3
Keresiyana kii vinoraveraveyana.
1 Ma sisiya sago ana vonem, sisiyina na vonavaghata. Iyavo kava ekayokayowei da ekalesiya iti badesi, ma Keresiyana iti noravesi na nota biibiina iviiya. 2 Ma wawaya kuna vinei da Keresiyana ini noravesi* Keresiyana ini noravesi. Kanuma ina ku nevaneva Keresiyana ekoyakoyaghisi. na kekitai da gwabinai berona kegha, ma kawana sago kava, nota manininai ini potepote meyei, ma kana vava biibiina. Nuwabiibiiyai numataya ina tinariyariyesi ina ku numa. Ma bade kovokovoghina da ini beyebeyena bubuna.* Tait 1:6-9 3 Tuna na ke umaneghaneghana, ke nuwapughupughuna bo kayakayayina ma nuwanuba wawayina. Ma mane ke ina kirorowei. 4 Kawana ma natunatuna ina koyagha bubunisi, ma bade natunatuna na vovopepetisi ma vovotekatekasi, 5 iyamna tomowa kawana ma natunatuna ke ina koyagha bubunisi na ke kovokovoghina da God ina wawaya ina koyaghisi. 6 Ma Keresiyana kii vinoraveraveyana na namadani kava Yesu ita vivitumaghanei. Wawaya wekarakava vitumaghana ivi karei na ke kuna vinei. Mikeda kuta vinei na ita kayotata na God kovogha ita verei. Tuna nakanani ma Devil ikikava ikayotata na kovogha ipanani. 7 Ma bade Keresiyana kii vinoraveraveyana kana vava ina biibai iyavo kava ke iti tumaghana kamosiyai. Kana vava berona na iyavo kava ke iti tumaghana na ini avaberowei da ina peku ma Devil ina ku poko ina kona.
Keresiyana kii koyakoyagha.
8 Ma bade Keresiyana kii koyakoyagha biibiisi ina makai.† Kii koyakoyagha. Tupuwa ina ku nevaneva Keresiyana ekoyakoyaghisi. Ti damsi na iti wawaya manini, sisiya vibero ke iti sisiyei, ma wain ke ituma kirakiiyei, ma mane ke ita kirorowei. 9 Ti na nuwanuwasi yagharinai God vonana vaghata ini tumaghanei. 10 Kunona i yawasa kuna kita bubuni da vaghina bo kegha. Mikeda vaghina na kuna vinesi da Keresiyana kubiisi ina vobigabiga. 11 Ma Keresiyana kii koyakoyagha kakawasi na bade nakanani, ti na wawaya maninisi, ke ita viviyanuwe, ke itumuma neghanegha, ma kovokovoghina da kuni tumaghanesi da i bera kudubina ina bera bubuni. 12 Ma Keresiyana kii koyakoyagha na kawana sago kava ma kuna kitai da kawana ma natunatuna ekoyakoyagha bubunisi. 13 Ma ina biga ina bera bubuni na wawaya ini ghegheni. Ma kana vava biibiina kubiine taraboga ina panani da ina nota ini rewapana ma ikikava Yesu Keriso itumaghanei na ini debei wawaya kurisi.
Vibeyebeyena ghamana.
14 Anotanotai da mara gisina kava na ana pisi da ana kitim, ma kegha da weni sisiyisi agirugiruma kurim, 15 iyamna mikeda ana vivinevira na weni girumina ini akovim da ikikava tota God ina wawaya kata makai, tota ekalesiya na God yawayawana ina rakaraka. Ma tota vitumaghana damta na nakanani ma vonavaghata kana kowora bo kana oga. 16 Vonavaghata, God ina nota ghamaghamasi ma gavugavusi iyamsi irakata, ma notasi na weni.
Ivi wawayota da viyota ikotei,
Ma Kanuma Vovokaravina ivi debei da tuna na vonavaghata,
Ma bade aneya matasiyai ikitai.
Ma kana vava dam ma dam kamosiyai wawaya idimei,
da dobu ku kudubina ivi tumaghanei,
ma God iviitawei da ighae ku kunuma da kana kadara kamonai emakamakai.