1 “Yo, ŋunhi nhuma yurru dhäruktja märrama ŋanya Garraynha, ga yuwalk gal'ŋu yana ŋayathama wal'ŋu baṯ bitjan nhanŋu rom ŋunhi ŋarra yukurra ḻakarama dhiyaŋu‐wala nhumalaŋgu, ga ŋayinydja yurru goŋmirriyamana nhumalanha biyapulnha wal'ŋu, yakana yurru wiripunydja miṯtji guḻku'yirri dhaŋaŋdhirri bitjan nhuma. 2 Märraŋa yana dhäruktja ŋanya Garraynha, bala nhuma yurru nhina ŋamathamana yukurra gal'ŋu. 3 Ŋayi yurru Garrayyunydja nhumalanha bitjan goŋmirriyama nhumalaŋgu wäŋa malanha ḻiw'marama yana, 4 ga nhumalaŋgu yurru djamarrkuḻiny'tja ŋuthan marrtji ŋamathirrina dhikana, ga wäyin malanha yurru guḻku'yirrina, mirithirrina miṯtji. 5 Ga ŋathanydja ŋuthanna yurru yukurra dhaŋaŋnha biyapulnha. 6 Ŋayipinydja yurru Garrayyunydja gäma nhumalanha goŋdhu, bitjan gunganhamirriyama ŋunhi nhe yurru wanhamala marrtji, ga lili nhe yurru roŋiyirri wäŋalili. 7 Ŋuli nhumalanha yurru marrtji miriŋuyu guwatjman, ŋayinydja yurru Garrayyunydja ŋunhiyinhana baḏuwaḏuyun warrpam'thunna yana miriŋunhanydja. Yo, miriŋunydja yurru marrtji waŋgany ŋurruk nhumalaŋgu, yurru gundupumanydja walala yurru ḻatju‐warr'yunna yana barrku'‐barrkuwatjthirrina yulŋunydja birrka'mirrililina wäŋalili malaŋulili. 8 Bitjan liŋgu ŋayi yurru Garrayyunydja ŋäthilimirriyama marrtji ŋathanydja dhika nhänydja nhumalaŋgu, ga ŋunhi nhuma yurru djäma bitjandhinydja ŋula nhä, bukmak yurru nhänydja malanha marrtji yukurra ḻatju'thirrina dhikana yana. Yo, ŋunhili wäŋaŋuranydja ŋunhi ŋayi wekaŋala nhumalaŋgu, nhuma yurru nhina djulŋithirrina dhikana wal'ŋu, galŋa‐djulŋithirrina. 9 Yo, ŋuli nhuma yurru dhäruk märrama ŋanya Garraynhanydja, ga djäma ŋunhi nhaltjan ŋayi yurru ḻakarama waŋa nhumalanha, nhumanydja yurru ŋunhi yolŋu'‐yulŋu nhanŋuwaynha wal'ŋu Garraywuna yana. 10 Bala walala yurru wiripu‐guḻkuny'tja miṯtji birrka'mirriŋura wäŋaŋura dharaŋanna bitjanna yurru, ŋunhi nhumanydja djarr'yunara galkikunhara Garraywuna yolŋu walala nhanŋuwaynha, bala yurru walala borrk‐barrarirrina yulŋunydja nhumalaŋgu.

11-12 “Yo, ŋayi yurru Garrayyu ḻapmaramana ŋunha djiwarrny'tja, ga bitjanna liŋguna dhuŋgarra‐mandhirri yurru yukurra waltjaṉdhunydja dharyun, märr yurru borum ga ŋatha ŋula nhä ŋuthan ŋamathirrina gal'ŋu yana. Yakana nhuma yurru yukurra ŋäŋ'thun wiripuŋunhanydja yolŋunha ŋula nhäku; walalana yurru nhumalanhana ŋäŋ'thundja yukurra, liŋgu nhuma yurru yukurra ŋayathama biyapulnydja guḻku' dhaŋaŋdja. 13 Wiripu‐guḻkuny'tja yurru malthun marrtji nhumalaŋguna, ga nhumanydja yurru yakana yukurra munguyun walalanhanydja. Yakana yurru nhumalanhanydja ŋonuŋguma ŋula nhäyunydja romdhu. Nhumapi yana yurru ŋapaŋuranydja, wal'ŋu yana, yaka ŋoyŋura, ga wäŋanydja nhumalaŋgu yurru dhapirrknha wal'ŋu dhikana yanana, ŋuli nhuma yurru dhärukku malthun, dhäruk märramanydja dhuwalanydja dhäruk Garraywunydja ŋunhi ŋarra yukurra dhuwala ḻakarama nhumalaŋgu gäthura. 14 Yaka gonha'yurra dhuwalayinydja dhäruk ŋula waŋgany meṉguŋa. Yaka yana bilyurra Garraywalaŋuŋurunydja ga buku‐ŋal'yurra wiripuŋuwunydja waŋarrwu.”

15 “Ga ŋuli nhuma yurru yakanydja dhärukku malthun Garraywu, yana bilyundja, bala meṉgumanydja ŋunhiyi nhanŋu rom, nhenydja yurru märrama mari biyapul'nha bathalana, birrka'mirrina yurru nhä malanha nhuŋu yätjnha maḻŋ'thun yukurra. 16 Nhumalaŋgu wäŋa yurru ḻiw'marama ga dhika nhä malanha baḏuwaḏuyunna yätjthirrina. 17 Yakana yurru ŋathanydja yukurra ŋuthan ŋunhiliyi. 18 Nhumalaŋgu yurru yumurrkuny'tja ga ŋula nhä wäyin malanha ḻurrkun'nha yana, yakana guḻku', yalŋgina yana walala yurru yulŋunydja, yakana ŋuthanara manymakkunhara. 19 Ga ŋunhi nhe yurru marrtji wanhamalanydja ŋula, ga roŋiyirri nhe yurru lili, ŋayinydja yurru ŋunhi rom‐mäypayirrina yulŋunydja ŋula nhänydja malanha, ga ŋula nhä malanha nhe yurru warkthun yurru yätjthirrina wal'ŋu yanana, liŋgu yakana ŋayi yurru Garrayyu goŋmirriyama guŋga'yun nhumalanha ŋunhimalayinydja, dhäruk‐märranhamiriwlilinydja. 20 Yo, ŋuli nhuma yurru djäma yätjkumanydja, ŋuyulkthirrinydja nyinyaŋdhundja Garraywu, ŋunhiyi yurru wäŋanydja nhumalaŋgu yätjthirrina marimirriyirrina, mari‐yakaynha yukurra yurru djingaryun. Mirithirri nhuma yurru warkthundja yukurra ŋamathanharawunydja ŋurikiyi, yurru gulkuruna; bukmak yurru ŋunhi yätjthirrina yanana yulŋunydja, yana liŋgu ga warrpam'thun yurru nhumalanha baḏuwaḏuyun. 21 Birrka'mirrina yurru yolŋunydja walala murrmurryun marrtji liŋgu rerriyu birrka'mirriyuna, yakana yurru ŋula waŋgany yolŋu yukurra walŋa nhina. 22 Yolŋu yurru rakunydhirri gorrmuryinyarayu, ga biyapul ŋulwitjthu ŋula nhäyu, ga wiripu yurru yolŋu rumbal buḻ'‐buḻyun, bala rakunydhirrina. 23-24 Yo, wäŋanydja yurru dhuwala baṉḏanydhirri ŋathamiriwyirrina, ga munathany'tja wäŋa dhuwala yurru bitjanna ḏälthirrina bitjan guṉḏa, liŋgu ŋayi yurru Garrayyu yakana yänguma yukurra waltjaṉ.

25 “Ga bitjandhiyi miriŋunydja yurru lili marrtjina, bala walala yurru bumana yukurra nhumalanha; marrtjinydja walala yurru ŋunhi miriŋunydja waŋgany yana miṯtji, ga nhumanydja yurru gundupuma baḻaka'yunna birrka'mirrililina wäŋalili barrkuwatjthirri. Bala walala yurru yolŋuyunydja nhämana ŋunhiwalayi, bala barrarirrina bitjanna ŋurikiyi yindiwunydja mariwu. 26 Murrmurryunna nhuma yurru marrtji, ga ŋuriŋi wäyindhunydja malaŋuyu nhumalanha yurru ḻukana yukurra barrwaṉ'tja rumbalnydja; yakana yurru walalanha ŋula yolthu ŋaŋ'‐ŋaŋdhundja. 27 Yo, nhumalaŋgu rumbalnydja yurru warrpam'thunna ŋäkirrmarama djetjiyuna malaŋuyu ga djiraŋ'thuna, bitjan nhuma yurru yukurra wirrkthunmirrina bitjan liŋgu, ga yakana yurru ŋula yolthu nhumalanha baḏarraŋ'kumanydja. 28 Muḻkurrnydja yurru nhumalaŋgu bitjan bawa'mirriyirrina, ga wiripu‐guḻkuny'tja nhuma yurru bamba'‐bambayyirrina marrtji. 29 Waluwuynydja nhuma yurru marrtji yukurra bitjan dhä‐ŋal'ŋalyunna dhukarrwuna ḻarruma, bitjanna bitjan ŋuli bambay yolŋu, yurru yakana nhuma yurru maḻŋ'maramanydja. Wiripu‐guḻku'yunydja yurru yolŋuyu walalay manaŋirrina djaw'‐djawyunna nhumalaŋgu nhänydja malanha, ga bitjanna liŋgu nhuma yurru ŋayaŋu‐djawaryunna yukurra gänharayu ŋonuŋdhunydja romdhu malaŋuyu, ga bäyŋuna nhumalaŋgu ŋula yol guŋga'yunarawunydja ŋurikiyi.

43 “Yo, mari bathalana nhumalaŋgu yurru marrtjinydja, ŋuli nhe yurru yakanydja dhäruk‐märrama ŋanya Garraynha. Mulkuruna yurru yolŋu nhina nhumalaŋgala yukurra wäŋaŋuranydja, ga walala yurru ŋunhiyinydja miṯtji wuṉḏaŋarrnha mirithirrina, ga nhumanydja yurru ga yalŋgi'na miṯtji. 44 Walalana yurru rrupiya‐mäypamirriyirrinydja, ga nhumanydja yurru dhäparknha nhämiriwnha; bitjanna liŋguna nhumanydja yurru yukurra ŋäŋ'thunna walalanha ŋula nhäku rrupiyawunydja, yana liŋgu‐u‐u ga walalana yurru nhumalaŋgu buŋgawamirrinydja. 45 Ŋunhiyi marinydja malanha yurru marrtjina yana nhumalaŋgu, yana liŋgu ga warrpam'thun yurru nhumalanha baḏuwaḏuyun, liŋgu nhuma yaka yukurrana dhäruk märraŋala Garraynha nhumalaŋgu Waŋarrnha, yaka nhuma ŋayathaŋala yukurrana ŋunhiyi rom ŋunhi ŋayi wekaŋala nhumalaŋgu. 46 Yolŋuyu nhumalanha yurru nhäma, bala walala yurru waŋa bitjanna, ‘Godthu walalanha yukurrana dhä‐ḏir'yurrunana, liŋgu walala gonha'yurruna ŋanya ga djäma ŋula nhä yätjnha rom.’ 47 Yo, Garrayyunydja wirrki warray wal'ŋu yana goŋmirriyaŋala nhumalanha, yurru nhumanydja yaka warray nhanŋu djälthina, yaka warray nhuma dhäruk märraŋala ŋanya ŋayaŋu‐djulŋithina; yaka nhuma djäma yukurrana nhanŋu ŋamakurru' rom. 48 Bala nhuma yurru djämanydja yukurra dhiyakuyina malaŋuwu miriŋuwuna, walalana yurru marrtjinydja, bala djaw'‐djawyunna nhumalanha bitjan djämamirrina walalaŋguway. Nhuma yurru yukurra marrya'yirrina ga ŋanhdharkthirrina, bitjan nhuma yurru nhina yukurra girri'miriwnha ŋula nhämiriwnha. Bitjan nhumalanha yurru ṉiṉ'ṉiṉmaramana marrtji ŋonuŋgumana bala ŋuriŋi romdhuna, yana liŋgu ga binydjitjthirri nhuma yurru ŋuriŋiyi.

63-64 “Yo, wirrki ŋayi yana Garraynydja ḏukṯuk nhumalaŋgu goŋmirriyanharawunydja, ga yuwalk yana ŋayi yurru nhumalanha baḏuwaḏuyundja warrpam'thun, liŋgu nhuma yaka ŋanya dhäruk märraŋala; ŋayinydja yurru nhumalanha Garrayyunydja bitjan ḻatjuwarr'maramana bena‐wala barrkulilina wäŋalili, bala nhuma yurru yukurra buku‐ŋal'yundja ŋula yolkuna wiripuŋuwuna waŋarrwu. 65-66 Yakana nhuma yurru nhina yukurra mäwaya'ŋura, ga bäyŋuna nhumalaŋguwaynydja yurru yukurra wäŋa djingaryun. Bitjanna liŋgu nhuma yurru yukurra nhina galŋa‐yätjthirrina dhaŋgaḏirryunna nhäyu malaŋuyu romdhu. 67 Bitjanna liŋgu walu ŋupan ga munha ŋupan nhuma yukurra yurru barrarirrinydja nhina nhäku malaŋuwu, bitjan nhuma yurru marrmarryunmirrina barrariyunydja, ga ŋayaŋunydja yurru nhumalaŋgu ḏuŋ'ḏuŋdhunna wilwilyunna barrariyunydja ŋunhi nhe yurru ŋula nhä nhämanydja.”