20 Yo. Ŋuliŋurunydja dhurrwaraŋuru ŋunhi ŋayi wekaŋala rom malanha * 23:20 MosesMawtjitjkala, Garrayyu waŋana djäkakuŋala, raypirri'yurruna bitjarra, “Liŋguna ŋarra djuy'yurruna djiwarr'wuynha watjarr‐mulkanharamirrinhanydja, ŋayi yurru marrtji ŋurru‐warryundja nhumalanha, yana liŋgu nhuma yurru gärri ŋunhawala wäŋalili ŋunhi ŋarra nhumalaŋgu ŋäthilimirriyaŋala. 21 Mäkiri'‐witjurra nhanŋu, ga märraŋana ŋanya dhäruktja. Yaka raypirri‐waḏatjthiyanydja nhanŋu, liŋgu ŋayinydja yurru yakana gonha'yun nhuna nhäma yätjlili romlili, liŋgu ŋarranydja yäku nhanukalaŋga. 22 Ŋuli nhuma yurru mäkiri'‐witjun marrtji nhanŋu dhärukku gurrum'thun, ga djäma nhaltjan ŋarra yurru waŋa, ŋarranydja yurru nhumalaŋgala bitjanna liŋguna, bumana yurru marrtji miriŋunhana ŋunhi walala yurru miriŋuyirrinydja nhumalaŋgu.

23 “Ŋe. Dhuwalayi djiwarr'wuy watjarr‐mulkanharamirrinydja marrtji yukurra nhumalanha ŋurru‐warryun, gämanydja ŋayi yurru yukurra nhumalanha, ga gärrinyamaramana ŋunhamala wäŋalili. Yurru ŋunhilinydja wäŋaŋura nhina yukurra wiripuna ga wiripuna bäpurru', † 23:23 AmoritesYamarpuynha ga ‡ 23:23 HittitesYitpuynha ga § 23:23 CanaanitesGaynanbuynha, ga wiripu ga wiripu bäpurru', bala ŋarranydja yurru marrtji walalanha buwayakkumana warrpam'nha. 24 Yaka yana nhuma yurru bun'kumu‐djipthurra ga buku‐ŋal'yurranydja walalaŋgalaŋuwala waŋarrwalanydja, ga yaka djäma dhuḏakthurra walalaŋgunydja rom. Yana nhuma yurru ḏaw'‐ḏawyurrana walalaŋgu waŋarrnhanydja walalanha ŋunhi walalaŋgiyinguŋunydja djämawuy goŋbuy, ga biyakayi bili ḏaw'‐ḏawyurra dharpanydja ga ŋula nhänydja guṉḏa ŋunhi walala ŋuli marrtji nherraṉ walalaŋgiyingala dhuyulili wäŋalili.

25 “Yo, ŋuli nhuma yurru buku‐ŋal'yun yukurra ŋarrakuwaynydja waŋganygunydja yana, bala ŋarranydja yurru nhumalanha wekamana yana ŋathayu ga ŋarkula'yu, ga bitjandhi bili ŋarra yurru rerrinydja djaw'yun nhumalaŋgala, bäyŋukumana. 26 Ga nhumalaŋguŋu yothuny'tja dhawal‐wuyaŋirri yukurra yurru ḻatju'mirrina, yakana yalŋgi'mirri, ga yakana nhuma yurru goŋ‐yätjthirri yuṯawunydja yothuwu. Ga walŋana nhuma yurru nhina wal'ŋu weyinnha. 27 Ga ŋunhi yurru miriŋu nyäṉ'thun nhumalaŋgu, ŋarranydja yurru barrari‐wekama walalanha, goḏuywumana, bala walalanydja yurru gundupumana nhumalambala. 28 Walalanydja Gaynanbuynydja miṯtji ga Yitpuynydja miṯtji ga wiripu‐guḻku' bäpurru' ŋunha nhinana walala yukurra nhumalaŋgala wäŋaŋuranydja, bala ŋarranydja yurru walalanha ŋupan dhawaṯthunmaramana. 29 Ŋarranydja yurru nhumalaŋgala walalanha goŋ‐war'warmaramana, bala nhumana yurru warr'warryundja walalanha. Yurru yaka ŋarra yurru miriŋunhanydja walalanha gukuma dhawaṯmarama ŋuriŋinydja bili waŋganydhunydja waluyu, 30 yana ŋarra yurru gukumanydja marrtji miṯtjinha waŋganynha ŋäthili, ga biyapul wiripunha miṯtjinha, bitjanna yurru ŋarra marrtji bala walalanha guku'‐wukumanydja dhawaṯmaramanydja, märr yurru nhumana ŋunhiyi wäŋanha dhaŋaŋguma. 31 Ŋarra yurru wekama bukmaknha yana miriŋunhanydja goŋlili nhumalaŋgala, ga nhumana yurru walalanha gukuma dhawaṯmaramanydja.

32 “Yakana nhuma yurru dhawu'‐nherraṉmiya wiripuŋuwala bäpurru'wala, mulkuruwalanydja miṯtjiwala; yakana nhuma yurru nhina yukurra waŋganyŋura walalaŋgala, ga yakana yurru nhuma märr‐ŋal'yurra mulkuruwalaŋunydja waŋarrwala. 33 Walala yurru ŋunhiyi mulkurunydja miṯtji yolŋu yakana nhina nhumalaŋgala wäŋaŋura ŋarakaŋura; nhuma yurru warr'‐warryundja walalanha, dhawaṯthunmaraŋana bukmaknha yana; walala ŋuli gonhana yätjkuŋu nhumalanhana, garr'‐garryurru yätjlilina romlili. Ŋuli nhuma yurru märr‐ŋal'yun walalaŋgalaŋunydja waŋarrwu malanyŋuwu, nhumalanhanydja yurru ḏap‐ḏapmaramana ŋuriŋiyina walalaŋgalay yätjthuna romdhu.” Bitjarra ŋayi ŋunhi Garrayyu dhawu'‐nherraranydja, raypirri'yurruna nhanŋuway yolŋu'‐yulŋunha, märr yurru walalanydja nhina nhanŋuway gal'ŋu yana yolŋu walala, ga yakana märr‐ŋal'yun ŋula wiripuŋuwalanydja waŋarrwala.