1 Mäkiri'‐witjurra ŋamathaŋa, ŋarranydja yurru dhuwala miyaman manikaynha nhumalaŋgu, ga manikayyu dhiyaŋuyinydjayi yukurra ḻakarama ŋarrakuway galkiwuynha wal'ŋu yana ḻundunha ga nhanukalaŋuwuy gärulwuy. Yo, nhanŋu gärulnydja ŋunhi mirithirri wal'ŋu yana dhika dhapirrk munathany'tja. 2 Ŋayi djäma munatha' yaw'yurruna marrtjina, ga rewal'yurruna ŋunhi guṉḏanhanydja malaŋunha, yarrkmaraŋala dhapirrkkuŋala wal'ŋu yana, bala ŋayi dholkuŋalanydja wal'ŋu ḻatju'na yana dhapirrknha ŋanyana dharpanydja, borumdja dharpa ŋunhimalayi. Ga bitjarrayi liŋgu ŋayi buṉbuŋala buṉbunydja ŋunhiwalayi be‐wala yana garrwarkuŋala, märr ŋayi yurru yukurra nhäma ŋuliŋuruyi buku‐warrwarŋuru ŋunha manaŋganmirriwu yolŋuwu. Ga bitjarrayi liŋgu ŋayi djämayi mirithirri bathala batjikali ŋurikiyi borumgu weyika'wunydja, liŋgu ŋayi gatjpu'yurruna ŋunhinydja, ŋunhi ŋayi yurru guḻkthun dhapirrk wal'ŋu yana mirithirri ḻatju' borumdja ŋuliŋuruyi. Yurru yaka warray ŋunhi maḻŋ'thurruna bitjarrayinydja, bäyŋu warray; ŋayinydja ŋunhiyi borumdja ḻingarryinyaranydja ŋuthara nhäŋiniŋ'thina warray, räwakthina warray.

3 “Nhuma yolŋu walala * JerusalemDjurutjalambuy guyaŋiyana ga djarr'yurrana biyakana. Nhäku ŋunhi ŋunhayi gärul yätjthinanydja? Mak ŋarra dhuwurr‐yätj djäma bäy? Yäw, yaka warray. 4 Ŋarranydja djäka marrtjina ŋunhi ḻatju'kuŋala dhika wal'ŋu yana, liŋgu ŋarra ŋuliŋuruyinydja gatjpu'yurruna ŋunhi yurru borumdja gurarrthirri ḻatju'yirrina ŋanyana dhikana dhapirrkthirrina, yurru ŋarra maḻŋ'maraŋalanydja nhäŋiniŋ' warray ŋunhi dhipuŋuruyi.

5-6 “Ga nhaltjanna ŋarra yurru ŋarrakalaŋuwu ŋarra dhiyakuyi gärulwunydja? Ŋarranydja yurru bitjanna gam', ŋarra yurru ḏaw'‐ḏawyunna dhuwala ḻoḻunhanydja, märr yurru yakana dhiyaŋu biyapulnydja ḻoḻuyu gunganhamirriyama yukurra, bala gärulnydja ŋunhi yurru ŋuthan dhiyalayi djäkamiriwŋuranydja birrka'mirrina, ḏirriṯirri'na dhika nhäna. Yakana ŋarra yurru ŋunhiyi räwaktja baṉdja'‐baṉdja gulkthun marrtji, ga mulmu ŋarra yurru yakana nhäŋiniŋ'tja ŋula nhänydja ḏulŋurr'yun marrtji, ga yakana ŋarra yurru waltjaṉ yänguma yurr'yunarawunydja dhiyakuyi.” Ga bitjarra ŋayi Garray waŋananydja.

7 Liŋgu nhumanydja ŋunhi ŋunha † IsraelYitjuralnydja Garraywu Godku nhanŋuway gärul, ga yolŋu'‐yulŋunydja ŋunhiyinayi dharpa borumnha malanha nhanukuŋu ḻämu‐nherraṉara. Ŋayi yukurra nhäma gatjpu'yun nhanukalaŋuwu yolŋu'‐yulŋuwunydja rom‐ŋamathinyarawuna, yurru bäyŋu warray; mukthun warray nhumanydja bunharamirri yukurra, djäma ŋula nhä warray, yätj warray rom malanha. Gatjpu'yun ŋayi yukurra nhumalaŋgu yulŋunydja, nhuma yurru ŋayaŋu‐ŋamathirrina, yurru bäyŋu warray, djarrpi' warray nhumanydja djäma, ga wiripu‐guḻkuny'tja ŋäthinyaramirrina yukurra liŋgu nhumalaŋgala ŋayaŋu‐yätjkunharayu.