5 Ga biyapul ŋayi Garray ŋarrakala waŋana bitjarra, 6 “Dhuwalanydja walala yolŋu'‐yulŋu yakana ḏukṯuk dhiyakunydja gapuwu ŋunhi yukurra dhawaṯthun * 8:6 JerusalemDjurutjalamŋuru, ga biyapul walala yukurra barrarirri ŋuriki märrma'wu buŋgawawu maṉḏaku, ga yakana walala yukurra märr‐nherraṉmirri ŋarrakalanydja. 7-8 Bala ŋarranydja yurru gäma buŋgawanha ŋurukuynha † 8:7–8 AssyriaYatjiriyawuynhana ga nhanŋu miṯtjinha miriŋunha, walala yurru marrtjinydja lili bitjanna bitjan ŋurruthinyarayu waṉḏirri ŋuli gapu mayaŋ'kurru, ga wäŋanydja yurru warrpam'nha gungamana ḻiw'maramana ŋuriŋi miriŋuyuna walalay.”

9-10 Yo, nhumanydja dhuwali mulku'‐mulkuruna miṯtji gumurr‐ŋamathirrina yukurra marrtjinyarawuna ga bunharawuna ŋanapurruŋgu; nhuma yukurra guyaŋirri yanapi nhuma yurru djuḻkmarama ŋanapurrunha, yurru nhumanydja bini ŋunhi barrarinya muka, liŋgu nhuma yukurra waŋa dhäruknha waŋganynha, ga ḻiya‐ŋamaŋamayunminyarawuy nhumalaŋguŋu ŋunhi yätjnha yana ŋula nhäna, mayali'miriwnha, liŋgu Godtja dhuwala ŋanapurruŋgala warray gal'ŋu.

11-12 Ga biyapul ŋayi Godthu yukurrana ḻakaraŋala ḏäl dhäruk, raypirri'yurruna ŋarranha bitjarra, “Yaka nhenydja marrtjiya munguyurra ŋunha wiripu‐guḻku'nhanydja yolŋu'‐yulŋunha goyurr, ga yaka barrariya ŋurikiyinydjayi nhäku malaŋuwu ŋunhi walala yukurra barrarirri ŋurikiyi. 13 Guyaŋiya muka ŋarranhanydja, ŋunhi ŋarrapi dhuwala Garray ganydjarr‐ḏumurrunydja wal'ŋu, ga biyapul ŋarra ŋarrapi yana gäna wal'ŋu ḏarrtjalk. Ŋarrakuna nhe yurru yuwalktja gal'ŋu rom‐wiyaṉiyirri. 14-15 Ŋarrapi yurru yana gunganharamirriyamanydja nhumalanha Yitjuralpuyŋunhanydja, yurru wiripunydja ŋunhi Djudawuy yolŋu'‐yulŋu yurru dhumbal'yunmirrina marrtji galkirrina bitjanna. Yo, miriŋunydja yurru marrtji ga mulkana garrpi'‐garrpiṉna walalanha, guḻku'nhana yurru marrtji gaṯmarama bala djaw'‐djawyunna.” Bitjarra ŋayi Garray waŋananydja.

16 Yo, nhumanydja yurru ŋarrakalaynydja ŋunhi yolŋu'‐yulŋuyu dhäruktja dhuwalayi guyaŋirrina yukurra, yurru yakana yana ḻakaraŋanydja ŋunhi ŋayi Godthu wekaŋala ŋarranha. 17 Garraynydja ŋayipinydja djuḻuḻ'maranhamina ŋanyapinyay ŋayi ŋurikala yolŋu'‐yulŋuwalanydja, yurru ŋarranydja märr‐yuwalkthirri yukurra ŋayaŋu‐nherraṉmirri warray nhanukala. 18 Ŋarranydja dhuwala ga ŋarraku yumurrkuny'tja balanyarana bitjan nininyŋukunharana ḻuku‐nherraṉara Garraywuŋu, yolŋu'‐yulŋuwu Yitjuralpuyŋuwuna. 19 Walala wiripu‐guḻkuny'tja ŋuli waŋa bitjan warray, “Ŋilimurrunydja yurru waŋa dhä‐wirrka'yun ŋunhi galŋa‐mangaṯa'mirrinha yolŋu'‐yulŋunha ŋula nhänha warray; walala warray yurru ŋilimurruŋgunydja ḻakarama nhä yurru maḻŋ'thun yalala.” Yo, yaka yana nhuŋu manymak dhuwalinydja, ŋunhi nhe yurru waŋa rakunynhanydja yolŋunha guŋga'yunarawu walŋamirriwunydja. 20 Nhe yurru waŋanydja ŋanyapinyaynha Garraynha Godnhana yana guŋga'yunarawunydja. Mäkiri'‐witjurranydja waŋganygu nhanŋuway Garraywu yana, ga ŋäka ŋunhiyi bili ŋunhi ŋayi yurru marŋgikuma nhumalanha; yakana nhumalanha yurru ŋuriŋiyinydjayi ŋula yolthunydja guŋga'yun wo walŋakuma nhumalanha.

21-22 Yo, ŋunhiyi yolŋu'‐yulŋunydja yurru mirithirrina wal'ŋu bitjan marrya'yirri, ŋayaŋu‐yätjthirrina manapan wirrkina, bala walala yurru maŋutji‐wulamanydja walalaŋguwaynhana buŋgawanha, ga ŋanyana Godnhana; nhinanydja walala yurru yukurra ŋunhilinayi warumukŋurana ŋunhilina, gunganhara ŋurikiŋi ŋayaŋu‐yätjthinyaramirriwuŋuna, liŋgu buku‐munha'yuna yurru ŋuriŋi ŋonuŋdhuna walalanha monyguma, bala walala yurru gundupumana yukurra birrka'mirrililina, yurru yakana walala yurru winya'yundja ŋuliŋuruyi mariŋurunydja ŋunhi yurru galki bunana walalaŋgu.