37
Nhäyinyarana yurru ŋunhi maḻŋ'thun dhuwurr‐yätjku ga dhuwurr‐ŋamakuli'wu
37:1–40 (What will happen to the wicked and the good)
1 Yaka walala galŋa‐yätjthiya ŋunhi nhe yurru nhäma yätjmirrinha
ŋunhi yolŋunha walalanha gal'ŋu,
ŋunhi walala yurru marrtji ḻuŋ'marama ŋula nhä malanha, dhaŋaŋ mirithirri walalaŋguway.
2 Galki yurru ŋunhiyinydjayi yätjmirrinydja gal'ŋu yolŋu walala bäyŋuthirrina,
bitjanna bitjan mulmu ŋunhi ŋayi yurru yana gurriri dhärra,
bala ŋayi yurru räwakthirrina marrtji rakunydhirrina.
3 Yana märr‐yuwalkthiya, märr‐nherraṉmiya Godkala yana,
ga djäma ŋamathaŋana wal'ŋu,
bala yurru nhe nhina dhiyalanydja wäŋaŋura goŋmirrina dhikana,
märr‐walŋathirrina ŋuliŋurunydja yätjŋurunydja romŋuru.
4 Yo, djulŋithiyanydja nhanukalay Garraywala yana waŋganygala,
ga ŋayinydja yurru nhuŋu wekamana ŋunhi nhäku nhe yukurra ŋayaŋu ḏukṯukthirri.
5 Yana dhayuŋanna nhe yurru nhuŋuway rom ŋayaŋu‐ŋonuŋdhinyaramirrinydja ŋunhinydja Garraywalana goŋlili wekaŋa,
ga märr‐nherraṉmiya nhanukalay yana,
bala ŋayipina yurru djämanydja yukurra, guŋga'yundja nhuna.
6 Yo, ŋayipina yurru djämanydja dhika wal'ŋu,
märr yurru birrka'mirriyu yolŋuyu nhämanydja mälkumana warraŋulkumana wal'ŋu,
ŋunhi nhenydja ŋunhiyinydja märr‐yunupa yolŋu, yaka ŋula nhä.
7 Yana galŋa‐mundurrthiya nhiniya yukirriya Garraywala galki,
ga galkurra yukirriya ŋayaŋu‐witjunmiya nhanŋuway,
bala ŋayipina yurru djämanydja marrtji.
Yaka galŋa‐yätjthiyanydja ŋurikala rom‐yätjkalanydja yolŋuwala,
ŋunhi ŋayi ŋuli nhina yukurra nhanukalay ŋayi nhäyu malaŋuyu guḻku'yu;
Ga yaka warwuyurra ŋurikinydja ŋunhi ŋayi yurru dhuwurr‐yätjthu yolŋuyu nherraṉ dhukarr yätj gal'ŋu.
8 Yaka nhenydja warwuyurra yukirriya ŋula nhäku,
ga yakana ŋayaŋu‐yätjthiya ga maḏakarritjthiya,
yana gonha'yurrana ŋunhiyi ŋaramurrthinyaramirrinydja romnha,
liŋgu ŋuriŋiyinydjayi romdhu yukurra gäma ŋunhana‐wala marimirrililina romlili.
9 Yo, ŋayipinydja Garrayyunydja yurru ŋunhinydja yätjmirrinhanydja yolŋu'‐yulŋunha gukumana‐wala, yarrkthunmarama yurru,
ga dhuwalanydja wäŋa yurru yukurra dhärra ŋurikina walalaŋgu ŋunhi walala yurru märr‐nherraṉmirri yukurra nhanukala gal'ŋu Garraywala yana.
10 Yo, galkina ŋunhinydja yolŋu dhuwurr‐yätjmirrinydja yurru yana winya'yunna‐wala;
Nhäma'‐nhamanydja nhe yurru yana marrtji dhuwala wäŋanydja,
yurru yakana ŋayi yurru dhiyalanydjayi ŋunhiyinydja dhuwurr‐yätjtja yolŋu.
11 Liŋgu dhuwalanydja wäŋa ŋurikina walalaŋgu wal'ŋu yolŋu'‐yulŋuwu ŋayaŋu‐wurrkurrum'mirriwuna,
walalana yurru yukurra nhina dhiyalanydja wäŋaŋura goŋmirriyirrinydja,
märr‐ḏaw'yunna bitjanna yurru nhäyu malaŋuyu ŋamakurru'yunydja.
12 Yo, ŋuriŋinydja dhuwurr‐yätjthunydja yolŋuyu ŋuli buku‐nherraṉ ŋaramurryirri ŋurikinydja yolŋuwu dhuwurr‐ŋamakurru'wunydja,
dhukarrnydja ŋayi ŋuli nherraṉ yana galkinyamaranharawu nhanŋu ŋuriki rom‐dhunupawu yolŋuwu.
13 Yurru ŋayipinydja Garraynydja ŋuli ŋunhi beyarrmakthirrina ŋurikalanydja ŋunhi dhuwurr‐yätjkalanydja yolŋuwala,
liŋgu ŋayinydja marŋgi ŋunhi galki yurru dhuwurr‐yätjtja ŋunhinydja yolŋu baḏuwaḏuyunna warrpam'nha.
14 Yo, ŋayinydja ŋunhi dhuwurr‐yätjtja yolŋu yukurra dhärra goŋ‐garamirrina,
gumurr‐ŋamathirrina ŋurikina yolŋuwu bunharawu murrkay'kunharawu dhuwurr‐ŋamakurru'wuna.
15 Ga ŋuriŋiyinydja garayu ŋayipina yurru ŋunhina liŋgu burakirrinydja mar'yunarapuyŋuna,
ga ŋunhiyi garanydja yurru bakthunna, ḏaw'yunna.
16 Mak ŋuli ŋayi ŋuriŋi rom‐dhunupayunydja yolŋuyu ŋayathama yukurra märr‐ḻurrkun' yana girri' malanha,
ga ŋuriŋiyi märr‐lurrkun'thunydja ŋayi yurru yana märr‐ḏaw'yunna.
Ga ŋayinydja dhuwurr‐yätjthunydja yolŋuyu yukurra ŋayathama be‐warray girri',
buku‐yattjatthirri warray yukurra nhanŋunydja,
yurru yakana ŋayi yurru ŋuriŋi märr‐ḏaw'yundja.
17 Liŋgu Garrayyunydja ŋayipinydja yurru ŋunhi bak‐bakmaramana ganydjarr ŋurikinydja dhuwurr‐yätjkunydja,
ga walalana yurru ŋunhi yalŋgi'yirrinydja,
bala ŋayi yurru gunganhamirriyamanydja ŋunhinayi rom‐ŋamakurru'nhana yolŋunha,
ganydjarr‐wekamanydja marrtji.
18 Garraynydja ŋuli djäka muka marrtji ŋurikinydja yolŋuwu ŋunhi ŋayi ŋuli marrtji nhanukalay yana dhukarrkurru ḏarrtjalkkurru,
ga ŋunhiyi nhä malanha wekanhara Godkuŋu nhanukuŋuway yurru ŋunhiyinydja ŋuriki dhäruk‐märranharamirriwu yolŋuwu gupaḏalnha‐wala yana.
19 Ŋunhi yurru dhuwalanydja wäŋa yukurra dhärra marimirrinydja,
ga walala yurru rom‐dhunupamirrinydja ŋunhinydja yolŋu'‐yulŋu nhina yukurra ŋamathamana dhikana wal'ŋu;
Ḻuka walala yurru marrtji ŋatha, ŋunhi yurru ŋayi wäŋa ŋathamiriwyirrinydja.
20 Ga walalanydja yurru ŋunhinydja rom‐yätjtja yolŋu walala marrtji murrmurryunna;
Yo, ŋunhiyinydja walala ŋunhi walala ŋuli ŋurru‐nyinyaŋdhun ga ŋapa‐wekama Godku,
walalanydja yurru yana wiḏi'‐wiḏiyunna‐wala,
bitjanna bitjan ŋawulul' ŋunhi ŋuli wiḏi'yun.
21 Dhuwurr‐yätjtja ŋunhinydja yolŋu, ŋayinydja ŋuli bitjan warray liŋgu ŋäŋ'thun nhina, rrupiya warray yana gombuma,
ga yakana ŋayi ŋuli buku‐ruŋinyamarama, bäyim balanydja.
Ga ŋayinydja ŋunhinydja yolŋu rom‐dhunupanydja, dhapinya warray ŋayinydja,
yänana ŋayi ŋuli marrtji wekamanydja ŋuriki wiripu‐guḻku'wunydja.
22 Liŋgu ŋunhinydja walala ŋunhi walala Godkuŋu goŋmirriyanharawuy,
walala yurru ŋayathama wäŋa walalaŋguwaynha,
ga ŋunhinydja yolŋu ŋunhi ŋayi yukurra ŋuyulkthirri Godku,
ŋayinydja yurru ŋanya yana djuy'yunna‐wala, bena‐wala waṉḏinyamaramana;
Yakana ŋayi yurru märrama yukurra ŋula nhä nhanukuŋunydja Garraywuŋunydja.
23 Yo, ŋayipi Garrayyunydja gäma marrtji ŋurru‐warryun ŋayipi yolŋunhanydja,
märr yurru ŋayi yukurra marrtji ŋuliwitjandhi ŋamakurru'kurru‐wala dhukarrkurru yana;
Gunganhamirriyama warray ŋayinydja ŋuli Garrayyunydja ŋunhinydja yolŋu'‐yulŋunha,
ŋunhi walala ŋuli ŋayaŋu‐djulŋikuma ŋanya.
24 Wiripunydja ŋuli yolŋu ŋunhiyi galkirri,
yurru yaka ŋayi yurru ŋorra yukurra gupaḏalnydja ŋunhiliyi,
liŋgu ŋayipi Godthunydja yurru ŋanya ŋunhi märrama gaŋgathinyamirriyama, dhärranhamarama nhanukalaynydja ŋayi goŋdhu.
25 Yo, ŋarranydja dhuwala worruŋuna ŋarra yolŋu, nhinananydja ŋarra yukurrana weyinŋumirri,
yurru yaka ŋarra nhäŋala ŋunhi ŋayi Garrayyu gonha'yurrunana dhuwurr‐dhunupanha yolŋunha,
ga yaka ŋarra yana nhäŋala yumurrku'nha ŋuriki rom‐dhunupamirriwu yolŋu'‐yulŋuwu marrya'wuynydja nhinanhara, ŋäthinyara ŋula ŋathawunydja.
26 Liŋgu ŋayinydja ŋuriŋinydja rom‐dhunupayu yolŋuyu bitjan warray liŋgu ŋuli marrtji maranhu‐wekama yana yolŋu'‐yulŋuwunydja,
ga nhanŋu ŋunhi yumurrkuny'tja nhina yukurra goŋmirriyinana yana walala.
27 Yo, gonha'yurrana dhuwali yätjtja rom, ga nhiniya ŋamathaŋana,
liŋgu ŋuliwitjandhinydjayi gatjaḻkurru nhe yurru nhina ŋunhalanydja Godkalanydja wäŋaŋura gupaḏalnha‐wala yanana.
28 Liŋgu Godtja märr‐ŋamathirri yukurra ŋuli nhä ŋunhi ŋamakurru' wal'ŋu ga dhunupa,
yaka ŋayi yurru ŋapa‐nherraṉmirri nhanukalayŋunydja ŋayi yolŋu'‐yulŋuwu.
Märr‐yuwalk yurru yana ŋunhinydja yolŋu'‐yulŋu rom‐dhunupamirrinydja nhina yukurra walŋana gunganharaŋurana gupaḏalnha‐wala yanana.
Ga ŋunhinydja mala‐wunhara rom‐yätjkuŋunydja ŋurikiŋinydja,
walalanhanydja yurru ŋupanna, bena‐wala yana yarrkmaramana.
29 Yo, dhuwalanydja gay' wäŋa yurru yukurra djingaryun ŋurikina yana walalaŋgu rom‐dhunupamirriwuna,
ga walalana yurru yukurra nhinanydja dhiyalanydja gupaḏalnha‐wala yana.
30-31 Yo, rom‐ŋamakurruny'tja yolŋu ŋuli waŋa be dhunupa dhäruk ga djambatj,
liŋgu ŋayi yukurra ŋayathama rom Godkuŋu ŋunha ŋayaŋuyu nhanukalay,
ga yakana ŋayi bilyun yurru gatjpaḻ'yun, ga galkirri.
32 Ŋayi ŋuli rom‐yätjthunydja yolŋuyu guyaŋirri yukurra,
wanhawitjan dhukarrkurru ŋayi yurru gatjpaḻ'yunmarama ga buma ŋunhi rom‐ŋamakurru'nha yolŋunha.
33 Yurru Garrayyunydja ŋayipinydja yakana yurru ŋanya ganan ŋunhiwalayi miriŋuwalanydja goŋlili.
Ga ŋuli walala yurru gäma ŋunhi rom‐dhunupanha yolŋunha bala dhä‐wirrka'yunarawunydja,
yakana walala yurru waŋa yätj‐ḻakaramanydja ŋanya ga dhä‐ḏir'yundja.
34 Galkurra yana mukthurra, dhukarr‐nhäŋa yukirriya bulnha Garraywunydja,
ga dhäruk marrtjiya märraŋa ŋanya Garraynha,
bala ŋayinydja yurru märr‐ŋal'yunna nhokala, ga wekama wäŋanydja nhokalana goŋlili,
bala nhe yurru nhämana ŋunhi rom‐yätjmirrinhanydja yolŋunha baḏuwaḏuyunarana.
35-36 Yo, nhäŋala ŋarra rom‐yätjnhanydja yolŋunha, ŋayi yukurrana nhinana buŋgawana ŋayi wirrkina wal'ŋu,
ga yalalaŋumirriyunydja ŋunhi ŋarra ḻarruŋalanydja nhanŋu nhäŋalanydja,
bäyŋuna ŋarra maḻŋ'maraŋalanydja ŋanya,
yana ŋayi winya'yurrunana buwayakthinana‐wala.
37 Nhäŋa ŋunhi ya' rom‐dhunupanha yolŋunha.
Nhinanydja ŋayi yukurra ŋayaŋu‐wurrkurrum'thirri yana,
ga djamarrkuḻi'‐mäypamirri ŋayi ŋunhi yolŋunydja.
38 Ga dhuwurr‐yätjmirrinhanydja, ŋayi yurru baḏuwaḏuyunna‐wala warrpam'thunna yana,
ga bitjandhi liŋgu djamarrkuḻi'nhanydja nhanŋu baḏuwaḏuyundhi yurru‐wala.
39 Yo, Garrayyu yurru walŋakumana ŋunhinydja rom‐dhunupamirrinhanydja yolŋu'‐yulŋunha,
bitjan ŋayi yurru gunganhamirriyama ŋuriŋinydja waluyu marimirriyunydja.
40 Ŋayi yurru guŋga'yun warray nhanŋuwaynydja yolŋu'‐yulŋunha,
ga märrama ŋayi yurru walalanha dhawaṯmarama ŋuliŋuru goŋŋuru miriŋuwalanydja,
liŋgu walala ŋuli marrtjinydja nhanukalaynha Garraywalana yana ŋurrwu'lilinydja,
ga ŋayina walalanha yurru yukurra gunganhamirriyamanydja.