1 Ga ŋuliŋurunydja dhurrwaraŋuru * SaulDjolwu gäthu'mirriŋu † JonathanDjonathan yäku wirrkina wal'ŋu galkithina ga ḻundu'mirriŋuyinana wal'ŋu, yuwalkkuŋalana ḻunduthina nhanŋu ‡ DavidDaypitku; ŋayi yukurrana märr‐ŋamathinanydja Daypitku wirrkina wal'ŋu dhikana, bitjarra yana liŋgu bitjarra ŋayi yukurrana märr‐ŋamathina nhanŋuway ŋayi. 2 Ga ŋunhili yana liŋgu Daypittja yukurrana nhinana ŋunhilina liŋguna Djolwalana wäŋaŋura, yakana ŋayi roŋiyina balayi nhanukalayŋuwala bäpa'mirriŋuwalanydja wäŋalili. 3 Ga ŋunhiyi maṉḏanha märrma' yawirriny' maṉḏanha, Djonathan ga Daypit dhawu'‐nherraṉminanydja maṉḏakuway maṉḏa gupaḏalkuŋalana. 4 Ŋayi Djonathandhu yupmaraŋalana nhanŋuwaynydja ŋayi girri' ŋurukuynydja ḻatjuny'tja wal'ŋu girri', ga nherrara nhanukala Daypitkalana, ga bitjarrayi liŋgu ŋayi wekaŋala mandjawaktja ga biral ga rumbalwuy galmunharawuy girri' nhanŋuna ŋayi rarr'yurruna Daypitkuna.

5 Yo, ŋunhi ŋayi ŋuli Djolyu djämanydja nhanŋu wekanha Daypitku, ŋayinydja ŋuli djämanydja yana ḻatju'kunhana bäymana dhika, bala yana ŋayi Djolyu nherrara ŋanya Daypitnha mala‐warryunarayŋunhana, ŋurruŋukuŋala miriŋuwuna mala‐warryunarawu. Ga bukmaktja ŋunhi Djolwu miṯtjinydja wirrkina dhika galŋa‐ŋamathina bitjarrana nhanukala Daypitkala. 6 Yo, roŋiyinana yukurrana Djolnydja ga nhanŋu miriŋunydja miṯtjinydja lilina wäŋalilina ŋulaŋuru mariŋurunydja ŋunhi ŋayi Daypitthu wutthurruna Galayithnha rakunyguŋala, ga ŋunhi walala marrtjina djuḻk‐djuḻkmaraŋala wäŋanydja malanha, walalanydja marrtjina dhäykawurrunydja barkparkthurruna manikaynha giritjinana manapara, goŋmirriyinana gumurr‐ŋamathinana gumurr'yurrunana walalaŋgu. 7 Ga ŋunhi dhäykawurrunydja barkparkthurruna yukurrana manikaynydja bitjarrana gam', “Djolyunydja bumara guḻku' warray 1000 warray yolŋu'‐yulŋunha, yurru Daypitthunydja bumara dhaŋaŋ warray biyapul warray wal'ŋu, djuḻkmarama warray yukurra, 10,000‐nhanydja.”

8 Ga dhiyaŋunydjayi dhärukthu malanyŋuyu Djolnhanydja ŋaramurryaŋala wirrkina dhika; ŋayi yukurrana waŋananydja bitjarra, “Walala yukurra waŋa ŋunha, ŋunhi Daypitthunydja biyapul warray wal'ŋu bumara, ga ŋarranhanydja djuḻkmaraŋala warray. Galki walala ŋanya yurru dhuwala buŋgawakumana nherraṉ.”

9 Yo, Djolyu ŋulinyaramirriyunydja ŋulma‐ŋuparana ŋanya, mel‐ḏi'yurrunana bitjarrana Daypitnha, wirrkina yukurrana mel‐ḏi'yurruna. 10-11 Ga wiripuŋuyunydja waluyu ŋäṉukthuna birrimbirryu ŋayathaŋala ŋanya Djolnha, wirrkina dhikana ŋayi Djol maḏakarritjthina ḻiyana‐bawa'yurruna. Ŋayinydja Daypitthunydja yukurrana manikaynha barkparkthurruna miyamara bitjarrana bitjan ŋayi ŋuli ŋäthili yukurranha barkparkthuna nhanukala, ga ŋunhi ŋayi nhinana Djolyunydja ḏälkuŋala garana goŋdhu, bala ŋayi marrtjina dharpuŋala warray ŋanya Daypitnha; ŋayi bini ŋanya dharpunha mam'maranhana ŋunhimala makarrlili buṉbulilina. Djolyu buku‐märrma'mirri baḏatjurrunanydja ŋanya garayunydja ŋuriŋi, liŋgu buku‐märrma'mirri yana ŋayi Daypittja baḻapthurruna nyilŋ'thurruna.

12 Bala ŋayi Djol beyaṉiyinana dhika Daypitkunydja, liŋgu Garraynha nhanukalanydja galki Daypitkalanydja, bala yana gonha'yurrunana ŋanya Djolnha ŋuriŋiyi Godkala Birrimbirryunydja. 13-14 Bala yana ŋayi Djolyu djuy'yurruna Daypitnhanydja ŋurruŋunhana ŋuriki miriŋuwuna malawuna ŋunhi walala marrtjina marililinydja; guyaŋinanydja ŋayi gatjpu'yurrunanydja Daypitku burakinyarawuna rakunydhinyarawuna. Ga bitjanana liŋguna Daypitkalana malayu ŋuli yukurranha djuḻkmaranhanydja mariŋuranydja, liŋgu Garraynha nhanukalanydja ŋuli bitjana liŋgu. 15-16 Ga yanayi ŋayinydja ŋuli Djolnydja beyaṉiyinyana dhikana, ga mel‐ḏi'yunana ŋanya Daypitnha, yurru bukmaktja ŋunhi yolŋu'‐yulŋu § 18:15–16 IsraelYitjuralpuy malanydja yindina ḏukṯuk Daypitku, liŋgu ŋayinydja ŋunhi ŋanyana dhika ḻatju'na bäymana ŋurruŋu.