgi ŋuruku yuwalkŋuwunydja,
yurru ŋuriŋi Garraywalanydja dhärukthu ŋali ŋuli marŋgiyirrina marrtji,
bala ḻiya‐djambatjthirrina.
8 Yo, nhanŋunydja Garraywunydja dhukarr dhunupa warray yana,
ga ŋunhinydja walala ŋunhi walala ŋuli marrtji ŋuliwitjandhi dhukarrkurru,
nhinanydja walala yurru ŋayaŋu‐djulŋithirrina.
Garraywunydja rom dhuwala ḏarrtjalk dhika wal'ŋu ralkthunara djeŋarra',
bitjan yurru ŋuriŋi ḏarrtjalkkumana ŋilimurruŋgu ŋayaŋuna,
märr yurru ŋali nhina mälkuma nhämanydja,
bala marŋgiyirrina ŋuriki yuwalkŋuwunydja.
9 Yo, ŋamakurru' ŋunhi ŋali ŋuli rom‐wiyaṉiyirrinydja Garraywu;
bitjanna liŋgu gupaḏalnha‐wala yolŋunydja walala yurru nhina dhäruk‐märranharamirrina yanana.
Ŋayipinydja ŋuli Garrayyunydja djäma nhänydja ŋamakurru' ga dhunupa,
ga gupaḏalnha ŋunhiyi dhäruktja nhanŋu yurru yukurra dhärra djambimiriwnha nhämiriwnha.
10 Yo, ŋunhinydja mel‐wiḏi'mirrinydja girri' manymak warray,
yurru Godkunydja rom ŋunhinydja biyapul'nha wal'ŋu ŋamakurru' dhika,
djuḻkmarama yukurra ŋunhiyi girri'nha mel‐wiḏi'mirrinhanydja.
Ga gukunydja dhuwala dhäkay‐ḻatju' muka ŋanya dhika,
yurru nhanŋunydja Godkunydja dhäruk ŋunhi biyapul gal'ŋu,
djuḻkmarama yukurra ŋunhiyi gukunhanydja.
11 Garray, ŋuriŋi nhokalanydja dhärukthu ŋarranha ŋuli marrtji marŋgikuma,
liŋgu ŋarranydja dhuwala nhuŋu djämamirri.
Ŋuriŋi nhokala dhärukthunydja ŋarranha ŋuli raypirri'yun,
dharraykuma ŋarranha ŋula nhäŋuru yätjŋuru;
Rarr'yundja nhe ŋuli ŋarraku biyapul wal'ŋu dhika, goŋmirriyama wal'ŋu ŋarranha,
ŋunhi ŋarra ŋuli dhäruktja nhuna märrama.
12 Garray, wiripunydja ŋarra ŋuli rom‐waḏatjtjun nhuna,
bitjan ŋarra yurru yaka dharaŋan ŋunhiyi.
Rurrwuyurra ŋarranha Garray, ḏarrtjalkkuŋa ŋuliŋuruyi yätjŋurunydja dhukarrŋuru ga guyaŋinyaraŋuru,
ŋunhi yukurra djuḻuḻ'yun ŋarrakala ŋorra ŋayaŋuŋura.
13 Mulkiya ŋarranha baṯ biyaka,
märr ŋarra yurru yaka ḏukṯukthirri ŋuriki yätjkunydja.
Gunganhamirriyaŋa ŋarranha biyaka Garray,
märr yurru ŋarraku ŋayi yaka yätjtja buŋgawayirri,
bala ŋarra yurru ŋuliŋurunydja nhina ŋula nhämiriwnha yana wal'ŋu,
yakana ŋarra yurru djäma nhänydja ŋunhi yätj.
14 Garray, biyaka ḏarrtjalkkuŋa ŋarranha,
märr yurru ŋarra waŋa yukurra ŋamakurru' yana dhäruktja malanha, ga guyaŋirri ralkthunara yana wal'ŋu,
märr yurru ŋarrakala ŋuriŋi guyaŋinyarawuyyunydja ga dhärukthunydja nhunanydja galŋa‐djulŋikuma goŋmirriyama.
Garray, nhenydja ŋarraku ŋurrwu',
liŋgu nhe ŋarranha walŋakuŋala, märraŋala dhawaṯmaraŋala ŋuliŋuru yätjkalanydja goŋŋuru.