1 Ga ŋulinyaramirriyu liŋgu, ḏarramu ga dhäyka * IsraelYitjuralwuy maṉḏa märranhamina, yurru maṉḏa ŋunhi † LeviLepaywala yarraṯaŋurunydja. 2 Nhinana maṉḏa yukurrana‐a‐a, bala ŋuriŋi dhäykayu gurrukaŋala yothunha, ga yothunydja ŋunhi dhawal‐wuyaŋina ḏarramu. Wirrkina dhika ŋunhi ŋäṉḏi'mirriŋu wokthurruna yukurrana ŋurikiyi yothu'wu, liŋgu ḻatju'na dhikana ŋanyana ŋunhiyinydja yothu, bala ŋayi djuḻuḻ'maraŋalana ŋanya ŋurikala ‡ EgyptYetjippuyŋuwalanydja buŋgawawala bunharaŋuruna.

3 Yo, ŋunhiyi yothunydja yukurrana djuḻuḻ'yurruna, ḻurrkun' ŋaḻindinydja ŋupara, bala ŋayi ŋäṉḏi'mirriŋunydja ŋunhi wirrkina beyaṉiyina; walala bini ŋanya maḻŋ'maranhana, liŋgu yothuny'tja ŋunhi marrtjina gurarrthina warray bala yulŋunydja, yana liŋgu ga bulwanydhina. Bala ŋayi buku‐ḻayyurruna walŋakunharawuna nhanŋu ŋurikiyi yothuwu. Marrtjinanydja ŋayi, ga galkara gulwaṉi'na marwat, bala bathina bumara. Bumaranydja ŋayi‐i‐i, bathikuŋalana‐a‐a, bala dhaḻ'dhaḻyurruna bathinydja ŋarŋganydja gonydjuy'yinyarayuna, ḏälku'‐ḏälkuŋalana ŋunhiyi bathinha. Bala ŋayi yothu'nhanydja ŋunhiyi ḻaw'maraŋalana, dhoṯku'‐dhoṯkuŋalanydja ŋayi, bala yorrkuŋalana ŋunhimala bathililina. Ḻaw'maraŋalanydja ŋayi ŋunhi yothu'nhanydja bathimirrina, bala gäŋala mayaŋ'lilina.

4 Djar'tjaryurrunanydja ŋayi bala‐a‐a, ga gapu mayaŋ' mulkana gulwaṉi'mirri, bala ŋayi ŋäṉḏi'mirriŋuyu ḻupmaraŋalana ŋunhi bathinydja yothuwalaŋumirrina ŋunhimala yana gulwaṉi'‐yirrimuklili, märr‐baṉḏany'lili. Ḻupmaraŋalanydja ŋayi, bala ŋayi djar'tjaryurruna balayi roŋiyinana wäŋalilina, yurru ŋayina yapa'mirriŋuna djingaryurruna nhinana ŋunhiliyinydja bäymanydja, yurru märr‐barrku ya', nhäŋa'‐nhaŋala ŋayi nhinana.

5 Bala ŋulinyaramirriyu liŋgu waluyu, dhäyka ŋurikina Giŋguna gäthu'mirriŋu yarrupthurruna bala mayaŋ'lili ḻupthunarawu, ga nhanŋu djämamirri walala wirrwu'‐wirrwuḻ malthurrunayi. Wäŋgaŋalanydja marrtjina bala walala mayaŋ'‐ŋuparana, bala yana ŋayi ŋuriŋi miyalkthunydja dharr‐way nhäŋalana bathina ŋunhina, ŋayi nhinana bänina bewiya'mirriŋura. Bala ŋayi waŋana ŋurikala djämamirriwalana dhäykawala, “Gatjuy marrtjiya, ga ŋunha märraŋa bathi ya', ga gäŋa lili ŋarrakala,” bitjarra. 6 Warr‐way märraŋala ŋunhi bathinydja, bala gäŋalana lili, bala wekaŋala ŋurikala dhäykawalana, bala ŋayi ḻapmaraŋalanydja bitjarranydja ya' ŋunhi bathinydja, marrtjina nhäŋalanydja yothu'nha warray, ŋayi yukurrana ŋorrana djinawa' dhika bathiŋura. Bala ŋunhi yothuny'tja ŋäthinana.

Ŋayinydja Giŋgunydja ŋunhi gäthu'mirriŋu wuyurrunana wirrkina ŋuriki yothuwu, ga waŋana ŋayi ŋunhiyi miyalk bitjarra, “Dhuwalanydja gay' yothu Yitjuralpuy bäpurru',” bitjarra.

7 Ga ŋayinydja ŋunhi yapa'mirriŋunydja mukthurruna djingaryurruna nhinana ŋunhiliyi, nhäŋala yukurrana ŋunhiyi dhäykanha, bala ŋayi marrtjina lili withiyara ŋanya, bala waŋana ŋanya bitjarra, “Way! Ḏukṯukka nhe yulŋunydja ŋula dhäykawunydja? . . . djäkawu dhiyaku yothuwu? Marrtjiŋga ŋarra yurru yulŋunydja? . . . ga garr'yun Yitjuralpuyŋunha miyalknha? . . . märr ŋayi yurru djäka dhiyaki yothu'wu?”

8 “Ŋe, gatjuy waṉḏiyana,” bitjarra ŋunhi dhäykanydja waŋana. Bala ŋayinydja ṉaŋ'thurrunana.

Ṉaŋ'‐ṉaŋdhurrunanydja ŋayi yapa'mirriŋunydja ŋuriki yothuwunydja, yana liŋgu‐u‐u, ga garr'yurruna ŋäṉḏi'mirriŋunhana ŋulaŋuru wäŋaŋuruna. Wap‐lili maṉḏa lilinydja, yana liŋgu‐u‐u, bur‐way ḏo'yurruna ŋuripayi dhäykawana. 9 Bala ŋunhiyi dhäykanydja waŋana ŋurikala ŋäṉḏi'mirriŋuwalanydja bitjarrana, “Märraŋana dhuwala yothu'nhanydja, bala nhe yurru gurarrkuŋana yukirriya ŋarraku, yurru ŋarra nhuna wekama yukurra yurru rrupiyayunydja,” bitjarra. Warr‐way märraŋalana ŋunhiyi yothu'nhanydja, goŋliliyaŋalana gäŋala wäŋalilina, bala ŋayipina ŋäṉḏi'mirriŋuna yukurrana djäka, gurarrkuŋala ŋunhiyi yothunhanydja nhanŋuway.

10 Nhinana‐a‐a walala yukurrana‐a‐a, bala ŋunhi yothuny'tja gurarrthina wakindhinana, gurrmulthinana, bala ŋayi ŋäṉḏi'mirriŋuyunydja gäŋala balayi ŋurikala dhäykawala, ga ŋayina ŋanya goŋdhu märraŋala ŋuriŋiyi Buŋgawawala gäthu'mirriŋuyu, nhanŋuwaynha ŋayi yothu. “Ŋarra dhawaṯmaraŋalanydja ŋanya gapuŋuru,” bitjarra ŋayi ŋunhiyi miyalk waŋananydja, bala ŋayi yäkunydja ŋanya nherrara § MosesMawtjitjnha, liŋgu mayali' dhuwala yäku Mawtjitjtja djingaryun yukurra ‘dhawaṯmaranhara.’

11 Yo. * MosesMawtjitjtja nhinana yukurrana‐a‐a ŋunhala † EgyptYetjippuyŋuwala buŋgawawala wäŋaŋura dhuŋgarra ŋupara‐a‐a, yana liŋgu ḏarramuyina marrtjina wakindhina.

Waŋganymirri ŋayi Mawtjitj dhawaṯthurruna warraŋullili, bala ŋayi withiyara walala‐miṯtjinha yolŋu'‐yulŋunha ‡ IsraelYitjuralpuyŋunha. Djar'tjaryurrunanydja ŋayi nhinana bala, nhäŋalanydja walalanha djämalili ŋutu'lili warray. Wiripunydja ŋayi nhäŋala, ŋayi yukurrana yolŋuyu Yetjippuyŋuyu bumara bartjunmaraŋala waŋganynha Yitjuralpuyŋunha ḏarramunha, nhanŋuwaynha miṯtjinha. 12 Bala ŋayi waṯthurruna bitjarra bala ga bitjarra bala Mawtjitjthu, yana ŋayi bäyŋu warray nhäŋala ŋula yolnha, bala ŋayi waṉḏinanydja ḏe'‐way wutthurruna, rakunyguŋalana yana ŋunhi Yetjippuyŋunhanydja ḏarramunha. Warryurrunanydja ŋayi, bala munatha'lilina dholkuŋala, rumbal winya'yunmaraŋalana.

13 Nhinanana ŋayi‐i‐i. Ga wiripuŋuyuna ḏaykun'thu ŋayi bitjarrayi bili marrtjina withiyara nhänharawu walala‐miṯtjiwu. Marrtjinana bala ŋayi, dharr‐nhäŋala märrma'nha Yitjuralpuyŋunha maṉḏanha, maṉḏa nhinana bunharamina, bala ŋayi waŋana ŋurikala ḏarramuwala ŋunhi ŋayi ŋäthili yol buku‐ḻayyurruna mariwu. “Way, nhäku warray nhe dhuwala yukurra buma nhuŋuway gutha'mirriŋunhanydja? Nhuma miṯtji warray dhuwalinydja,” bitjarra. 14 Ga ŋayi ŋunhi ḏarramunydja waŋana nhanukala bitjarra, “Yol dhuwala nhe yolŋunydja? . . . buŋgawa ŋanapurruŋgu? . . . ga mala‐yarr'yunaramirri? Dhuwalanydja nhe yurru ŋarranhana buma ŋiniya? . . . bitjana nhe yawungu ŋunhala bunha rakunygu Yetjippuyŋunha yolŋunha?”

Bala ŋayi Mawtjitjtja wirrkina beyaṉiyina, guyaŋinyaminana ŋanyapinyay ŋayi, “Yuwalknha dhuwala yolŋu'‐yulŋunydja marŋgimirrina ŋiniya,” bitjarra.

15 Ga ŋayi buŋgawayunydja ŋäkulana dhäwu'na ŋunhiyi Mawtjitjkalaŋuwuy, ŋayi bini ŋanya bunha rakunyguna, bala ŋayi Mawtjitjtja ḏulkthurrunana, winya'yurrunana ŋuliŋuru wäŋaŋuru.

Waṉḏinanydja ŋayi bala‐a‐a barrkulilina, yana liŋgu‐u‐u bur‐way ḏo'yurruna ŋunhala wäŋaŋura yäkuŋura § MidianMidiyannha. Djar'tjaryurrunanydja bala ŋayi‐i‐i, dharr‐way nhäŋala gapu maŋutji‐yaw'yunara djingaryurruna yukurrana, bala dhut‐gay nhinanana ŋunhimala gapu‐maŋutjililina.

16 Nhinana djingaryurruna ŋayi Mawtjitj, nhäŋala dhäykawurrunha djapinnha, walala lili wäŋgaŋala gapuwu dhiṯ‐dhiṯthunarawu, wäyingu walalaŋgalaŋuwu wekanharawu, yurru walala ŋunhi dhäykawurru gäthu'mirriŋunydja walala ḏalkarra'mirriwu ḏarramuwu yäkuwu * ReuelRewulwu. 17 Märr walala bitjarra dhiṯ‐dhiṯthurruna gapunydja, bala walalanydja bar'‐barmaraŋala, gukuŋalana ŋunhi dhäykawurrunhanydja, wäyin‐djäkamirriyuna walalay ḏarramuwurruyu. Bala ŋayi Mawtjitjthunydja nhäŋalana, bala djingaryurrunana, wapthurruna dhäykawurruŋgalana, bala waŋana gukuŋalana ŋunhi ḏarramuwurrunhanydja. Bala ŋayipina Mawtjitjthuna walalanha guŋga'yurruna, gapunydja dhiṯ‐dhiṯthurruna. 18 Dhawar'yurruna djämaŋurunydja ŋayi Mawtjitj, bala dhäykawurrunydja ŋunhi wäŋgaŋala roŋiyinana wäŋalilina.

Bala ŋayi mäḻu'mirriŋuyunydja nhäŋalana walalanha, bala waŋana dhä‐wirrka'yurruna bitjarra, “Way! Waḏutja warray dhuwala nhuma gäthuranydja roŋiyina?”

19 Ga walalanydja dhäykawurruyunydja waŋana ḻakaraŋala nhanbala bitjarrana, “Waŋganydhu Yetjippuyŋuyu ḏarramuyu ŋanapurrunha guŋga'yurruna, ŋayi gukuŋala wiripuwurrunhanydja ḏarramuwurrunha, wäyin‐djäkamirrinha walalanha, bala guryu'‐guryunmaraŋala gapunydja ŋanapurruŋgu ŋayina, bala wekaŋala wäyinnhanydja walalanha.”

20 Ga ŋayi bäpa'mirriŋuyunydja waŋana dhä‐wirrka'yurruna walalanha bitjarra, “Wanhaka dhika ŋayi yolŋunydja? . . . Ŋunha bäyma nhuma gonha'yurruna ŋanya? Gatjuy ḻaw'yurra walala, ga garr'yurrana ŋanya lili. Ŋayi ŋayaŋay'nha yurru ḻuka dhiyala ŋilimurruŋgalana,” bitjarra.

21 Bala walala marrtjina, ga garr'yurrunana ŋanya Mawtjitjnhanydja, bala gäŋala wäŋalilina walalaŋgiyingala bäpa'mirriŋuwalana, bala ŋayi yukurrana nhinananydja ŋunhalana bili ḏarramuwalana wäŋaŋura weyinŋumirrina. Ga dhurr‐way ŋayi wekaŋala dhäykanhana Mawtjitjku ŋuriŋiyi mäḻu'mirriŋuyunydja, yäkunha † ZipporahDjipuranhana.

22 Nhinana maṉḏa yukurrana‐a‐a, yana liŋgu‐u‐u, bala ŋuriŋiyi dhäykayunydja gurrukaŋala yothu'nhana Mawtjitjku, ga dhawal‐wuyaŋinanydja ŋayi ŋunhi yothuny'tja ḏarramu maḻamarrnha. Bala ŋayi Mawtjitjthu yäkunydja ŋanya ŋunhi yothu'nha nherrara ‡ GershomGutjum, mayaliny'tja ŋunhi yäkunydja ‘mulkuru’, liŋgu ŋayi ḻakaranhamina ŋanyapinyay ŋayi Mawtjitj bitjarra, “Ŋarranydja dhuwala mulkuru nhina yukurra dhiyalami wäŋaŋura.”

23 Yo. § MosesMawtjitj nhinana yukurrana ŋunhili ŋanhdharkŋuranydja weyinŋumirrina, ga ŋunhalayi wäŋaŋura * EgyptYetjip, ŋunhiyi Yetjippuyŋu buŋgawa liŋguna rakunydhinana, yurru walalanydja ŋunhi † IsraelYitjuralpuyŋunydja yolŋu'‐yulŋu ŋunhala yana mukthurruna nhinana yukurrana ḏirrwiḏirrwiŋura, djäma yukurrana yana ŋutu', ḏapmaranhara ga galŋa‐ŋurrkŋurrkthunara yana. Bitjanana liŋguna walala ŋuli ŋäthinyana yukurranha ŋoy‐yätjthinyana ŋuriŋiyi ḏirrwiḏirrwi‐mulkanharayuna, bala walala wäthurruna Garraywalana guŋga'yunarawuna. 24 Bala ŋayi Gunhu'yu ŋäkulana walalanha rirrakaynha ŋäthinyarana, bala ŋayi guyaŋinyaramina dhäruknha ŋunhi ŋayi dhäruk‐nherraṉmina dhä‐ŋäthili yana, ŋunhi ŋayi dhäwu'‐nherrara ‡ AbrahamYipurayimgala ga § IsaacYitjakkala ga * JacobDjaykupkala. 25 Yo, Gunhu'yu nhäŋalanydja walalanha ŋunhiwala ḏirrwiḏirrwililinydja, bala ŋayi buku‐ḻayyurrunana, ŋayi yurru djämana‐wala yana, guŋga'yunna walalanha.