1 Yo, ŋäka nhumanydja ŋunhi ŋaḻapaḻmirri yolŋu walala, nhumanydja dhuwala balanyarana biyaku ŋuli buliki' ŋunhi gandarr‐ḏumurru, yaḻmanga'‐ḏumurru ḻukanhara mirithinyara gal'ŋu, yurru nhuma ŋayaŋu‐yätjkuma yukurra muŋdhunna ŋunhi ŋurruwuykmirrinhanydja yolŋu'‐yulŋunha ga goŋmiriwnhanydja ŋunhi, ga waŋa nhuma ŋuli bitjan, “Go, gäŋa lili ŋanapurruŋgu ŋänitji ḻukanharawu yukurranharawu. Go ŋilimurru ḻukana.” 2 Yo, Garraynydja ŋunha Godtja ḏarrtjalk wal'ŋu gäna yana ŋayipi, ga dhawuny'tja ŋayi nherrara bitjarra gam'. “Galkina ŋayi yurru miriŋunydja lili marrtjina ŋurruthirrina yana, bala gaṯmarama ŋurrulilina nhokala nherraṉ yurru bikaŋ'thinyarana, bitjanna bitjan ŋuli walala nherraṉ buliki'wala ŋurrulili warryu'‐warryunarawu bala. 3 Ga bitjandhiyina walala yurru nhumalanhanydja warryun nhumalaŋgalaŋuŋuru be ḻatju'ŋurunydja dhikanydja wäŋaŋuru, bala ḏupthunna nhumalanha ŋunhana dhawaṯmaramana, warraŋullilina ḏupthun wäŋaŋuru ŋuliŋuruyinydjayi.” Ga bitjarra ŋayi Garray waŋananydja.

4 Bala ŋayi Garray waŋana bitjarrana, “Yo manymak! Gatjuy martj‐martjtjurrana walala, ga djämana‐wala nhokalaynha djälkurru yanana. Ŋunhi nhe djälnydja, marrtjiya ŋunha ya' * BethelBithullili ga djäma yätjnha, ga wiripunydja biyaka bala † GilgalGilkallili wäŋalili marrtjiya, bala buku‐ŋal'yurra ŋunhilinayi ŋuli nhuma djälnydja; biyakana liŋgu mukthurrana‐wala yana yukirriya bukulili ŋal'‐ŋalmaraŋana yätjtja malanha nhumalaŋguway nhuma. 5 Yo, bitjanna liŋgu walu‐ŋupanna nhuma ŋuli märr‐yuḏakthunminyanydja, bitjanna bitjan nhuma ŋuli mundhurr‐wekanha Godku. Wiripunydja nhuma ŋuli guḻk‐guḻkthunna barrkuwatjkunha 10‐gunha, bala nhuma ŋuli gänhana Godkuna ŋunhiyinydja, yurru yäna ŋunhiyi yulŋunydja milkunhaminyara, märr yurru nhuma yukurra ŋurr'yunna ŋuriŋi malaŋuyu, nhä ŋuli nhuma wekanha be Godku. 6 Yo, balanyarayinydja rom nhumalaŋguway yana, ga dhiyakuyinayi märrwu ŋarra baṉḏany'kuŋalanydja dhuwala wäŋanhanydja, bala nhuma marrtjina marrya'yinana, liŋgu bäyŋuna ŋatha dhiyalaŋumi. Yurru yaka warray nhuma bilyurrunanydja lili roŋiyinanydja ŋarrakala.” Bitjarra ŋayi Garraynydja waŋana.

7 “Yo, ŋarra ŋunhiyinydjayi ḏaḏawmaraŋala waltjaṉnhanydja, märr yurru ŋayi ŋatha räwakthirri baṉḏanydhirri, ŋathamiriwyirri wäŋa. Ŋunha wiripuŋuŋuranydja wäŋaŋura dharyurruna marrtjina waltjaṉdhu, ga wiripuŋuŋuranydja wäŋaŋura bäyŋu. Yo, wiripu wäŋa gapumirriyinanydja, ga wiripunydja räwaknha waṉḏirri mulmunydja baṉḏanynha, bala nhumanydja bitjarra yalŋgi'yinana. 8 Guḻku'na mirithinana yolŋunydja walala marrtjina ŋunhimalayi gapumirrililinydja wäŋalili, yurru yaka ŋunhiyi gana' gapu bukmakkunydja yolŋu'‐yulŋuwu; yaka weyindja ŋunhi gapu, bala dhawar'yurrunana, ga bukmakthinana ŋunhiliyi yolŋunydja walala ŋanhdharkthinana. Yurru mukthurruna yana yaka nhuma bilyurruna ŋarrakalanydja lili roŋiyina.” Bitjarra ŋayi Garray waŋananydja.

9 “Dhäŋuru ŋuliŋuruyinydjayi ŋarra djuy'yurruna biyapul wal'ŋu bathala wata, bo'yurruna yukurrana dhika mirithirri wal'ŋu gorrmur, bala baṉḏany'kuŋalana räwakkuŋalana ŋunhi borumdja. Ga wiripunydja malanha borum dhä‐ḻukanharana ḏetjkuŋuna dhika nhäkuŋuna malaŋuwuŋu, yurru nhumanydja, yaka yana nhuma märr‐roŋiyina ŋarrakala. 10 Ga beŋurunydja rerrina marrtjina nhumalaŋgu, bitjarrana bitjarra ŋunhi ‡ EgyptYetjipuyŋuwala ŋarra djuy'yurruna ŋäthili gal'ŋu, birrka'mirrina nhä malanha rerri. Nhumalaŋgu yuḏayuḏanydja ḏarramuwurru marrtjina burakina mariŋurana, ga nhumalaŋgu yarraman'tja mala gundupuŋala bena‐wala winya'‐winyayurrunana, ga wäŋanydja ŋunhi yukurrana djingaryurruna barrpa'‐yakaynha dhikana, liŋgu ŋuriŋinayi rakunymirriwalana. Yurru nhumanydja mukthurruna warray yana marrtjina ḻäy‐ŋarr'ŋarr nhumalaŋgalay djälyu yana‐wala, yaka warray nhuma lili bilyurruna ŋarrakalanydja.” Bitjarra ŋayi Garray waŋananydja.

11 “Yo, ŋarra buḻwaŋ'thunmaraŋalana nhumalaŋgu buṉbu‐mäypamirrinydja ŋunhinydja wäŋa malanha, bitjarra yana liŋgu bitjarra ŋarra baḏuwaḏuyurruna buḻwaŋ'thunmaraŋala ŋunhi yätj wäŋa § SodomDjudum ga * GomorrahGumura be baman'. Nhuma bini bukmakthinya muka murrmurryunanydja, yurru märr‐ḻurrkun'nha walŋamirrinydja marrtjina ḏäpthurruna, yurru nhumanydja mukthurruna warray‐wala yana marrtjina nhumalaŋgalay warray dhukarrkurru, nhäŋiniŋ'kurru warray, ga yakana yana nhuma yurru lili roŋiyirrinydja ŋarrakala biyapulnydja. 12 Ga dhiyakuyinayi märrwu ŋunhi ŋarra yurru dhä‐ḏir'yundja nhumalanha mirithirri wal'ŋu yana. Nhuma † IsraelYitjural, biyaka girri'‐ŋamathiyana walala nhiniya; galkina dhuwala yulŋunydja nhuma yurru dhärra gumurrŋurana nhanukala Godkala dhä‐wirrka'yunarawuna yukurranharawu, ga yakana nhuma yurru winya'yun dhä‐ḏir'yunaramiriwnydja walala.” 13 Liŋgu ŋayinydja ŋunhinydja biyapul warray wal'ŋu, ganydjarr‐ḏumurru warray ŋayi. Ŋayi djäma ŋunha bukunydja wäŋa, ga bitjandhi liŋgu ŋayi ŋuli djuy'yundhi wata ḏälnydja ŋunhi wärrkthinyaranydja. Ŋayinydja marŋgi warrpam'thun yolŋuwu guyaŋinyarawuywunydja, nhaltjan ŋayi ŋuli yukurra guyaŋirri ŋayipi gayul. Ŋuriŋi nhanukalanydja ganydjarryu wal'ŋu walunydja yurru bitjan munhayirrina, ga djalkirina‐nherraṉmirri muŋdhu'‐muŋdhunna ŋayi yurru ŋunhinydja yolŋu'‐yulŋunha ŋunhi walala ŋuli ḻakaranhamirri walalawuynha walala be walala garrwar wal'ŋu, ŋunhinhanydja walalanha ŋayi yurru muŋdhu'‐muŋdhunna dhikana warrpam'thunna. Liŋgu ŋayi yäkunydja Garray God, Ganydjarr‐ḏumurru wal'ŋu Waŋarr, ga ŋayi ŋunhi Garraynydja Ŋurruŋunydja wal'ŋu ŋuruku djiwarr'wuywunydja yolŋu'‐yulŋuwu.