1  Matyu 18:6-7; Make 9:42Jisasame baanya disaipolo dupa lamaiyoo, “Koo pina lao mapusingi tata longo dupa kiningi etete ipata. Ipataka doko, koo pina lao mapuseta akali doko baa koeyata! 2  Namba tungi pingima wane koo datupanya mende akali dokome koo pina lao mapusetamo doko, wita indyepenge kana yale mende baanya mangenya kende katatala, solowata lumu mendasa soo pyandamili doko yaka jipyali. 3  Matyu 18:21-22 Matyu 18:15Nyakama tange kandao isoo kalyepape. Embanya kaiminingi mendeme emba koo pingitamo doko, baa pyalanya lape. Dopa latenopa baa mona kapilyia-kandeno doko, embame baanya koo dupa kame sakamaipi. 4  Akali dokome yuu gii mendai dokonya paa kalangesa emba koo pingitala, yuu gii mendai dokonyaka paa kalangesaka ipupala emba langyoo, ‘Namba mona kapilyilyona’ latamo doko, embame baanya koo dupa kame sakamaipi” lea.

5 Aposole dupame Kamongo lamaiyoo, “Naimanya Gote tungi pingi doko andasakape” leami. 6 Dopa leaminopa Kamongome lao pituu, “Nyakamanya Gote tungi pingi doko yakane masete dii dopalepi mende-pyali doko, nyakamame diwi ita dake lamaiyoo, ‘Emba pingitaka yukupala, solowatanya kalya puu’ laminopa lamiliaka pipyalina” lea.

7  “Nyakamanya mendenya kalai akali mende ee pokalanya yuu amao kataowapi, sipisipi setao kataowapi andaka ipatamopa, embame baa lamaiyoo, ‘Emba yapa ipao pitipala nee naa’ latepe? 8  Daa, embame baa lamaiyoo, ‘Nambanya nee depa latakala, embanya yonge pee kalai pyaanya pingi doko lakao muu pyoo petala, nee dupa minao ipupi. Namba nee endakipi nao pititopa, namba nisalanya emba malisetae katape’ laa naeyatepe? 9  Embame pina lelye dupa kalai akali dokome lelyenoli pyoo pilyamopa, embame baa yaka pilyino lengepe? Dopa laa naenge. 10  Dopaka pyoo, Goteme pyepape latae dupa pitaka nyakamame petala dapa lapape: ‘Naima kalai akali koo. Naimame pyepape latae dutupaka pilyamanona’ lapape” lea.

11 Jisasa Jerusalema paanya, Samariapa, Galaliapa dolaponya kaina dokonya-kaita pea. 12 Baa pao yuu yakane mendenya pyakameamopa, akali kopetali akalita mendatupame kuki omosale katao baa kandanyiami. 13 Kandanyetala dutupame wii lao, “Akali Andake Jisasa, embame naima kondo kaeyapoko” leami. 14  Lep 14:1-32Dopa leaminopa Jisasame dutupa kandatala lamaiyoo, “Prisa dupame nyakama kandena pupa” lea. Dokopa dutupa kaitinisa peaminopa, dutupanya kopetali dupa mee jia. 15 Dokopa akali dutupanya mendeme baanya kopetali doko mee jalame-lamo lao kandatala, puu lao Gote mambo pyao pilyia. 16 Pilyetala, Jisasanya moko setea dosa ipao tombauli sepala, yaka pilyino lea. (Akali doko baa Samaria tange mende.) 17 Dokopa Jisasame lao pituu, “Akali akalita dutupanya kopetali dupa auu pyaa naeyalape? Akali tukutepo dutupa anja kalyami? 18  Akali tata waka dakeme iki Gote kenge andake maiyanya pilyalape?” lea. 19 Dopa latala Jisasame akali doko lamaiyoo, “Embame namba tungi pyapi dokome embanya kopetali yaina doko etelyamona, emba sakatatala puu” lea.

20 Parasi mendapuame Gotenya kingdom doko andukupa ipatape lao Jisasa tipa piaminopa, baame dokaitanya pii yanu pyakamaiyoo, “Gotenya kingdom doko endakalimi kandapenge kongali mende-pipa naepelyamo. 21  Endakali dupame lao pituu, ‘Gotenya kingdom doko ae silyamo dakena kanjepa. Omo silyamo domona kanjepa’ laa naeyatami. Aipumape, Gotenya kingdom doko nyakamanya mona andaka kalyamona” lea.

22 Dopa latala baame disaipolo dupa lamaiyoo, “Gii doko ipatamopa, Akalinya Ikiningi dokonya yuu gii dupanya mende kandamu laka lao masetamiaka doko, angi nakandatami. 23  Matyu 24:26-27Dokopa endakali mendapuame nyakama langyoo, ‘Akalinya Ikiningi doko asa kalyamo kanja ipupa, omosa kalyamo kanja pupa’ lataminopa, nyakamame kutao kanja napupape. 24  Yuu-wapaka pilyamopa, tii pipae doko kaitinya yangitena pituu, yangitena tuu lenge dopaka pyoo, Akalinya Ikiningi doko baanya gii dokonya ipatamopa dopaka pita. 25  Dopaka doko, wambao Akalinya Ikiningi doko kaeyala naeyao tanda longo natamopa, endakali indupa palelyamino dupame baa maita maitami. 26  Jen 6:5-8; 7:6-24; Matyu 24:37-39Akalinya Ikiningi doko ipanya pita gii dokopa, Noa katea gii dokopa pialiaka pita. 27  Endakali dupa nee endakipi nao, akali dupame enda nyoo, wanaku dupa akali nyala pao pyoo kateaminopa, Noa sipi andaka kolandea gii doko epea. Dokopa endaki andake doko ipupala, dokaita pitaka pyambatala koeyasia. 28  Jen 18:20–19:25Dopaka pyoo, Lote katea gii dokopa, endakali dupa nee endakipi nao, oapi dupa sambao, salimi lao, ee pokao, anda pyoo kateami. 29  Dopa pyoo kateaminopa, Lote baa Sodomo yuu doko yakinatala pateamopa, kaitinya katao itatepi, kana yuli tapetapi, dupa aiyuu joo ipupala, endakali dupa pitaka pyambatala koeyasia. 30  Akalinya Ikiningi doko panatamo gii dokopa, dopaka pita. 31  Matyu 24:17-18; Make 13:15-16Gii dokopa endakali mende baanya anda ketae katata dokome, baanya oapi andakote seta dupa nyalanya isa pyakanala naeyapenge jeta. Endakali mende eenya katata doko, andaka pilyala naeyapenge jetaka. 32  Jen 19:26Nyakamame Lotenya enda doko masalapape. 33  Matyu 10:39; 16:25; Make 8:35; Luku 9:24; Jone 12:25Endakali mendeme baa lete katatoana lao masetala, katapenge kaitini kutatamo dokome baanya lete katenge doko yakinata. Dopaka doko, endakali mendeme baanya lete katenge doko yakinata dokome baanya lete katenge doko nyeta. 34  Matyu 24:40-41Nambame nyakama langilyo: Kuka gii dokonya endakali lapoma toko mendainya palitambinopa, dolaponya mende nyepala, mende doko katena kaeyata. 35  Enda lapomame palao wasalanya wita dii takyoo indyoo tole pititambinopa, dolaponya mende nyepala, mende doko petena kaeyatana” lea.* Buku Baibolo Giriki piimi wambao pepa pyatae kuki mendatupanya vesa 36 doko dapa latae silyamo: Akali lapoma eenya katatambinopa, dolaponya mende lanyepala, mende doko katena kaeyata. 37 Dopa leamopa disaipolo dupame baa lamaiyoo, “Kamongo, anja dopa pitape?” leami. Dokopa baame dokaita lamaiyoo, “Dopale mende kumapae silya dokonya yaka lakepame dupa kambu pingimana” lea.