1-2 Yo, ŋunhiyi Dhawu'‐nherraṉminyarawuynydja Bathi ŋunhili yukurrana djingaryurruna * 6:1–2 PhilistiaBilitjiyanydja wäŋaŋura makarrŋura 7 ŋaḻindi ŋupara, ga yolŋu'‐yulŋunydja yukurrana waŋanhamina bitjanmina, “Nhaltjan ŋilimurru yurru dhuwala djuy'yun balayinydja † 6:1–2 IsraelYitjurallilinydja?” Bala walala waŋana dhä‐wirrka'yurruna ŋunhi ḻiya‐djambatjmirrinha yolŋu'‐yulŋunha, 3-6 ga walalanydja ŋuriŋi ḻiya‐djambatjmirriyunydja ḻakaraŋala walalambala bitjarra, “Nhuma yurru djuy'yundja dhuwalayi, ga djuy'yurrayi nhuma yurru mundhurrnydja manaparra. Djämanydja nhuma yurru waŋgany rulu' nyiknyik, garwarrwarr'mirri dhika nyiknyik, bala yana djuy'yurrana‐wala roŋiyinmaraŋana dhuwalana manaparra Yitjuralpuyŋuwuna Waŋarrnha. Ŋunhi nhuma yurru bitjandhiyinydja djuy'yun, mak yurru Yitjuralpuyŋuwunydja ŋunha Waŋarr ḏaḏawyunna, yakana ŋayi yurru biyapulnydja dhä‐ḏir'yun ŋilimurrunha. 7 Ga biyaka nhuma yurru roŋiyinmaraŋanydja ŋunhi Dhawu'‐nherraṉminyarawuynydja Bathi gam'. Djäma walala yuṯa wal'ŋu yana girri' warryu'‐warryunarawu bala, ga märraŋa märrma' buliki' maṉḏanha, yurru yuṯa maṉḏanha wal'ŋu yana, yothumirrinha maṉḏanha. Märraŋa djaw'yurra ŋunhiyi yothunhanydja maṉḏanha balayi ŋunhimala ḻoḻulili nherrala, 8 ga biyakayi gurrunharra dharpa maṉḏakala ŋurikala ŋäṉḏi'mirriŋuwala maṉḏakala buliki'wala warryu'‐warryunarawu bala. Nherrala ŋunhi Dhawu'‐nherraṉminyarawuynydja Bathi ŋunhimalayi girri'lili, ga gali'lilinydja gurrunharra ŋunhiyi garwarrwarr' mundhurr, ŋunhi nhuma yurru djuy'yun balayi walalaŋgalaŋuwu waŋarrwu mundhurr, ga yurruna yurru buliki'nhanydja maṉḏanha djuy'yun gänana‐wala. 9 Yo, ŋuli maṉḏa yurru buliki' maṉḏa marrtji ganan maṉḏakuway yothunha maṉḏanha ŋunhimala bäyma, bala yurru marrtjina‐wala yana Yitjurallilina wäŋalili, ga yurruna ŋanapurrunydja yurru marŋgithirrina ŋunhi yuwalktja ŋuriŋi Yitjuralpuyŋuwalanydja waŋarryu ŋanapurrunha yukurrana dhä‐ḏir'yurruna ŋuriŋi rerriyu. Ga ŋuli ŋayi yurru dhiyaŋu buliki'yu maṉḏaŋuyu yakanydja ganan dhuwala wäŋa, ga ŋunhinydja ŋanapurru yurru marŋgithirri ŋunhi rerrinydja ŋunhiyi yawungu gäna yana wakinŋu buna, gäna rerri yana.”

10-11 Yo, bitjarrayinydja walala ŋunhi dhuḏakthurruna yana dhäruk, ŋunhi walalaŋgu yukurrana ŋuriŋiyi ḻiya‐djambatjmirriyu ḻakaraŋala. Walala Dhawu'‐nherraṉminyarawuynydja Bathi gurrunhara ŋal'maraŋala ŋunhimalanayi girri'lilina, bala yana ŋunhi buliki'nhanydja maṉḏanha djuy'yurrunana‐wala. 12 Dhunupa maṉḏa ŋunhi bulikiny'tja maṉḏa yana marrtjinana dhunupana‐wala yana ŋunhana Yitjurallilina, yurru marrtjinanydja maṉḏa yukurrana, ḻoḻthurruna marrtjina bala maṉḏa ŋäthina, yurru yakana ŋula maṉḏa bilyurruna ŋuliŋuru gatjaḻŋuru gatjpaḻ'yurrunanydja; dhunupana yanana maṉḏa yukurrana marrtjinanydja, yana liŋgu ga bur‐bunana ŋunhala ‡ Beth ShemeshBeth‐Djimatjnha wäŋaŋura, Yitjuralpuyŋuwalana wäŋaŋura. Ga ŋunhiyi Bilitjiyawuyŋuwunydja buŋgawa giŋ malthurrunayi marrtjina lili, marrtjina yukurrana märr‐barrku bitjarra ya', walala marrtjina nhäŋala nhaltjarra maṉḏa yukurrana ŋunhiyi.

13 Ŋulinyaramirriyuyi waluyu walala yukurrana yolŋu'‐yulŋuyunydja ŋunhi warkthurruna ŋunhala dhulmu‐waṉarra'ŋura, ŋatha marrtjina gulkthurruna birrali. Walala bitjarra mel‐garrwarthina, dharr‐way nhäŋalana, maṉḏa yukurrana ŋunhi bulikiny'tja maṉḏa marrtjina lilina withiyara, gäŋalana marrtjina ŋunhi Dhawu'‐nherraṉminyarawuynhana Bathinha. Bala walala wirrkina dhika goŋmirriyinanydja, wiṯthurruna bäymana dhika. 14-15 Yo, ŋunhiyi bulikiny'tja maṉḏa marrtjinana lili nhinana, galkithinana marrtjina‐a‐a; gulyurrunanydja maṉḏa ŋunhilina bäymana galki guṉḏa yukurrana baḻapthurruna yindi. Ga ŋuriŋi ḏalkarra'mirriyunydja ḻaw'maraŋalana ŋunhi Garraywunydja Bathi, bala nherrara ŋunhimalayina guṉḏalilina ŋal'maraŋala. Girriny'tja walala ŋunhi warryunaramirrinydja djat‐djatthurrunana, ga gurthakuŋalana, ga ŋunhi wäyinnha maṉḏanha buliki'nha maṉḏanha wutthurrunana. Bala walala bathara mundhurrnha wekaŋala Garraywuna, buku‐ŋal'yurrunana yukurrana manapara Garraywuna. 16-18 Ga ŋunhi Bilitjiyawuyŋuyunydja buŋgawayu walalay nhäŋalana yukurrana walalanha yana, bala walala ŋanydjaḻa'yurruna, bala marrtjina roŋiyinana.

19 Ga wiripu‐guḻku'yunydja ŋuriŋi Yitjuralpuyŋuyu yolŋu'‐yulŋuyu, walala dhä‐ḻaw'maraŋala ŋunhiyi Dhawu'‐nherraṉminyarawuynha Bathi, ga nhäŋala djinawa' rurraŋ'thurruna. Dhunupa Garrayyunydja walalanha bumara warray, rakunyguŋala warray, liŋgu ŋunhiyinydjayi Bathi ganaŋ'thunmaranharana, gänana wal'ŋu nhanŋuwaynha ŋunhinydja, dhuyuna wal'ŋu, ŋunhi yukurra ḻakarama Garraynhana ŋunhi ŋayinydja garrkuḻuk gal'ŋu, gäna wal'ŋu ŋayipi yana, yakana ŋula nhä. Yo, ŋunhinydja walala ŋunhi walala mulka'‐mulkana goŋdhu, yana walala rakunydhinana‐wala, ga bukmaktja yolŋu'‐yulŋunydja ŋunhi Yitjuralpuyŋunydja nyä'yunminana dhika walalaŋgu. 20 Ga bukmaktja ŋurikiy wäŋawuy yolŋu'‐yulŋu waŋana bitjarrana, “Garraynydja dhuwala ganaŋ'thun yukurra wal'ŋu, garrkuḻuk wal'ŋu gäna ŋayipi ŋula nhämiriw. Yol yurru djingaryundja nhanukalanydja? Yaka ŋilimurru ḏukṯuk dhiyaku Dhawu'‐nherraṉminyarawuywu Bathiwu. Wanhamala ŋilimurru yurru ŋanya djuy'yundja? . . . märr ŋayi yurru dhiyalanydja yaka yukurra nhina, ŋilimurruŋgalanydja galki?”

21 Bala walala dhäwu'na djuy'yurruna wäŋalili ŋunha § Kiriath JearimGirat‐Djiramlili wäŋalili, waŋananydja walala bitjarra, “Bilitjiyawuyŋuyunydja liŋguna roŋiyinmaraŋala Garraywunydja Bathi. Go marrtjiyana lili, walala ga märraŋana.”