9
Kótóné ama mole kisipatóró sya fóló dere ala
1-2 Ya̧lo i dere fota kapala mei, ȩ Yesu Keriso tua̧mó bitu, mo dapó. Ȩ dekȩné sukuturaalu, ya̧lo hosaa tua̧mó delei ala ha̧le yó taretei, Dȩi Kepe Wisiné kolóló mo dapó du beterapó. 3 Ya̧lo no nerape Israel fake so whi̧ atima ȩ betere kaae wisiyóló beteró̧póló tao suraalu, ȩ Yesu Kerisotamo beta̧mó betere ala tekeyóló kae beteratepa ti wisirapóló kisipa mutapó. 4 Ti ai Israel fake so whi̧ Kótóné dape sóró ama naale senaale beteróo, ama kae ere ala wisinaale atimané koló̧póló yó melóo, Kótóné ama so whi̧póló atimatamo mo dirii fo dokóló mulaté wóo, ama tukóló muló betere fokélé atimapaae melóo, momatere bemó Talené doimó mepaae alarape erótu betae yóo, ama wisi ala atimapaae mo eraalopóló, yóló mulaté wóo erapó. 5 Ti atimata, Israel fake kaarale whi̧rapené deté wale so whi̧pó. Ai fake sonéta, so whi̧ tȩteróló kaae tawaaire whi̧ Yesu Keriso mo whi̧ tiki daai dealepó. Ti Yesu a̧ta, fea ala fea tȩteróló kaae tare Kótó beterapa, ama mole doi wisinaale mo ti muó tanó̧póló, sóró horótu betae. Mo kée! Téyó̧póló yae.
6 Kótóné atimapaae i ala eraalopó ere fo ha̧sókó felepóló kisipa mute? Mo meipó. Ti noatepae, kale whi̧ Israel-né deyale naalerape fea betó moletei, atima Israel faketóró bitinipó. 7 Abraham-né deale naale senaale betó moletei, fea ama doi mole naale senaaletóró bitini, mepaae ti ama doi munire naale senaale beterapó. Asȩmó i fo mulapó. Kótóné Abraham-paae duraalu,
“Aisak-né deyaaire naale senaale maaté ti mo naao naale senaale ai ape,” erapó.
8 Ai ere fo bete i ape. Abraham-né ama naale tamo dealetei, mo whi̧né naale senaale detere ala sya fóló deale naaleta, ti ama naale meipó. Kótóné Abraham-paae eraalopó yale fo dokonóturaalu deale naaleta, ti Kótóné ama doi mole naale senaalepó erapó. 9 Ti Kótóné ama mo eraalopó yóló mulale fo i ape.
“Ȩ momó fesaae wouraaluta, mió ya̧lo i tukóló mulatere be dȩmótóró Sera a̧ naale mo sóró betepa kelaalopó,” fo ipakalepó.
10 Ai maaté mei, Rebekanékélé da̧né noutere Aisak-tamo beta̧ be dȩmó naale tamo deipakalepó. 11-12 Ai kale naale tamo beta̧ be dȩmó deyaaipatei, atimaamoné me wisi ala ó dowi ala initei, Kótóné ama mole kisipa sya furaalu, sókó su yóló kae beteraaire ala mo ti muó tanó̧póló, kale sopaae i fo ipakalepó.
“Naao topo naaleta, dekȩ naalené kutó diratere whi̧ betaalo ai ape,”
Ti Kótóné ama so whi̧póló sóró beteratere alata, whi̧né dere ala kolóló dumitei, Talené ama kisipa mole alatóró sya fóló dua dapó. 13 Ai fo kaaetóró asȩmókélé erapó.
“Ya̧lo hosaa mo turó Jekop-paae muluraalu, Iso ya̧lo hȩkeseni hó̧ralepó.”
14 Atérapa, mió da̧né noa fo yaaloé? Kótó a̧ta, whi̧né du betere ala donoyóló tale dumi, ho̧ko taletere Kótópóló kisipa mute? Mo meipó. 15 Ti Kótóné Moses-paae i fo erapó.
“Ya̧lo tao saai kisipa mole whi̧tóró ko̧leturaalu tao saalopó. Ti ko̧letere alata, ya̧lo kisipa mole whi̧paaetóró dua dapó,”
16 Ti Kótóné tao sóró erótu betere alata, whi̧né mole kisipa ó ketekȩ buóló ditere kutó kilituraalu dumitei, Kótó a̧ tua̧mó ere ko̧letere alané tao sóró erótua dapó. 17 Kale asȩyóló mole Kótóné fo tua̧mó topo whi̧ Feropaae i fo erapó.
“Naao du betere ala tua̧mó ya̧lo bole fotoko̧ ha̧kearatepa, i hae kwiamó betó mole so whi̧ feané kolóló, ya̧lo doi sóró horó̧póló, Isip hae naao tȩteróló kaae tawae yóló ya̧ topo whi̧ sóró beteró beterapó,” erapó.
18 Ti Kótóné ama ko̧leaané ko̧leturaalu tao sere whi̧ tao sóo, mepaae so whi̧ hosaa ta̧róló dowa̧ae fole ala eraai depa, ti mo dowa̧ae falóo, du beterapó.
19 Dia̧kó beta̧ whi̧né ȩpaae etei kaae fo enérapó. “Ai fotamo mo epa, Kótóné da̧né yale dowi alamó da̧ só deratere ala, noatepa du betere? Ti atétepa ama kisipa mole ala yao̧sóró, mené sesé yaairetei mo su̧nipó,” 20 Ti ya̧ noa kaae whi̧ bitu, Kótópaae bi ka̧atere fo dute? Kale doka haenétei wuti aletu betere whi̧paae “Naao noatepa ȩ etéró ho̧ko aleyaleé?” fo enére? 21 Kale wuti aletere whi̧né ama beta̧ hae bula ka̧ayóló mo o̧la deyaaire wuti aleyóo, mepaae ha̧le ho̧ko o̧la deyaairetei aleyóo dua dapó. Ti ama o̧la ereteiné ama kisipané alenére o̧latóró su̧mó alenérapó.
22 Atétere kaae, Kótó a̧ fopaae buturaalu ama doraai taketi bukóló kae beterale so whi̧ kwia melaai kisipa mualepó. A̧ atéró fopaae butu, kwia matere alaró fotoko̧tamo so whi̧ feané koló̧póló hapale ha̧kearóló ini, dua kaae taté fu betere alamó da̧né noa fo yaaloé? 23 Aita ha̧le mei, Kótóné ama kae ere dȩ wisinaale tua̧mó fa̧ane wisi wisi ala ama ko̧letu tao saaire so whi̧né tuȩ́ yó̧póló ere alamó da̧né noa fo yaaloé? Ai so whi̧ta, Kótóné ama kae ere dȩ tua̧mó beteró̧póló, taketi tukóló muló beterapó. 24 Atére so whi̧ta me kae mei, da̧tórótipó. Ti da̧ Juda fake maaté a̧ beterepaae ape ini, Juda meire fake so whi̧kélé a̧ beterepaae ape erapó. 25 Ya̧lo i dere fo kaae, Hosea buk-mókélé Kótóné ama i fo erapó.
“Mepaae ya̧lo so whi̧ mei, kae fake so whi̧paae ya̧lo so whi̧pó yóo, take hosaa muni yale sopaaetei ya̧lo hosaa mole sopó yóo, yaalo ai ape.”
26 Atére kaae,
“Atima ya̧lo so whi̧ meipó yale tikimótei dia̧ mo ti betere Kótóné naale senaalepó yaalo ai ape.”
27 Aisaiané Israel so whi̧mó kisipa mutu, fo fakeyóló i fo erapó.
“Israel fake so whi̧ mo ha̧le o̧la kaae betó mupatei, beta̧ beta̧ so whi̧ ti aluyao̧sóró tao saalo ai ape.
28 Ti noatepae, Talené i haemó betó mole so whi̧né yale dowi alamó kwia melaairetei ha̧sókó feni, hapale tétitóró mo turó melaalo ai ape.”
29 Ti i bope yale ala Israel so whi̧paae eraai teópatei, mo take Aisaianékélé asȩyóló muló beterapó.
“Hepen bemó betó mole bóe dele ensel-rape tȩteróló kaae tare Talené da̧ tao sóró, ama naale senaale beterólua̧meisóró, ti da̧ Sodom beró Komora betamo doróló wópu mulótu yale kaae ua̧pó,” erapó.
Isarael fake so whi̧ Talepaae kisipa tirénire ala
30 Atérapa, mió da̧né noa fo yaaloé? Juda meire fake so whi̧ atimapaae Kótóné mo donoi so whi̧pó yó̧póló, me wisi alakélé initei, Kótópaae beta̧ kisipa tiki tiratere ala kilituraalu, mo donoi so whi̧pó erapó. 31 Téyaletei, Israel fake so whi̧né kale tukóló muló betere foné erae dere ala eratepa kilitu, mo donoi so whi̧pó yó̧póló, ketekȩ buóló du betaletei, donoi so whi̧pó yaaire da̧lemó sókó fenipó. 32 Ti noatepae, atima tuȩ́ tiki tiratere ala ini, kale tukóló muló betere fo sya fupa saalopóló kisipa mutu wóputu betaleteiné sini ipakalepó. Ti atimatei kale kotóo sóró dée nalatere kane fakemó kotóo sóró dée nukua yalepó. 33 Ti atima ai ere alata, i asȩmó mole fo kaaetóró erapó.
“Kotóo sóró dée nalatere kane fake Saion haemó ya̧lotei i mulatapa kelae. Ai kane fakemó so whi̧ kotóo sóró dée nukua yaalopó.
Mepaae so whi̧ dené ai sekȩ́paae kisipa tiki tiratepa, ti atétere so whi̧ hale dere alakélé mo yaalomeipó,” erapó.