1-2 ⌊Lod⌋ Mosesón ngisilianórr da tóbtanórr oyaka tóba kwóbbazen ⌊Palae Müótüdügab⌋, da oya ini gida bóktan poko iliónürr wagó,

“Bóktanke Isrrael pamkolpamdó magó, ‘Darrüpa yabükagab darrü gyaur kla nóma sidüde Lodka, da wa wata ngabyón lardógab sidüde, ia ⌊kau⌋, ta ia ⌊sip⌋, ó ta ia ⌊gout⌋. 3 Wa ne kau nóma sidüde dudu bóngan gyaur klamzan, da wata wa siman kau yarile, darrü gülüng akó gao koke. Wa wata ekyene kwóbbazen Palae Müótan barrbün mamtaedó, igósüm Lod ipüde wa ne kla akyanda. 4 Wa tóba tang ene laran singüldü emngyele, igósüm Lod ubi baine ene dudu bóngan gyaur kla apadóm. Ene klama oya gódam yangune Lodkü. 5 Ma emkolo ene siman kau ola, Lodón obzek kwata, da Erronón simanal olmalbobatala, ⌊prrist⌋ nidipako, óe Lodón ilirre, da i óe-e nangrre Godón ⌊altan⌋ blaman tokom kabe. Ene ne alta-e, kwóbbazen Palae Müótan barrbün mamtae minggüpanana. 6 Da ma ene lar sopae azebo, da akó edabono kari syórr. 7 Prrista ur yazebrre, kumarümórre alta kwitüdü, da seterre. 8 I ene lar murr syórr angórrón kla singül akó olgolpükü yamserre. 9 Da ma wata aumana okómóp akó wapór igulo nae-e. Prrista nótó zagetóda ene ngürrdü, wa bamngule dudu, altadó. Ene dudu bóngan gyaur klama. Da ene uri aungürrün laran morroal ilanga Lodón bagürwóman ngitine.’ ”