1 Ga ŋunhalayina wäŋaŋura ŋayi Garray waŋananydja * MosesMawtjitjkala bitjarrana, 2 “Ma', nhenydja djarr'yurrana mel'ŋunha walalanha waŋga'‐waŋganynha yana ŋurruŋumirrinha dhipuŋuruyi bäpurru'ŋuru ga bäpurru'ŋuru; walala yurru marrtji wäŋgama bala ŋunhamalayi wäŋalili, milthun marrtji nhäma yurru, ga maḻŋ'marama nhäyinyara ŋunhiyi wäŋa ŋunhi ŋarra yurru wekama nhumalaŋgu.”

3-16 Bala yana Mawtjitjthunydja djarr'yurrunana † 13:3–16 JoshuaDjatjuwanha ga wiripuŋunha yäkunha ‡ 13:3–16 CalebGaylipnha, ga biyapul märrma'‐rulunha ḏarramuwurrunha, ŋurruŋumirrinha wal'ŋu yana. 17 Djuy'‐way ŋayi walalanha bitjarrana, “Gatjuy marrtjiyana‐wala walala, ga gärriya ŋunhimala wäŋalili § CanaanGaynanlilinydja. Marrtjiyanydja walala ŋuliyi wäŋakurrunydja, ŋal'‐ŋalyurra yana ŋunhi buku'‐wukukurrunydja. 18 Nhäŋa marrtjiya maḻŋ'maraŋa nhäyinyara ŋunhiyi wäŋa, ga nhäyinyara yolŋu walala yukurra nhina ŋunhilimiyi . . . ḻurrkun' mak yalŋgi'mirri? . . . mak guḻku' wuṉḏaŋarrmirrinydja. 19 Mak nhäŋura walala yukurra nhinanydja? . . . buṉbuŋura yumurrku'ŋura ḏalwaḏalwa'ŋura? . . . mak wuṉḏaŋarrŋurana wäŋaŋura ḻoḻumirriŋurana? 20 Ga maḻŋ'maraŋa ŋunhi dhawal mak ŋatha mäypamirri, mak ŋathamiriw ga dharpamiriw ŋula nhämiriw. Gatjuy ḻaw'yurrana walala, ga lilinydja boŋguŋu nhuma roŋiyi dhäwu'na gäŋu ŋanapurruŋgu. Yakana beyaṉiyiyanydja walala, yana marrtjiyana‐wala ŋoy‐wuṉḏaŋarrthiyana. Guḻkthurru boŋguŋu borumdja ŋi' walala, ga gäŋuna lili ŋilimurruŋguway, liŋgu dhuwala borummirrina wäŋanydja.”

21-22 Martj‐gay walala marrtjinana, dhunupa yana gärrinana ŋunhimalayi wäŋalilinydja. Marrtjinanydja walala yukurrana ŋunhi wäŋakurrunydja, ḻiw'maraŋala yana, nhäŋalanydja marrtjina milthurrunanydja gayul yana bala. Walala maḻŋ'maraŋalanydja marrtjina ḻatju' warray dhika wäŋanydja ŋunhi, ŋatha mäypamirri warray, yurru wäŋaŋuranydja ŋunhiliyi ḏälmirri warray yolŋunydja walala yukurrana nhinana, bathalamirri warray, djaka' weyin'kurru warray. 23-24 Guḻkthurrunanydja walala borumnha dhirrimuknha goŋdja yarra'‐yarraṯana dhikana, ḻingarryinyarana borumdja ŋunhi, bala gäŋalanydja ḻambarryuna djunumanydja, ga bitjarrayi bili wiripuŋunhanydja borumnha guḻkthurrunayi walala, ḻatju'mirri dhika yana dhäkay. 25 Ḻaw'‐ḻawmaraŋalanydja, bala roŋiyinana martj‐martjurruna gäŋala walalaŋguna.

Wäŋgaŋalana walala bala‐a‐a, roŋi'‐ruŋiyinana, burway ḏo'yurruna, 26 yurru walalanydja Mawtjitjtja ga * AaronYärundja ga wiripuwurru yolŋu'‐yulŋu ŋunhi goŋmirriyinana gay walalanha nhäŋalanydja roŋiyinyaranydja. 27 Walalanydja ŋuriŋiyi mel'ŋumirriyunydja yuy'thurruna ḻakaraŋalana ŋurukuynha wäŋawuy bitjarra, “Liŋguna ŋanapurru nhämanydja yawungu ŋunhayi wäŋanydja, yurru ḻatju' warray ŋanya wäŋanydja ŋunha, ŋathanydja dhika guḻku'na, ḻatju'mirrina ŋatha ḻukanharawu. Dhuwalana borumdja ya' ŋurukuy. 28 Yurru yolŋu'‐yulŋunydja ŋunha yukurra nhina ganydjarr‐ḏilkurruna, bena‐wala djaka' weyingurruna, guḻku'na mirithirrina miṯtjinydja; nhinanydja marrtji walala ŋunha wäŋaŋuranydja wuṉḏaŋarrmirriŋurana, yindiŋurana ḻoḻuŋura. 29 Wiripunydja yawungu ŋanapurru yolŋu'‐yulŋunha nhäma ŋunhiyi maḏakarritjmirrinhana, ŋunhayi † AmalekYamaliknha bäpurru'nhanydja, ga wiripuna wiripuna bäpurru yukurra nhina maḏakarritjmirrina bäymana yolŋunydja walala. Walala marrtji nhinanydja ŋunha buku'‐wukukurru ga ŋoykurru, ga raŋikurru wäŋakurrunydja, ga galki mayaŋ'kurru, ga warrpam'nha gungaŋala wäŋanydja ŋunha.”

30 Bala walala ŋuriŋiyi ‡ IsraelYitjuralyu malayu ŋäkulanydja ŋunhi walalaŋguŋu dhäwuny'tja, yurru walala yatjunminana gay', barrarinana wirrkina, bala ŋayi Gaylipthunydja waŋana mukmaraŋala walalanha, “Mukthurra walala,” bitjarra. “Gul' ŋilimurrunydja marrtjina‐wala yana go. Ŋilimurru yurru ŋupanna walalanha yana, bumana marrtji, ga yana liŋgu ga dhawar'marama wal'ŋu, liŋgu ŋilimurrunydja dhuwala wuṉḏaŋarrmirri warray, yaka warray yalŋgi'mirri.” 31 Yurru wiripuwurrunydja ŋunhi mel'ŋumirri waŋana bitjarra, “Yä‐ä‐äw, yakana ŋilimurru ŋuli buŋu dhawar'maraŋu ŋunha walalanha, liŋgu wuṉḏaŋarrmirrina ŋunha walalanydja, ga ŋilimurrunydja dhuwala yalŋgi'mirrina, muṉguynha wal'ŋu.”

32 Ŋe, bitjarrayi walala ḻakaraŋalanydja ŋuriŋiyi mel'ŋumirriyunydja walalay, wiripuyaŋala warray, borrk‐beyaṉu‐wukuŋalana bitjarra, “Yätjnha ŋunha wäŋanydja bay', maḏakarritjmirrina yana ga bäyŋuna ŋathanydja. 33 Ŋutu'mirrina nhina yukurra yolŋunydja, djaka' ḏilkurruna, djuḻkthunmaramana yukurra ŋilimurrunhanydja. Ŋanapurrunydja ŋunhi ŋunhala balanyarana bitjan ŋula nhäna muṉguynha wäŋga'‐waŋgaŋala walalaŋgala maŋutjiŋuranydja, biyaku ŋuli ḏetjnha.”