32
Milkunharaminyarana Garraywala
32:1–11 (Confession and forgiveness)
1 Yolŋu yurru galŋa‐djulŋithirrinydja yukurra nhina,
ŋunhi nhanŋu yätjpuynydja dhuwurrwuy liŋguna buwayakkunharana.
2 Yo, ŋunhi yurru Garrayyu nhämanydja nhuna, bala ŋayaŋu‐dhunupa ḻakaramana,
nhenydja dhuwala yolŋu yuwalknha wal'ŋu yurru galŋa‐ŋamathirrina.
3 Märr‐yawungunydja ŋarra rom‐yätjthinya,
bala djuḻuḻ'maranhana ŋarrakuway yätjtja rom;
yakana ŋarra milkunharaminya ḻakaranhaminya Garraywala.
Bala ŋarra galŋa‐yätjthinana,
ŋäthinana yukurrana bitjarrana liŋguna.
4 Walu‐ŋupara ga munha‐ŋupara ŋarra dhäkay‐ŋänharaminanydja baṉḏanynha, ganbarknha,
bitjan ŋuli wäŋa räwakthirri ŋuriŋiyi waluyu.
5 Bala ŋarra guyaŋina bitjarra,
“Yakana ŋarra yurru djuḻuḻ'maramanydja;
Ḻakaranharamirrina yurru ŋarra Garraywalana ŋarrakuway yätjtja rom.”
Bala ŋarra wekanhaminana nhokala, Garray,
bala nhe ŋarraku bäy‐ḻakaraŋalana,
buwayakkuŋala yätjtja ŋarraku rom.
6 Yo. Ŋunhi ŋilimurru yurru galŋa‐yätjthirri ya', ga bitjan buku‐warwumirriyirri,
ŋilimurrunydja yurru yana bukumirriyamana Garraynha, ḻakaranhamirrina nhanukala;
Yakana yurru ŋula nhäyu ŋilimurrunha mulkanydja,
ŋunhi ŋilimurru yurru yukurra djuḻuḻ'yundja nhanukala ŋurrwu'ŋura.
7 Garray, nhenydja ŋurrwu ŋarraku,
ŋarra yurru ŋurrwu'yundja nhokala muka,
ga walŋakuma nhe ŋuli ŋarranha ŋula nhäŋuru romŋuru.
Ŋarra yurru miyaman manikay,
wokthun ŋarra yurru nhuŋu manikaykurru,
liŋgu nhe ŋuli ŋarraku watjarr‐mulkanydja.
8 Garraynydja waŋa yukurra bitjanna,
“Ŋarra nhuna yurru gäma marrtji bala,
marŋgikuma marrtji,
märr yurru nhe marrtjinydja dhukarrkurru dhunupakurru yana.
9 Yaka nhenydja ḏalwurthiya, bitjan ŋunha yarraman' ya'.
Yarraman'tja ŋuli marrtjina‐wala nhanukalay ŋayi ḏukṯukthu,
bala yana yolŋuyuna ŋuli bilyu'‐bilyunmaramanydja ŋanya raki'yuna,
märr yurru ŋayi marrtji dhunupakurru dhukarrkurru.
Yaka nhenydja biyakayi ḏalwurthiya,
yana nyilŋ'maranhamiya nhepi, ga malthurra marrtjiya nhanŋuway Garraywu ḏukṯukku.”
10 Yätjmirrinydja yolŋu'‐yulŋu ŋuli wirrkina warwuyunmirri, galŋa‐yätjthirri manapan.
Ga ŋunhinydja walala yolŋu'‐yulŋu ŋunhi walala ŋayaŋu‐nherraṉmina Garraywala,
walalanhanydja yukurra ḻiw'marama monyguma nhanukalay ŋayi märr‐ŋamathinyarayuna.
11 Go nhuma ŋayaŋu‐dhunupamirrinydja, ŋayaŋu‐djulŋithiyana,
märr‐yiŋgathiyana Garraywala go wirrkina;
Ŋilimurru nhanbalanydja malthumaramirri walala,
wokthunna nhanŋu ŋayaŋu‐djulŋithinyarayuna,
märr‐yiŋgathirrina wirrkina go.