1 Bala yuwalkthi Djolyu djuy'yurruna nhanŋuway ŋunhi djämamirrinhanydja. Ga ŋayi Djamiyulyunydja märraŋalana buthuḻu'mirri weyika', bala ḻiyalilina guryunmaraŋala Djolwala, bala ŋayi wälkuŋalana ŋanya, ga waŋana bitjarrana, “Garrayyu nhuna yawungu djarr'yundja. Dhiyaŋu gay' weyika'yunydja ŋayi nhuna yukurra nherraṉna, nhe yukurra yurru dhärra ŋurruŋu dhiyaku nhanukalayŋuwu miṯtjiwu Yitjuralpuyŋuwu.” 2 Ga bitjarrayi liŋgu Djamiyulyu ḻakaraŋalayi Djolwu, ŋunhi yurru nhaltjan ŋunhala bala. Ŋayi ḻakaraŋalanydja nhanukala bitjarra, “Ŋunhi yurru nhe marrtji nhina bala, ga walala yurru ŋunhilinydja bala ḏarramuyu maṉḏathu ḻakaramana nhuŋu ŋunhi wäyindja nhumalaŋgu liŋguna maḻŋ'maranha, ga nhuŋu mäḻu'mirriŋunydja yukurra warwuyun nhuŋuna ŋunha.” 3-8 Ga bitjarrayi liŋgu ŋayi ḻakaraŋalayi nhanŋu wiripunydja malanha ŋunhi yurru nhaltjan maḻŋ'thun.

9 Yo, ŋunhi ŋayi Djamiyulyu ḻakaraŋalanydja yukurrana Djolwu bitjarrayi, ŋulinyaramirriyu liŋgu Godthu mulkanana Djolnha, bala marrtjina wiriputhaŋalana, yuṯakuŋalana ŋanya. Bala yana ŋayi Djolnydja marrtjinana‐wala, gonha'yurrunana Djamiyulnhanydja, ga ŋunhalanydja bala maḻŋ'thurruna bitjarra yana liŋgu ŋunhi nhaltjarra Djamiyulyu nhanŋu Djolwu ḻakaraŋala. 10 Ŋunhi maṉḏa gumurr‐nhänhamina dhäwu'‐gänharamirri walala, dhunupana yana Godkunydja Garrkuḻuktja Birrimbirr bunanana nhanŋu Djolwu, bala ŋayathaŋalana ŋanya, bala ŋayinydja Djolnydja giritjinana marrtjina dhika, wokthurrunana dhikana Garraywuna ŋurikala dhäwu'‐ḻakaranhamirriwalana malaŋuwala.

11-12 Ga walalanydja yolŋu'‐yulŋuyunydja nhäŋalana, bala waŋana bitjarrana, “Wäy, ŋunha Djol wiripunydja dhäwu'‐gänharamirri?” bitjarrana. 13 Bala yana ŋayi Djol marrtjina ḏuwaṯthurrunana, ga buku‐ŋal'yurruna Garraywuna.

14 Ga ŋayi Djolwala ŋapipi'mirriŋuyu nhäŋala ŋanya, bala dhä‐wirrka'yurruna, “Wanhaŋumiŋga dhuwala nhe yawungu yulŋunydja?” bitjarra. Ga ŋayi Djolnydja buku‐ruŋiyinmaraŋala bitjarra, “Ŋarranydja yawungu yukurra ḻarruma wäyingu maṉḏaku, ga dhäwulnha ŋunhalaŋuminydja. Bala ŋarra yawungu marrtji bala, ga dhä‐wirrka'yun Djamiyulnhana.”

15 Ga ŋayi ŋapipi'mirriŋuyunydja dhä‐wirrka'yurruna waŋana bitjarra, “Nhä ŋayi Djamiyulyu ḻakaranhanydja nhuŋu?” 16 Ga ŋayi Djolyunydja ḻakaraŋala nhanŋu bitjarra, “Ŋayi Djamiyulyunydja ŋarraku ḻakarama ŋunhi wäyindja maṉḏa liŋgu maḻŋ'thunna yawungu.” Ga bitjarra ŋayi yukurrana Djolyu ḻakaraŋalanydja nhanukala ŋapipi'mirriŋuwanydja, yurru ŋayi yaka ḻakaraŋala Djolyu ŋunhi ŋayi Djamiyul waŋana bitjarra nhanŋu, “Nhe yukurra yurru djingaryun * IsraelYitjuralpuyŋuwuna ŋurruŋu,” bitjarra. Yaka ŋayi ḻakaraŋala ŋula yolku yolŋuwu ŋurikiynydjayi.

17-19 Ŋuliŋurunydja dhäŋuru † 10:17–19 SamuelDjamiyulyu yolŋu'‐yulŋunhana ḻuŋ'maraŋala waŋgany‐manaparana ŋunhamala ‡ 10:17–19 MizpahMitjapalili, bala ŋayi ḻakaraŋala walalaŋgu bitjarrana, “Garrayyu Waŋarryu § 10:17–19 IsraelYitjuralwala, ŋayi nhumalanha dhawaṯmaraŋala ŋulaŋuru * 10:17–19 EgyptYetjipŋurunydja; ŋayi nhumalanha walŋakuŋalanydja miriŋuwala goŋŋuru. Ŋayi warray nhumalaŋgu ŋuli dharray mariŋurunydja, yurru nhumanydja marrtjina ŋurrkaŋala warray ŋanya, yaka warray nhuma ḏukṯukthina nhanŋu, ŋunhi ŋayi yurru Garray nhumalaŋgu buŋgawayirri, yana nhumanydja yukurra waŋa bitjanna, ‘Ŋanapurrunydja ḏukṯuk yolŋuwu yana wal'ŋu buŋgawawu,’ bitjan. Manymak, bukmak nhuma yurru djinga'‐djingaryundja marrtji miṯtjilili ga miṯtjilili malaŋulili, ga Godthu yurru djarr'yundja yolŋunha wanhaŋuru miṯtjiŋuru, ŋunhinhanydja ḏarramunha ŋunhi ŋayi yurru buŋgawayirri nhumalaŋgu.”

20 Bala yuwalkthi ŋunhi yolŋu'‐yulŋunydja djinga'‐djingaryurruna miṯtjilili ga miṯtjilili ga miṯtjilili bitjarrana, 21 ga ŋurruŋunydja Godthu djarr'yurruna † BenjaminBindjamannha bäpurru'nha, ga ŋuliŋuru Bindjamangala bäpurru'ŋuru ŋayi djarr'yurruna ‡ KishGitjnhana ga nhanŋu yumurrku'nha. Ga ŋuliŋuruyinydja miṯtjiŋuru ŋayi djarr'yurruna yäkunha Djolnha, Gitjku nhanŋu walkurnha, yurru ŋayipinydja Djolnydja bäyŋu ŋunhiliyi malaŋura. Walala nhäŋa'‐nhaŋala bitjarra ḻiw'maraŋala, ga yakana walala maḻŋ'maraŋala ŋanya ŋunhiliyinydja.

22 Ga ŋayi Garrayyunydja walalaŋgu ḻakaraŋala yulŋukuŋalana, “Ŋunha bala ŋayi ya', djuḻuḻ'yun yukurra girri'ŋura.” 23 Bala yana walala gundupuŋalana, ga garr'yurrunana ŋanya märraŋalana, ga bukmakthunydja yolŋu'‐yulŋuyu nhäŋalana yukurrana ŋanya, ŋayi yukurrana dhärrananydja be warray‐wala, djakany'tja ŋanya waḻarr warray. 24 Ga Djamiyulyunydja waŋana ḻakaraŋalana, “Dhuwalana gay' Godthu djarr'yurrunanydja. Dhuwalana ḏarramu yurru nhumalaŋgu ŋurruŋunydja.” Ga bukmaktja ŋunhi yolŋu'‐yulŋu yiŋgathinana waŋana bitjarrana, “Dhuwalana ŋilimurruŋgu ŋurruŋunydja, märr ŋayi yurru nhinanydja weyinnha.”

25 Bala yana ŋayi Djamiyulyu djuy'yurrunana ŋunhi yolŋu'‐yulŋunhanydja wäŋalilina, 26 ga ŋayi Djolnydja marrtjina nhanukiyingalana wäŋalili § GibeahGipiyayuna, ga wiripuwurru ḏarramuwurru malthurrunayi nhanŋu watjarr'ŋumirri. 27 Liŋgu wiripu‐guḻkuny'tja yolŋu'‐yulŋu yaka ḏukṯukmirriyina nhanŋu Djolwu, walala bitjarra waŋana, “Nhaltjanna ŋayi yurru dhiyaŋunydja yolŋuyu guŋga'yun ŋilimurrunha?” Walala ŋanya märr‐yuḻkthurruna bitjarra ya', ga yakana walala ŋula nhanŋu mundhurrnydja wekaŋala.