15
Yitjuralwu wokthunara manikay miyamanara
15:1–21 (The song of victory)
1 Bala * MosesMawtjitj ga nhanbala mala † IsraelYitjuralpuyŋu wokthurruna Garraywuna, manikaynha miyamara bitjarrana gam'.
“Ŋarra yurru manikaynha miyaman Garraywuna,
liŋgu ŋayipi djuḻkmaraŋalanydja miriŋunha;
Ŋayi warrkuḻuŋala gapulilina yarraman'nha ga yolŋu'‐yulŋunha,
warrpam' walala ŋurru‐ḻupthurrunana.
2 Garraynydja ŋarraku dhuwala ganydjarr‐wekanharamirri,
ga ŋarranha ŋayi ŋuli manikaymirriyamanydja,
liŋguna ŋayi ŋarranha walŋakuŋalana.
Yo, Garraynydja dhuwala ŋarraku Waŋarr,
ŋarra yurru wokthunna nhanŋu;
Ŋayi Waŋarrnha ŋarrakalaŋuwu mäḻu'wu,
bala ŋarranydja yurru ŋanya yäku‐ḻaw'marama garrwarkumana.
3 Yo, Garrayyu baḏuwaḏuyurruna warrpam'thurrunana miriŋunhanydja walalanha,
ga yäkunydja ŋayi biyapul wal'ŋu bathala.
4 Ŋayi warrkuḻuŋala buŋgawawunydja miriŋunha walalanha gapulilina,
bala walala ŋurru‐ḻupthurrunana bukmakthinana;
5 gapuyu ŋuriŋiyinydja walalanha liŋguna monyguŋalana,
bala walala guḻwuḻyurrunanydja bitjarrana bitjan guṉḏana.
6 Yurru ŋayi Garrayyunydja ŋanapurrunhanydja walŋakuŋala warray,
ŋuriŋi nhanukalay warray ŋayi ganydjarryu wal'ŋu;
ŋayi barrkuwatjkuŋala miriŋunhanydja walalanha nhanukalay ŋayi goŋdhu yana.
7 Garray, ŋuriŋi nhokalay ŋaramurryunydja nhe nhäranhamaraŋalana walalanha,
dhawaṯmaraŋalana yana warrpam'nha,
bitjarrana bitjan ŋuli gurthayu nhära räwak mulmu.
8 Nhe gaŋgathinyamaraŋala gapunhanydja ŋunhiyi nhokalay nhe ŋir'yunarayunydja,
bo'yurrunanydja nhe ŋunhi gapunha,
bala ŋayi guḻk‐guḻkthurrunana yana, gaŋgathinyamirriyaŋalana yana gali'lili ga gali'lili.
9 Yo miriŋunydja walala ŋunhi waŋana bitjarra,
‘Ŋarra yurru warr'‐warryun walalanha ḻundu‐ŋupan,
yana liŋgu ga mulka walalanha yurru.
Ŋarra yurru dhawaṯmarama ŋarrakuway mandjawak,
bala bumana walalanha;
rakunygumana walalanha ŋarra yurru,
dhawar'maramana ŋarrakalay ŋarra ganydjarryuna,’
bitjarra walala waŋana miriŋunydja.
10 Bala nhenydja marrtjina bo'yurruna warray watayu,
bala gapuyuna walalanha dhä‐monyguŋala;
walala guḻwuḻyurruna gapulilina ‘guḻwuḻ’ bitjarrana.
11 Wanhaka dhika wiripunydja waŋarr, balanyara bitjan dhuwala nhe Garray?
Nhenydja dhuwala ḻatju'na dhikana,
gänana nhepina wal'ŋu garrkuḻuknha,
ganaŋ'thunna yukurra.
Nhepi ŋuli ḻatju'kumanydja yukurra djäma,
liŋgu nhenydja dhuwala ganydjarr ḏumurruna wal'ŋu;
12 Yana nhe waṉa‐djarryurruna,
bala wäŋayunydja walalanha wurkthurrunana.
13 Nhe märr‐ŋamathirrinydja yukurra ŋanapurruŋgu,
bitjanna liŋguna ŋuli,
bala nhe ŋanapurrunha gäŋalana yukurrana,
mel‐warryurruna ŋamathaŋalana;
nhe ŋuli yukurra goŋ‐gulamanydja ŋanapurrunha nhokalay nhe ganydjarryu,
bala gärrinyamaramana yurru nhokalay wäŋalilinydja.
14 Yolŋuyunydja walalay ŋäkulana nhokalaŋuwuy,
bala beyaṉiyinana,
marrmarryunminana barrariyu;
15 bukmak ŋunhi yukurra nhina ‡ CanaanGaynandja wäŋaŋura bäpurru' ga bäpurru' beyaṉiyinana,
liŋgu walala ŋäkula dhäwu'na,
ŋunhi nhe nhaltjarra ŋanapurrunha djäma, guŋga'yurruna beŋuruyi.
Wirrkina walala beyaṉiyinanydja ŋäkula,
liŋgu dhiyaŋuna nhokalay ganydjarryu ḏumurruyuna wal'ŋu.
16 Dhärranydja walala yukurra yurru dharraḏana wal'ŋu,
mukthunna yana waŋganyŋurana dharapulŋura, bitjan ŋuli guṉḏa,
yana liŋgu ga djuḻkmaramana yana ŋanapurru yurru walalanha,
ŋanapurru nhokalaynydja miṯtjiyu.
17 Yo, nhenydja yurru yana gämana‐wala ŋanapurrunha,
galkaṉna yurru nhe ŋunhimalayi wäŋalili;
nherraṉdja nhe yurru ŋanapurrunha ŋunhayina bukulilina,
ŋunhimalayina ŋunhi nhe djarr'yurruna,
ganaŋ'maraŋala nhuŋuway nhe wal'ŋu nhinanharawu.
18 Garraynydja nhina yukurra ŋurruŋuna buŋgawana,
bitjanna liŋguna ŋayi yukurra yurru ŋurruŋunydja nhina dhawar'yunamiriwnha.”
19 Bitjarra walala miyamaranydja yukurrana, wokthurrunana Garraywu, liŋgu marrtjinanydja walala yukurrana ŋuliwitjarrayi‐wala gapukurrunydja baṉḏany'kurruna dhikana wal'ŋu yana, yurru ŋayi Garrayyunydja baḏuwaḏuyurruna warrpam'nha ŋunhiyi walalaŋgu miriŋunhanydja, liŋgu gapuyunydja ŋuriŋinydja dhä‐monyguŋalana walalanha, bala walala ŋurru‐ḻupthurrunana yukurrana.
20 Ga yapa'mirriŋu maṉḏaku § AaronYärungu ga Mawtjitjku, * MiriamMiriyam yäku gaŋgathina, bala ŋurru‐yirr'yurrunana giritjina, ga walala wiripuwurrunydja miyalk walala ḏurryurruna, bala giritjinana, malthurrunayi nhanbala. Bukmaknha walala giritjina, 21 ga Miriyamdja miyamara marrtjina, buŋgulkurru wokthurruna Garraywu, bitjarra ŋayi marrtjina miyamaranydja gam'.
“Go ŋilimurru miyamanna Garraywu,
liŋgu ŋayi djuḻkmaraŋala miriŋunha;
ŋayi warrkuḻuŋala gapulilina yarraman'nha ga yolŋu'‐yulŋunha,
warrpam'nha walala ŋurru‐ḻupthurrunana.”
Galimiṉḏirrktja gapu djambi ḻatju'yinana dhäkay ŋuriŋiyina dharpayu
15:22–27 (Water in the desert)
22 Ga buŋgulnydja liŋguna dhawar'yurrunana, bala yanayi walala wäŋgaŋala ŋulaŋuru gapumirriŋurunydja gali'ŋuru, bala ŋayi † MosesMawtjitjthu gäŋalana walalanha ḏuwaṯthunmaraŋalana ḏiltjililina wäŋalili. Marrtjinana walala yukurrana, marrtjinana ga‐ga‐ga‐a‐a, ḻurrkun' munhanydja ŋupara, ga yakana gapunydja ŋula maḻŋ'maraŋala ḻukanharawu. 23 Marrtjinana walala yukurrana‐a‐a, ŋanhdharknha wäŋa ŋupara‐a‐a, yana liŋgu ŋayathaŋala wäŋa nhäyikawuy ‡ MarahMära, ga ŋunhalana gapunydja walala maḻŋ'maraŋala, yurru gapunydja ŋunhi galimiṉḏirrk warray, dhäkay‐murrkthunara. 24 Bala yolŋuyunydja walalay marrtjina ŋarrtjurruna Mawtjitjnhana, gupa‐waŋana yukurrana bitjarrana, “Nhä ŋilimurru yurru ŋarkulany'tja wurkthu'‐wurkthun?” bitjarra.
25-26 Bala ŋayi Mawtjitjthunydja bukumirriyaŋala Garraynha, bala Garrayyu milkuŋala nhanukala dharpa. Bala Mawtjitjthunydja märraŋala ŋunhiyi dharpa, bala ḏupthurruna ŋunhimalayi gapulili, bala gapunydja marrtjina ḻatju'thinana dhikana dhäkaynydja, wurkthunaramirrina wal'ŋu.
Yo, ŋunhalayi gapuŋura ŋayi Garrayyu walalanha yukurrana gatjarr'yurruna bitjarrayi, ga ŋunhalayi bili ŋayi dhäruk‐nherraṉmina walalaŋgu, dhawu'mirriyaŋala walalanha bitjarra gam'. “Ŋarranydja dhuwala Garray, Waŋarr nhumalaŋgu. Ŋuli nhuma yurru mäkiri'‐witjun yukurra ŋarrakuway rirrakaywu, ga djäma rom‐dhunupa ŋarrakala milma yana, ga märrama ŋarranhawuy dhäruk yana; ŋuli yurru nhuma bitjandhiyinydja ḏälkuma ŋarrakunydja rom malanha, nhumanydja yurru nhina yukurra ŋamathamana, ga ŋarranydja yurru yakana nhumalanha rirrikmarama, bitjarra ŋarra ŋunhala rirrikmaraŋala § 15:25–26 EgyptYetjippuyŋunha. Liŋgu ŋarra dhuwala Garraynydja, walŋakunharamirri nhumalaŋgunydja, ga baḏarraŋ'kunharamirri.” Bitjarra ŋayi God Garray ḻakaranhaminanydja ŋanyapinyay ŋayi.
27 Ŋuliŋurunydja walala marrtjina yukurrana ga‐ga‐ga‐a‐a, ga wäŋa mulkana nhäyikawuy * ElimYelimbuy, ga ŋunhalanydja walala maḻŋ'maraŋala wäŋaŋura guḻku'na gapu maŋu'‐maŋutji, märrma' rulu ga märrma' bäythinyara, ga djingaryurrunanydja marrtjina ŋunhiliyi gali'ŋura gapuŋuranydja dharpa malanha guḻku'na dhika, borum‐mäypamirri dharpa malanha. Bala walala ŋunhiliyina wäŋaraŋalanydja galki gapuŋurana.