1-2 Ga biyapul ŋayi Garrayyu gurrunhara rom * 23:1–2 IsraelYitjuralpuyŋuwunydja, dhuwalana gam'. “Wiripunydja walu ŋunhinydja ŋarrakuway yana dhulŋuŋu gal'ŋu, ganaŋ'thun yukurra ŋuliŋuru djämamirriŋurunydja waluŋuru, märr yurru nhuma yukurra ŋayaŋunydja nhinana nhanŋuwaynha buku‐ŋal'yun Garraywuna. 3 Ḏämbumirri ga waŋgany bäythinyara walu ŋunhiyinydja djämawu, ga wiripunydja ŋunhi walu ga nhanŋuwaynha ganaŋ'thunna yukurra dhulŋuŋuna. Ŋuriŋiyinydjayi dhuyuyunydja waluyu ganaŋ'thunarayunydja nhe yurru ŋayaŋunydja nhinana yukurra yana; yakana nhe yurru djäma ŋuriŋiyinydjayi, yana nhuma yurru ŋuriŋiyinydjayi waluyu ḻuŋ'maranhamirrina marrtji bitjanna waŋganylilina ŋurruk‐manapanmirri, bala buku‐ŋal'yunna yukurra yurru Garraywu.

4 “Ga ḻurrkun'mirri ŋunhi dhuŋgarramirri nhuma yurru birrka'mirri miṯtji malanha Yitjuralpuyŋu ḻuŋ'maranharamirri waŋganylili ŋunhiwala Godkala buṉbulili. Dhuwalayinydjayi walu guyaŋinyaramirrina yukurranharamirri, bala nhuma yurru marrtji waŋgany‐manapanmirrina gal'ŋu, ga djämana dhuwalayi rom, liŋgu dhiyaŋuyinydjayi romdhu yukurra ḻakarama guḻku'na mirithirrina dhiyalaŋumiyinydjayi mayali' malanha. Ŋunhi yurru ŋayi walunydja dhuwalayi galkithirri buna, ŋayinydja yurru ŋunhi ḏalkarra'mirrinydja yolŋu ḻoḻthunna yiḏakinydja, bitjan ḻakaramana yurru yolŋu'‐yulŋuwana bitjanna, ‘Go, marrtjiya lili waŋgany‐manapanminyarawuna, liŋgu walunydja dhuwala guyaŋinyaramirrina nhanŋu Garraywuna.’

5 “Yo, Ḻäy‐yuḻkmaranharamirrinydja walu Garraywunydja ŋunhi yukurra yurru ŋurru‐yirr'yun ŋuriŋi 14‐dhunydja munhayu ŋurruŋuyunydja gal'ŋu ŋaḻindiyu, bala ŋuriŋi bili walu‐gulŋiyinyarayu nhumanydja yurru yukurra bitjandhiyina djäma ŋunhiyinayi guyaŋinyamirrina rom. 6 Ga ŋunhinydja bala wiripunydja walu, ŋunhiyinydjayi nhuma yurru yakana ḻuka yukurra ŋatha ŋunhinydja ruwaŋga'kunharamirrinydja, yana nhuma yurru ḻukanydja yukurra ŋunhina liŋgu yana ruwaŋga'kunhamiriwnha gal'ŋu, yana liŋgu ga ŋunhi yurru 7 walu djuḻkthun, liŋgu ŋunhiyinydjayi walu guyaŋinyamirri ŋurikiyinayi ‘Ŋathawu Ruwaŋga'kunhamiriwwuna.’ 7-8 Yo, ŋunhiyinydjayi ŋurruŋunydja gal'ŋu walu dhulŋuŋu yana Garraywu nhanŋuwaynha, yakana nhe yurru ŋuriŋiyinydjayi waluyu ŋula djäma, yana yurru nhe gämana mundhurrnha nhanŋu Garraywu walu ŋupanna‐a‐a, yana liŋgu‐u‐u ga 7 ŋunhi walu yurru djuḻkthun. Ga ŋunhiyi walunydja dhä‐yawar'yunaramirrinydja bitjandhi yana ŋunhiyinydja dhulŋuŋuyi Garraywu yana, yakana nhe yurru ŋuriŋiyinydjayi ŋula djäma waluyu yukirriya.

9-10 “Yo, galkina dhuwala yulŋunydja ŋunhi nhuma yurru gulŋiyirrina ŋunhiwalayina wäŋalili ŋunhi ŋayi Garrayyu yurru wekama nhumalaŋgu, bala gulkthurra nhuma yurru ŋäthilinydja märr‐warŋgarrkkuŋa ŋatha malanha, bala garrpi'‐garrpilana ŋurruk‐mana'‐manaparrana, bala yurru nhuma marrtji gämanydja ŋurruŋunydja wal'ŋu ŋunhinydja ŋatha ŋurikala ḏalkarra'mirriwalana. 11 Ga ŋunhalayinydjayi Godkalanydja buṉbuŋura ŋayi yurru ŋuriŋiyi ḏalkarra'mirriyu märramana Djandina waluyu, bala ŋayi yurru garrwarkumana yukurra ŋunhiyinydja, bala waṉa'‐waṉayunna yurru milkumana yukurra nhanukala gumurrŋura Godkalana Garraywalana. Bala ŋayi yurru Godthunydja märramana yana ŋunhiyi ŋurruŋunhanydja gal'ŋu, dharapulŋura bukmakkalana nhumalaŋgala; bukmaknha yurru ŋayi ŋunhiyi märramanydja yana ŋurikalayinayi ŋurruŋuwalana. 12-13 Ga bitjandhiyina nhuma yurru bathandja wiripunydja malanha mundhurr nhanŋu Garraywu, ga ŋunhi ŋayi yurru yukurra buŋgandja gaŋgathirri bala, ŋayinydja yurru yana galŋa‐djulŋithirrina märramanydja ŋunhiyi nhokuŋu mundhurr‐wekanharanydja. 14 Yaka yana nhuma yurru ḻuka ŋuliŋuruyinydja ŋathaŋuru; ŋurruŋunydja nhuma yurru gäma ŋäthili nhanŋu Garraywu, ga ŋuliŋuruyinayi dhurrwaraŋuru nhuma yurru ḻukanydja. Ga dhuwalayinydjayi rom yukurra yurru dhärrana yana‐wala gupaḏalnha.

15-16 “Yo, nhuma yurru bothurru walunydja 50‐kuŋa ŋuliŋuruyi dhäŋuru ŋunhi ŋayi ḏalkarra'mirriyu märraŋala ŋatha, bala garrwarkuŋalana dharrana bala‐lili Garraywalana gumurrŋura, ga ŋuriŋinydja bala 50‐yunydja waluyu nhuma yurru marrtji biyapul ḻuŋ'maranhamirri waŋgany‐manapanmirri, gämana yurru mundhurrnha Garraywuna ŋunhiyina ŋatha gulkthunara yuṯa‐märranharana. 17-20 Yo, ŋunhili wäŋaŋuranydja nhokalay, nhe yurru batharra märrma'kuŋa yulŋunydja dämbany'tja, yurru ruwaŋga'kunhamirriyu yulŋunydja batharra ŋunhiyinydja, ga ŋunhi ŋurruŋunydja bitjan nhanŋuwaynha yurru Garraywuna dhulŋuŋuna. Ga biyakayi nhuma yurru dhambay‐manaparrayi batharra wäyindja, märr yurru nhumalaŋgu ŋayi yätjpuynydja ŋäkirrmaramana yana ŋuriŋiyi wäyingalanydja maŋgu'‐waṉḏinyarayu. Bala ŋayinydja yurru Godthunydja yana märramana nhumalaŋguŋu galŋa‐djulŋithirrina, ŋunhi ŋayi yurru marrtji buŋgan bäwny'tja bala gaŋgathirri. 21-22 Yaka yana djämanydja ŋuriŋiyinydja waluyu, yana nhuma yurru waŋgany‐manapanmirrina ḻuŋ'maranhamirrina ŋunhiliyi Garraywalana gumurrŋura, bala buku‐ŋal'yunna yana. Gupaḏalkuma nhuma yurru yana ŋayathamanydja baṯ bitjan dhuwalayi romdja, bitjan yurru dhuwalayinydja walu dhulŋuŋuna nhanŋuwaynha yana Garraywuna, wanhawitjan nhe yurru nhina marrtji bala wäŋakurru.

23-24 “Ga dhurrwaraŋuru ŋuliŋuruyinydjayi nhuma yurru bulnha galkun ŋathili märr‐weyin, yana liŋgu ga 7 yurru ŋaḻindi galkina gal'ŋu, ga ŋurruŋuyunydja ŋuriŋi waluyu ŋuriŋi 7‐dhunydja ŋaḻindiyu, ŋunhiyinydja ganaŋ'thun yukurra dhulŋuŋuna nhanŋuwaynha Garraywuna gal'ŋu, yakana nhe yurru yukurra djäma ŋuriŋiyinydjayi waluyu, yana nhuma yurru yukurra ŋayaŋuna‐nhina, buku‐ŋal'yun nhanŋuwaynha Garraywuna. Bala yurru ŋunhi ḏalkarra'mirrinydja walala yukurra marrtjina ḻiw'maramana wäŋakurruna, bopthunna yurru marrtji ŋuriŋi yiḏakiyinyarayuna, ḻakarama yurru marrtji yolŋu'‐yulŋuwanydja bitjanna gam'. ‘Go, marrtjiyana lili waŋgany‐manapanmiyana Garraywala, liŋgu Garraywunydja dhulŋuŋunydja walu galkina dhuwala.’ 25 Yaka yurru nhuma ŋuriŋinydjayi waluyu djäma yukurra, yana nhuma yurru ŋuriŋiyi waluyunydja mundhurrnha bathan yurru yukurra Garraywu.

26-27 “Yo, ŋuriŋi 10‐dhunydja waluyu ŋuriŋi liŋgu yana ŋaḻindiyu 7‐dhu, Godthunydja yurru bitjanna buwayakkumana yätj Yitjuralpuyŋuwunydja, bitjan yuṯakumana, märr yurru walala biyapul nhina yukurra waŋgany‐manapanmirri yurru Godkala. Bukmak nhuma yurru Godkunydja yolŋu'‐yulŋu ŋunhi miṯtji ga miṯtji ga miṯtji marrtjiya waŋgany‐manapanmiyana yukirriya ŋunhiwala Godkalana buṉbulili, bala waŋganynha ŋayaŋunydja nhuma yurru yukirriya wuyunmiya nhumalaŋgalayŋuwu yätjkunydja malaŋuwu. Yakana nhuma yurru djuḻuḻ'marama nhumalaŋguway yätjtja malanha, yana nhuma yurru wuyundja yukurra nhina ŋunhi ŋoy‐ŋathamiriwnha, bitjan ḻakaranharamirrina yukurra yanana yurru Garraywala, bala bathan marrtji wäyinnha malanha ŋunhiwala barŋlilinydja, märr yurru ŋuliwitjandhiyi wäyingalanydja gulaŋ‐waṉḏinyarayu ŋayi yurru Godthunydja ŋäkirrmaramana yana warrpam'nha nhumalaŋgu yätjpuynha. 28 Yaka yana ŋuriŋiyinydjayi waluyu djäma yukirriya, yana nhuma yurru djämanydja ŋunhiyi liŋgu rom ŋunhi Godthu gurrunhara, märr yurru ŋuliwitjandhinydjayi Godthu buwayakkumana nhumalaŋgu nhänydja malanha yätjtja. 29 Ŋuli yurru ŋula yol yolŋu yakanydja bilyun nhanukalayŋuwu ŋayi yätjku ŋuriŋiyinydjayi waluyu, yakanydja ŋayi yurru wuyun yukurra nhina ŋoy‐ŋathamiriw, ŋunhiyinydjayi yolŋu yakana yurru nhanŋu Garraywu biyapulnydja. 30 Ga ŋuli ŋayi yurru ŋula yolthu yolŋuyu djäma yukurra ŋula nhä ŋuriŋinydja ḏaykun'thu, ŋayinydja yurru Garrayyunydja yana ŋanya baḏuwaḏuyunna ŋunhiyi yolŋunha. 31-32 Yo, ŋunhiyinydjayi walu yukurra yurru dhärra yana nhanŋuwaynha gal'ŋu dhulŋuŋuna ganaŋ'maranharana gupaḏalkunharana, yakana yana yurru ŋula yolthu yukurra djämanydja ŋuriŋiyi waluyu, yana nhuma yurru nhinana yukurra ŋoy‐ŋathamiriwnha, wuyunna nhuma yurru yukurra yana nhokalayŋu yätjkuna ŋurikina.

33-34 “Dhäŋuru ŋuliŋurunydja ŋunhi Godthu biyapul yuṯakuŋala miṯtjinha nhanŋuway, ŋuliŋuruyinydja dhurrwaraŋuru walunydja yurru ḏämbumiriwnha djuḻkthun, ga ŋunhinydja bala wiripunydja walu, ŋunhinydja gänana gal'ŋu dhulŋuŋuna nhanŋuwaynha Garraywuna, yäku ‘Buṉbunharamirrina Walu.’ 35-36 Yakana yurru nhe yana ŋuriŋiyinydjayi waluyu djäma ŋula yolthu yolŋuyu, yana nhuma yukurra yurru mundhurrnha wekama Garraywu ŋathana malanha walu‐ŋupanna‐a‐a, yana liŋgu ga 7 walu yurru djuḻkthun, ga wiripuŋuyunydja waluyu nhuma yurru marrtji waŋgany‐manapanmirri buku‐ŋal'yunarawuna. Ŋunhiyinydjayi walu buku‐ŋal'yunarawu yana, yaka nhuma yurru djäma yukurra ŋuriŋiyi dhä‐yawar'yunarayunydja waluyu, liŋgu ŋunhiyinydjayi gäna gal'ŋu yana dhulŋuŋu Garraywu nhanŋuway.

37-38 “Yo, bitjan liŋgu walu ŋupan nhuma yukurra yurru ḻuŋ'maranhamirrinydja buku‐ŋal'yunarawunydja bitjan mundhurr wekama Godku, nhuma yurru buma wäyindja, bala bathan barŋlilina, bala yurru ŋayi Godthunydja yakana nhäma ŋilimurruŋgu yätjpuynydja, liŋgu ŋuriŋinayi gulaŋ‐waṉḏinyarayu wäyingalana. Ga ŋuriŋinydja wiripuŋuyunydja waluyu guyaŋinyaramirriyunydja ŋunhi ŋayi ganaŋ'maraŋala Garrayyu nhanŋuway ŋayi, nhuma yurru biyapul wekama bukulili ŋal'marama ŋunhiwalayi ŋunhi nhuma ŋuli marrtji wekama bitjan liŋgu munhamandhirri.

39 “Yo, ŋunhi nhuma yurru 7‐dhunydja ŋuriŋiyi ŋaḻindiyu ḻuŋ'maranhamirri waŋgany‐manapanmirri waŋganylilina ŋuriŋi 15‐dhunydja waluyu, nhuma yurru yukurra nhina waŋganyŋura 7‐nha walunydja ŋupan, goŋmirriyirrina dhikana wal'ŋu, ŋayaŋu‐djulŋithirrina bitjanna yurru, liŋgu djämanydja liŋguwuynha dhawar'maranharana warrpam'puynha; ŋathanydja ŋunhi gulkthunarana liŋguwuynha ḻuŋ'maranharana gänharana ŋunhiwalayi ŋathawuylilina buṉbulili. Yo, ŋunhi ŋurruŋunydja walu wal'ŋu ŋurikiyi djulŋithinyamirriwunydja waluwu, ŋunhiyinydjayi gäna yana gal'ŋu; märr nhuma yurru ŋayaŋuna‐nhina yukurra yänana, yakana ŋula djäma ŋuriŋinydjayi waluyu. 40 Yo, ŋuriŋi ŋurruŋuyunydja waluyu nhuma yurru marrtji bala gulkthunna ḻatjuny'tja dhikanydja wal'ŋu yana muḻkurr borum dharpaŋuru, ga bitjandhiyi nhuma yurru gulkthundhi baṉdja'‐baṉdjanydja ŋurikiy dharpawuy, bala buṉbuŋana bala'palakuŋana yurru. Bala nhuma yurru yukurra nhinana ŋunhili buṉbuŋuranydja 7‐nha walunydja, märr‐yingathirrina gal'ŋu bitjanna, märr‐ŋal'yunna manapan yurru nhanukala, goŋmirriyirrina wirrkina Garraywala nhokalaŋuwala Godkalanydja. 41 Yo, bitjan liŋgu dhuŋgarra watjthirri nhuma yurru djämanydja yukurra dhuwalayi romdja ŋuriŋinydja 7‐dhunydja ŋaḻindiyu, nhinanydja nhuma yurru yukurra galŋa‐djulŋithirrina dhikana wal'ŋu 7‐nha walunydja ŋupan, liŋgu dhuwalayinydja nhanŋuway wal'ŋu yana Garraywu Godku galŋa‐djulŋithinyaramirri walu, galŋa‐ḻayyunaramirri, ga romdja dhuwalayi yukurra yurru dhärra bitjanna liŋguna gupaḏalnha‐wala. 42-43 Yo, ŋuriŋiyi 7‐dhu waluyu nhuma yurru yukurra nhina ŋunhiliyina buṉbuŋura bala'palaŋurana, märr yurru nhumalaŋgu yumurrku' ga gutharra'mirriŋu walala marŋgiyirri marrtji nhäma dhipalayi, ŋunhi ŋarrakuwaynydja yolŋu walala Yitjuralpuyŋunydja nhinana yukurrana ḏalwaḏalwa'ŋura warray buṉbuŋura malaŋuŋura, ŋunhi ŋarra dhawaṯmaraŋalanydja walalanha walŋakuŋala beŋuruyi † 23:42–43 EgyptYetjipŋurunydja. Yo, ŋarrapi dhuwala Garraynydja nhumalaŋgu God Waŋarnydja.” Ga bitjarrayina ŋayi yukurrana Godthu ḻakaraŋalanydja ‡ 23:42–43 MosesMawtjitjkala.

44 Ga ŋayinydja Mawtjitjthunydja ḻakaraŋala yolŋu'‐yulŋuwa ŋuripa Yitjuralpuyŋuwana, märr yurru walala dhuŋgarra‐watjthirri bitjan liŋgu waŋgany‐manapanmirrinydja yukurra, bala buku‐ḻuŋ'thun waŋganyŋurana, bitjan goŋmirriyirrina wal'ŋu dhikana ŋuriŋiyinydjayi dhulŋuŋuyunydja gal'ŋu nhanukalaynydja ŋayi waluyu. Yo, Godthu ŋayipi ŋunhi nherrara ŋunhiyi romdja, liŋgu ŋuriŋiyinydjayi malaŋuyu romdhu yukurra ḻakarama mayali' ŋurikinayi ŋunhi ŋayi yurru Garrayyu ŋayipi djäma yalalaŋumirriyu nhanukalayŋuwu ŋayi yolŋu'‐yulŋuwu.