1 Waŋganymirri waluyu ŋayi * SamsonDjämdjin marrtjina bala † TimnahDiminalili wäŋalili yäkulili, ga ŋunhala ŋayi nhäŋala ‡ PhilistiaBilitjiyapuyŋunha miyalknha, ḻatju'nha dhika rumbalnha miyalknha. 2 Ga ŋunhi ŋayi lilinydja roŋiyina ŋäṉḏi'mirriŋuwalanydja ga bäpa'mirriŋuwalanydja, bitjarrana ḻakaraŋalanydja ŋayi maṉḏaku, “Ŋunha Diminanydja dhäyka yukurra nhina ŋanya dhika buku‐ḻatju'na bäymana. Ŋarra ḏukṯuk ŋarra yurru märramana ŋanya. Ma' nhuma marrtjiyana, ga gäŋana lili ŋarraku; ŋayi yurru ŋarrakuna miyalktja ŋunha.”

3 Yurru maṉḏa ŋäṉdi'mirriŋunydja ga bäpa'mirriŋunydja waŋana nhanukala bitjarra, “Nhäku warray nhe yurru märrama ŋunhinydja dhäkaynha? Ŋunhinydja Bilitjiyapuyŋu warray. Nhe ŋuli märraŋu dhipuŋuru bäyma ŋilimurru miṯtjinha miyalknha, § IsraelYitjuralpuyŋunha yana, liŋgu ŋunhayinydja bäpurru' yaka warray yukurra buku‐ŋal'yun Godku Garraywu.”

Ga ŋayi Djämdjindja waŋana bitjarrana, “Ŋurukuna liŋguna ŋarra ḏukṯuktja nhanŋuwaynha, ŋarra yurru märramana ŋanya.”

4 Yo, ŋulinyaramirriyunydjayi waluyu ŋunhiyi walala Yitjuralpuyŋu yukurrana nhinana ŋurikala Bilitjiyapuyŋuwala goŋŋura, walala yukurrana wäŋawu buŋgawayina ga Yitjuralpuyŋuwu yolŋu'‐yulŋuwu ŋuriki. Ga Garrayyunydja bulnha galkurruna yukurrana nhäŋala dhukarr, wanhawitjan ŋayi yurru dhukarrkurru yarrkmarama ŋunhiyi buma Bilitjiyapuyŋunha; ŋayi yurru buma dhawar'maramanydja Djämdjingalaŋukurruna ŋunhi.

5 Bala Djämdjin marrtjinana, malthurrunanydja ŋayi ŋäṉḏi'mirriŋuwu ga bäpa'mirriŋuwu bala Diminalilina. Ŋunhi walala marrtjina bala wäŋgaŋala dhukarr‐ŋupara, bala ŋayi ŋäkula läyin wäyin maḏakarritj, ŋayi marrtjina murryurruna. 6 Ga dhunupana ŋanya Djämdjinnhanydja Godkalanydja ganydjarryu monyguŋalana, bala ŋayi marrtjina ḏälthinana dhika, wuṉḏaŋarryinana. Bala ŋayi gatjpaḻ'yurrunanydja, baṯ‐gay mulkana ŋunhiyi wäyinnha läyinnhanydja, bala yana barr'maraŋalana nhanukiyingala goŋdhuna, bitjarrana dhuwala bitjan ŋuli yolŋuyu barr'maraŋu yutjuwaḻa' wäyin nanikut. Yurru ŋayi yaka ḻakaraŋala bäpa'mirriŋuwunydja ga ŋäṉḏi'mirriŋuwunydja ga ŋula yolku birrka'mirriwunydja.

7 Dhurrwaraŋuru ŋuliŋurunydja ŋayi Djämdjin marrtjinana bala, ga bunana ŋuriki miyalkkuna; wirrkina ŋayi ḏukṯukmirriyina nhanŋu märranharawuna ŋuriki miyalkku.

8 Ŋula nhämuny'nha walu djuḻkthurruna, bala ŋayi roŋiyinana balayi märranharawuna ŋurikiyi miyalkkuna. Marrtjinanydja ŋayi, ga biyapul ŋayi gatjpaḻ'yurruna nhänharawuna ŋurikiyi läyinguna ŋunhi ŋayi yawungu buma. Bala ŋayi nhäŋala ṉirryurrunana dhika, marrtjina guku warray ŋunhimala buṉbuŋalanydja läyingala rumballilinydja. 9 Bala ŋayi goŋdhuna dhiṯthurruna gukunydja ŋunhi ŋuliŋuruyi läyingalanydja, bala ḻukanana marrtjina bala, biḻaŋ'thurrunana. Ga wiripunydja ŋayi wekaŋala bäpa'mirriŋuwuna ga ŋäṉḏi'mirriŋuwuna, ga maṉḏanydja ḻukanayi ŋunhi. Yurru Djämdjindhu yaka ḻakaraŋala bäpa'mirriŋuwunydja ga ŋäṉḏi'mirriŋuwunydja ŋunhi ŋayi ŋunhiyi märraŋala guku ŋulaŋuru läyingala rumbalŋuru.

10 Yo, Djämdjingu bäpa'mirriŋu marrtjina ŋunhimalayinydja buṉbulilinydja, bala ŋayi Djämdjindhunydja ŋathana ŋäthilimirriyaŋala ŋurikala miyalkkalana bala'ŋura, walala yurru ḻuka nhanukala yukurra ḻundu'mirriŋuyu walalay, liŋgu ŋunhiyinydja walalaŋgu rom. 11 Bala ŋulinyaramirriyu 30 ḏarramuwurruyunydja withiyara ŋanya Djämdjinnha, Bilitjiyapuyŋuyunydja yawirriny'thu, bala walala ḻukanana yukurrana märr‐ŋamathinanana, rrambaŋina walala Djämdjindhuna.

12-13 Ga ŋayi Djämdjindja waŋana walalaŋgala bitjarra, “Ŋarra yurru nhumalanha waŋa mayali'kurru, ga ŋuli nhe yurru mayali' maḻŋ'marama warray dhipuŋuruyi, ga ŋarranydja yurru barrkuwatj yana nhumalaŋgu weka'‐wikama girri' ḻatju'mirrinydja. Ga ŋuli nhuma yurru yakanydja maḻŋ'marama mayali', nhumanydja yurru wekama ŋarranha girri', waŋga'‐waŋganydhu yana nhuma.”

Ga walalanydja ŋunhi yuraŋala bukmak, waŋana bitjarrana, “Go waŋiya lili ŋanapurrunha, ḻakaraŋa ŋanapurruŋgu.”

14 Bala Djämdjindhunydja ḻakaraŋala bitjarrana,

Ga walalanydja yukurrana baḏak birrka'yurruna yawirriny'thunydja ŋuriŋi, ga ḻurrkun' walunydja ŋupara, ga yakana maḻŋ'maraŋalanydja walala nhä ŋunhi mayali' ŋayi ḏe'ŋu‐ŋupara walalaŋgu.

15 Ga wiripuŋuyuna munhayu ŋunhi Bilitjiyapuyŋu yawirriny' waŋana nhanukalaŋuwala miyalkkala Djämdjingalaŋuwala, “Mayali'‐wulaŋa nhe nhuŋuway dhuway'mirriŋunha ŋe', . . . ga maḻŋ'maraŋa nhanukala mayali' ŋunhiyi dhäruk, märr ŋanapurru yurru marŋgithirri. Ga ŋuli nhe yurru yakanydja ŋanapurruŋgu ḻakarama, marŋgikuma ŋanapurrunha, ŋanapurrunydja yurru dhuŋgur'yun nhokalaŋuwa bäpa'mirriŋuwa wäŋana, ga nhunapinyay. Nhäku nhuma maṉḏa ŋanapurrunha garr'yurruna dhipalanydja? . . . Nhe ḏukṯuk ŋanapurru yurru rarr'yun yana nhokalaŋuwu girri' dhuway'mirriŋuwu?” Ga bitjarra walala yukurrana waŋana ŋurikala dhäykawalanydja.

16 Bala ŋayi ŋunhiyi miyalktja marrtjinana withiyara Djämdjinnhana dhuway'mirriŋunhana nhanŋuway, bala ganurukurruna waŋana marrtjina ŋanya, “Yaka ŋarraku nhe yukurra märr‐ŋamathirrinydja dhuwala. Yana nhe yukurra ŋarraku ŋaramurrthirri ŋiniya! Ḏe'ŋu‐ŋupara nhe waŋana ŋarraku ḻundu'mirriŋunha walalanha, ga yakana nhe ḻakaraŋala ŋarrakunydja mayali' ŋunhiyi.”

Ga ŋayinydja Djämdjindja waŋana bitjarra, “Bitjarraŋga liŋgu ŋarra yaka yana mäḻu'mirriŋuwanydja ga ŋäṉḏi'mirriŋuwanydja ŋarrakalaŋuwa ḻakaraŋala ŋunhiyi mayali'. Nhäku warray ŋarra yurru nhuŋunydja ḻakarama mayali'?” Bitjarrana ŋayi Djämdjindja waŋana.

17 Bala ŋayinydja ŋayaŋganynha ŋäthina ŋunhi nhanŋu miyalktja, ŋayaŋganynha nhinana ŋäthina 7 munhanydja ŋupara, ga yana liŋgu‐u‐u rom ŋunhiyi ŋathawuy dhawar'yurruna walalaŋgu. Yana liŋgu ga ŋunhina ḏaḏaw'yunaramirrina walu ŋayathaŋala, bala ŋayi ŋulinyaramirriyuna ḻakaraŋalanydja nhanbala ŋuripa miyalkpanydja, bili ŋayi yukurranha bitjanana liŋgu ŋuli waŋanhana ŋanya, “Ḻakaraŋa ŋarraku mayali',” bitjanana ŋayi yukurranha ŋuli. Bala ŋayi yuwalkthina ḻakaraŋalana Djämdjindhunydja ŋunhi mayali'na, ga dhunupana ŋayinydja ŋunhi dhäykanydja marrtjinana, bala ḻakaraŋalana walalambala ŋuripa yawirriny'pana. 18 Ga walalanydja martj‐gay martj‐martjtjurrunana lili, ga bunana Djämdjinguna, bala waŋana bitjarrana, “Liŋguna ŋanapurru maḻŋ'maraŋalana ŋunhi mayaliny'tja. Guku dhuwala dhäkay‐djulŋinydja, ga ganydjarr‐ḏumurrunydja ŋunhi ga läyin wäyin. Nhe maḻŋ'maraŋala guku läyingala.”

Ga ŋayi Djämdjindja buku‐wakmaraŋala bitjarra, “Ŋunhi bini nhuma yaka warray djaw'yuna ŋarraku miyalknha, ga nhumanydja bini yaka warray maḻŋ'maranha mayali'.”

19 Bala wirrkina ŋayi Djämdjindja dhika ŋaramurryina. Dhunupa ŋayi dhika ganydjarrnha märraŋala gay', ŋutu'na bunana nhanŋu ganydjarr Garraywuŋuna nhanukuŋuwaynha, bala yana ŋayi marrtjinana, bala bumarana yolŋu'‐yulŋunha ḏarramuwurrunha Bilitjiyapuyŋunhananydja, 30‐nha miṯtjinhanydja ŋayi bumara rakunyguna. Bala ŋayi yup‐yupmaraŋalana ŋurikala walalaŋgala girriny'tja rumbalŋurunydja, bala gäŋala ŋunhiyinydja girriny'tja ŋuripana walalambala yawirriny'pana ŋunhi walala mayali' nhanŋu ḻakaraŋala.

Yo, Djämdjindja wirrkina ŋaramurryina miyalkkunydja ŋuriki nhanukalayŋuwu, bala ŋayi gonha'yurrunana ŋanya, bala marrtjina balayi bäpa'mirriŋuwalana wäŋalili. 20 Ga nhanukala ŋurikala miyalkkalanydja bäpa'mirriŋuyu wekaŋala ŋanya ŋunhi miyalknhanydja wiripuŋuwana ḏarramuwa, Djämdjingalaŋuwa ḻundu'mirriŋuwana.