1 Yo, ŋuliŋuruyinydja ŋayi Garray ŋarrakala waŋana bitjarra, “* HoseaYutjiya, marrtjiya ga märraŋana ŋunhi nhuŋuway dhäykanhanydja roŋinyamaraŋana, ŋunhiyinhanydja ŋunhi ŋayi yukurra djäma marramba' ŋuli wiripu‐guḻku'wala ḏarramuwurruŋgala. Ga biyapul nhe yurru nhanŋu märr‐ŋamathirri yulŋunydja, liŋgu ŋarranydja mukthun yana märr‐ŋamathirri yukurra † IsraelYitjuralwunydja miṯtjiwu, bäyyi ŋunhi ŋayi bilyurruna ŋanydjaḻa'yurruna wiripuŋuwala be waŋarrwala, bitjarra ŋayi ŋunhiyinydja mundhurr‐wekaŋalana borum ŋula nhä malanha, buku‐ŋal'yurruna wiripuŋuwuna waŋarrwu. Yurru mukthun yana ŋarranydja nhanŋu märr‐ŋamathirri yukurra märryu‐ḏapmaranhamirriyu yana.” Bitjarra ŋayi Garray waŋananydja.

2 Bala ŋarra marrtjinanydja, ga märraŋalana ŋunhiyi miyalknhanydja ŋarrakuway, roŋinyamaraŋalana ŋarrakuwayyi ŋarra. Ŋarra wekaŋalanydja yutjuwaḻa rrupiyanydja ga ḻurrkun' ŋatha, bitjarra ŋarra roŋinyamaraŋalayi ŋunhinydja ŋanya ŋuriŋiyinydjayi, märr yurru ŋayi biyapul ŋarrakuwayyi yana. 3 Bala ŋarra waŋana nhanukala bitjarra, “Weyinŋumirri yana nhe yurru yukurra nhinanydja gänanydja wal'ŋu, liŋgu nhenydja dhulŋuŋu dhuwali ŋarrakuway; yaka nhe yurru nhina yukurra wiripuŋuwalanydja ḏarramuwala. Ga nhinanydja nhe yurru yukurra weyin yana, gänanydja nhepinydja, ga ŋarranydja yurru nhuŋu galkun yukurra baḏakthi.” Ga bitjarra ŋarra ḻakaraŋalanydja nhanbala ŋuripa ŋarrakalaŋuwa miyalkpanydja dhäykawanydja, 4 liŋgu Yitjuralyunydja yurru miṯtjiyu gonha'yunna ŋunhiyinydjayi waŋarrnha malaŋunha ŋunhi ŋayi ŋuli yukurranha buku‐ŋal'yuna ŋurikiyi, ga nhinanydja ŋayi yurru weyin yana wal'ŋu buŋgawamiriwnydja ga ŋurruŋumiriwnydja yana. Yakana ŋayi yurru wekama yukurra mundhurr ŋula yolku waŋarrwu ŋulinyaramirriyunydjayi waluyu, liŋgu bäyŋuna walalaŋgu ŋulinyaramirriyunydjayi ḏalkarra'mirri yolŋu, ga yakana walala yurru yukurra yana buku‐ŋal'yun wiripuŋuwunydja waŋarrwu goŋbuywunydja ŋunhi djämawuywu, bäyŋuna yana. 5 Yurru yalalaŋumirriyunydja ŋunhi Yitjuralnydja miṯtji yurru bilyun, gumurr‐roŋiyirrina yurru Garraywalana walalaŋgalaŋuwala Godkalana, ga ŋayinydja ŋunhinydjayi yurru buŋgawana ŋayi walalaŋgu, ŋunhi ŋayi mala‐wunharanydja beŋuru ‡ King DavidGiŋ Daypitkala.

Yo, ŋulinyaramirriyunydjayi bukmak yurru Yitjuralnydja bäpurru' miṯtji märr‐ŋal'yun nhanukalaynha yana Garraywalana; walalanydja yurru yana dhäruk‐märramana ŋanya, ga nhinanydja walala yurru galkina yana nhanukala. Ga ŋayinydja yurru walalanha bitjan goŋmirriyamana wal'ŋu dhunupana, ŋuriŋinydja waluyu ŋunhi dhä‐yawar'yunarayunydja.