1 “Yo, ŋulinyaramirriyuyi nhuma yurru yäku‐ḻakaramanydja ŋunhiyi nhumalaŋgu wäwa'mirriŋunha Yitjuralnhanydja walalanha bitjanna ‘Godkuna nhanŋuwaynha yolŋu'‐yulŋu yana’, ga wiripunydja yäku yurru ‘Goŋmirriyanhara Garraywuŋuna.’ ”

2 Yo, dhuwalanydja gay' ḻakarama yukurra * HoseaYutjiyayu nhanukalaŋuwuy ŋayi miyalkkalaŋuwuy, yurru yuwalktja dhuwalayi ḻakaramanydja yukurra mayali'na ŋayi ŋunhiyi † IsraelYitjuralnhana miṯtjinha, nhaltjarra walala gonha'yurruna Garraynha, bala wekanhamina walalanhawuy walala wiripuŋuwalana waŋarrwala. Ga bitjarra ŋayi Yutjiya waŋananydja gam'. “Way, nhuma yumurrku' ŋarraku, waŋiyana nhumalaŋguway ŋäṉḏi'mirriŋunhanydja, biyaka raypirri'yurrana gal'ŋu, liŋgu yakana ŋayi yurru biyapulnydja ŋarraku dhäyka, ga ŋarranydja yurru yakana nhanŋu dhuway'mirriŋunydja biyapul. Ḻakaraŋa nhumalaŋgalaŋuwa ŋäṉḏi'mirriŋuwanydja, ŋayi yurru gananna ŋunhiyi nhänydja malanha, marrambany'tja ŋunhi rom. 3 Ga ŋuli ŋayi yurru yaka ḏaḏawyun ŋuliŋuruyi romŋuru, ŋunhi ŋayi ŋuli wekanhamirri ŋanyapinyay ŋayi ŋuriki wiripuŋuwu ḏarramuwu, bala ŋarranydja yurru yana burrul'maramana nhanŋu girriny'tja, bukmak ŋunhi ŋayi yukurra nhä ŋayathama, bitjan ŋayinydja yurru warraŋulnha, ŋula nhämiriwnha, ga goramirrina; bitjan ŋayi yurru barka'yirrina yulŋunydja, ga räwakthirrina baṉḏanydhirrina, bitjan räwak ŋunhi wäŋa baṉḏany, ga rakunydhirrinydja ŋayi yurru ŋuriŋi ŋanhdharkthinyarayuna. 4 Yo, yakana ŋarra yurru mel‐wuyundja ŋuriki nhanukalaŋuwu yumurrku'wunydja, liŋgu ŋunhinydjayi yumurrku' wiripu‐guḻku'wuna ḏarramuwurruŋgu, yakana ŋarrakunydja, liŋgu ŋuriŋi walalaŋgala ŋäṉḏi'mirriŋuwala, ŋunhi ŋayi yukurrana djäma ŋunhiyi marramba' rom.

5 “Yo, djämanydja ŋayi mirithirri yana goramirri romdja, ŋunhi ŋayi waŋana bitjarra gam', ‘Ŋarranydja yurru marrtjina ŋunha ŋarrakalaŋuwala maŋutji'mirriŋuwalana walalaŋgala, walalana yurru ŋarrakunydja rarr'yun marrtji ŋatha ga dhika nhä weyika, ga dhika nhä malanha girri' ḻatju'mirri.’ Bitjarra ŋayi yukurrana waŋananydja. 6 Ga dhiyakuyinayi märrwu ŋarranydja yurru dhaḻ'‐dhaḻyunna dhukarrnydja ŋunhiyi nhanŋu, gunganhamirriyamana ḻoḻuyu ŋuriŋina ḏirriṯirri'mirriyuna. 7 Waṉḏirri ŋayi yurru ŋunhiyi nhanukalaŋuwu ŋayi maŋutji'mirriŋuwunydja walalaŋgu ḻarruma, yurru yakana ŋayi yurru maḻŋ'maramanydja walalanha. Bala ŋayi yurru waŋa bitjanna, ‘Ŋäthilinydja ŋunhinydja ŋarra yukurrana nhinana djulŋithina, yurru dhiyaŋunydja‐wala ŋarra yukurra galŋa‐yätjthirrina nhina, bala ŋarra yurru dhuwala roŋiyirrina yulŋunydja ŋunha ŋarrakalaŋuwalana dhuway'mirriŋuwala.’ 8 Yo, yaka ŋayi yana dharaŋaranydja wal'ŋu ŋunhi ŋunhiyinydjayi nhä malanha ŋunhi ŋayi yukurra ŋayathama ŋarrakuŋuway yana, ŋunhi ŋarrapi wetj ŋurikiyinydjayi malaŋuwu; ŋarra ŋunhinydja wekaŋala nhanŋu ŋatha ga weyika' ga mel‐wiḏi'mirri ŋunhi girri' malanha, ga ŋuriŋiyi dhapirrkmirriyu dhika wal'ŋu nhäyu malaŋuyu yana ŋayi yukurra buku‐ŋal'yun wiripuŋuwala warray waŋarrwala. 9 Bala ŋarra yurru yana djaw'yun roŋinyamaramana ŋunhiyinydjayi ŋatha ga borum, ga djaw'‐djawyundhi ŋarra yurru ŋunhi girriny'tja ŋunhi ŋarra wekaŋala nhanŋu dhapirrkmirri wal'ŋu; 10 bukmaknha yana ŋarra yurru burrul'maramanydja ŋunhi ŋayi yukurra ŋayathama, ga dhärranydja ŋayi yurru yukurra warraŋulnha yanana, goramirrina wal'ŋu ŋunha gumurrŋura ŋurikala maŋutji'mirriŋuwalanydja walalaŋgala nhanukalaŋuwala. Ga yakana yurru ŋula yolthu ŋanya märrama dhawaṯmaramanydja ŋarrakalaŋuŋurunydja goŋŋuru biyapulnydja.

11 “Yo, marrtjinyanydja walala ŋuli waŋgany‐manapanminyanydja galŋa‐djulŋithinyamirriyu dhika wal'ŋu ŋuriki guyaŋinyaramirriwunydja romgu, ga yakana biyapulnydja walala yurru waŋgany‐manapanmirri bitjandhiyi marrtji ŋuriŋi galŋa‐djulŋithinyamirriyu. 12 Ŋarra yurru baḏuwaḏuyunna borumdja ŋunhi nhanŋu dharpanha malaŋunha, liŋgu ŋayi waŋana bitjarra, ‘Dhuwalanydja borum dharpa ŋulaŋuru warray wekanhara ŋarrakalaŋuwuŋu maŋutji'mirriŋuwuŋu warray walalaŋguŋu, ŋurikiŋi warray ŋunhi ŋarra märr‐ŋal'yun ŋuli yukurra.’ Bitjarra ŋayi ŋunhi waŋananydja yukurrana, bala ŋarranydja yurru yana baḏuwaḏuyunna walalanha warrpam'thunna, ga ŋunhiwalayinydjayi dharapullili yurru marrtji ŋuthan be nhäna nhäŋiniŋ'nha dharpa, ga ŋuruŋu wakinŋuyuna warrakandhu yurru marrtji ḻuka borumdja ŋuliŋuruyi. 13 Yo, ŋuriŋi yana ŋunhi ŋarrakala dhäykayu yukurrana batharanydja buŋgan bäwny'tja, buku‐ŋal'yunarawu be ŋuriki waŋarrwu yäkuwu ‡ BaalBälwunydja; ŋayi ŋuli dhaṯthunminyanydja yukurranha be dhapirrkkunhaminya ŋanyapinyay ŋayi be mäkiri'wuyyuna girri'yu dhika nhäyuna malaŋuyu, dhapirrkmirriyuna dhikana guṉḏayu, bala ŋayi ŋuli marrtjinyanydja‐wala ḻarrunhana be nhanukalayŋuwu maŋutji'mirriŋuwuna walalaŋgu. Yo, meṉguŋalana ŋayi ŋarranhanydja, bala gonha'yurrunana ŋayi, ḏiltjina‐wekaŋala ŋarrakunydja, bala ŋarranydja yurru ŋanya dhä‐ḏir'yunna‐wala yanana wirrkina wal'ŋu.” Ga bitjarra ŋayi Garraynydja waŋana.

14 Yo, ŋayi Garraynydja waŋana bitjarra gam', “Ŋunha § IsraelYitjuralnydja miṯtji balanyarana bitjan ŋayi ŋarraku dhäykana, yurru ŋayi ŋarranhanydja meṉguŋalana, ga dhiyakuyinayi märrwu ŋarrapinydja ŋanya yurru gäma ŋunhana ŋanhdharklilina, baṉḏanylilina wäŋalili, ga ŋunhalayina ŋarra yurru ŋanya waŋanydja yukurra ŋarrakalay ŋarra wurrkurrum'thunna dhärukthunydja, märr‐ŋamathinyamirriyuna dhikana wal'ŋu. 15 Ŋarra yurru roŋinyamaramana wekama ŋunhi dhapirrktja wäŋa nhanŋu borum‐mäypamirrinydja dhika, ga biyapul ŋayi yurru märr‐roŋiyirri ŋarraku, gatjpu'yunna yurru märranharawu ŋamakurru'wuna ŋarrakalaŋuŋuru; biyapul ŋayi yurru märr‐yiŋgathirri, bala manikaynha miyaman yurru, bitjan yana liŋgu bitjarra ŋunhi ŋäthili, ŋulinyaramirriyu ŋunhi ŋayi marrtjina lili, dhawaṯthurruna beŋuru * EgyptYetjipŋuru wäŋaŋuru. 16 Yo, yalalaŋumirriyunydja ŋayi yurru biyapul ŋarranha ḻakaramanydja bitjanna, ‘Dhuway ŋarraku’, bitjanna yurru; yakana ŋayi yurru biyapulnydja ḻakarama ŋarranha ‘Buŋgawa ŋarraku,’ bitjan yurru. 17 Yo, meṉgumana yana ŋayi yurru ŋunhiyinydja be nhänhanydja wiripuŋunhanydja malaŋunha waŋarrnha, warrpam'thunna yana yurru gonha'yunna, ga yakana biyapulnydja ŋayi yurru yäku ŋanya ḻakarama.

18 “Yo, ŋulinyaramirriyunydjayi ŋarra yurru dhawu'na nherraṉ ŋurikala wäyingalana, yakana yana biyapulnydja nhe yurru burakirri wakinŋuwuŋunydja ŋunhi nhäkuŋunydja wäyinguŋu malaŋuwuŋu; yakana nhe yurru biyapul barrarirri bäpiwunydja ga ŋula nhäkunydja wiripuŋuwunydja. Ŋarra yurru warrpam'nha ḏaw'‐ḏawyunna ŋunhiyi bunharamirrinydja girri' malanha, gara ga mandjawak ŋula nhä malanha, ga yolŋunydja walala yurru yukurra nhina walŋathirrina dhikana wal'ŋu ŋoy‐yal'yunna, liŋgu yakana biyapulnydja yurru yolŋu walala marrtji bunharamirri. 19-20 Ga nhuma Yitjuralpuyŋunydja yolŋu walala yurru ŋarrakuwaynha yana dhäyka gupaḏalnha‐wala. Yuwalk yana märr‐yuwalk ŋarra nhumalanha yukurra ŋayaŋuyu‐ḏapmaramanydja, bala yana ŋarra yurru ŋayathamana yukurra nhumalanha ŋarrakalay ŋarra ŋayaŋu‐dhunupayinyarayunydja ŋuriŋi mel‐wuyunaramirriyuna yana; märr‐ŋamathinyarayu wal'ŋu yana ŋarrakalay ŋarra nhumalanha yurru märramanydja, bala nhumanydja yurru ŋarrakuwaynha walala yana wal'ŋu gupaḏalnha‐wala. Bala nhuma yurru yuwalkkumana yana wal'ŋu marŋgiyirrinydja ŋarraku, ŋunhi ŋarranydja nhumalaŋgu Garray Godnha.” Ga bitjarra ŋayi Garray waŋananydja yukurrana.

21-22 “Yo, ŋuriŋiyinydjayi waluyu ŋarra yurru ŋämana nhumalaŋguŋu bukumirriyanharawuynydja, bala ŋarra yurru djuy'yun waltjaṉnha nhumalaŋgu; ŋuriŋi waltjaṉdhu yurru dharyun yukurra dhuwala munatha' wäŋa, ga dhuwala wäŋa munatha' yurru ŋuthanna, bitjan borummirriyirrina dhikana wal'ŋu. 23 Bala ŋarra yurru dhuḏi‐nherraṉdja ŋarrakuwaynydja ŋunhi yolŋu'‐yulŋunha ŋunhiwalayina walalaŋgalay wäŋalilina, ga nhinanydja walala yurru yukurra goŋmirriyirrina dhikana wal'ŋu ŋunhili wäŋaŋuranydja. Yo, ŋarra yurru walalaŋgu mel‐wuyun yulŋunydja dhika wal'ŋu, ŋurikinydjayi ŋunhi walala yukurrana nhinana goŋmiriwŋura ŋäthili, mel‐wuyunaramiriw. Ga waŋa ŋarra yurru ŋurikinydja yolŋu'‐yulŋuwu ŋunhi walala yaka ŋarraku yolŋu walala ŋäthili, bitjanna ŋarra yurru waŋa, ‘Nhumanydja dhuwalanydja walala ŋarrakuwaynha yolŋu'‐yulŋu.’ Ga walalanydja yurru ŋunhi buku‐wakmarama bitjanna, ‘Nhenydja dhuwala ŋanapurruŋgu Waŋarr Godnha.’ ”