1 Gii mendepa Jisasa yuu mendasa loma soo katea. Loma soo etapeamopa, baanya disaipolo dupanya mendeme baa lamaiyoo, “Kamongo, Joneme baanya disaipolo dupa loma sina lao mana lamaiyana, embame naima loma semana mana langipoko” lea. 2  Matyu 6:9-13Dokopa baame dokaita lamaiyoo, “Nyakamame loma setami dokopa, dapa lao loma salapape: ‘Naimanya Takange kaiti-kisa katenge, embanya kenge doko auu pyoo lapa lape. Embanya kingdom doko epena lape. Kaiti-kisa embanya masingili pingima, dopaka pyoo isa yuu dakenya pyepa lape. 3  Yuu gii dii lao nee napenge dupa embame naima dipi. 4  Naima koo pingilyamino dupanya yanu dupa kaelyamanona, embame naimanya koo dupanya yanu dupa kaeyakape. Koo pyepale lao makande pingi dupanya naima laminao napupi. Koo akali dokonya kinginya embame naima pyoo nyepe’ lao loma salapape” lea.

5-6 Dopa latala baame dokaita lamaiyoo, “Nyakamanya mende embanya kaita miningi dokonya andaka kuka andatombe pupala baa lamaiyoo, ‘Nambanya kaita miningi mende kuakama ipumupa, nee nena lao maipenge mende nasilyamona, breta tepoma yanu dii’ lateno doko, 7  baame andakote paliu yanu pyao, ‘Namba kaita pai lanyetala, wane-pipa palenge toko dokonya palipilyona, namba sakatatala mende nandyapona, namba kenda pisala nae’ lata. 8  Nambame nyakama langilyo: Akali dokome emba baanya kaita miningi doko breta tee late dupa nanditoo lao masetamoaka doko, emba elya nakaeyao kaita doko tuu pyoo gata-gata laowaka katatenosa, baa sakatatala, emba dopale yangita dupa nyepala dita. 9-10  Matyu 7:7-11Nambame nyakama langilyo: Tee lelyami endakali dupa pitakame nyingima. Kutilyami endakali dupa pitakame kutao kandengema. Anda kaita gata-gata lelyami endakali dupa pitakanya anda kaita lumbakamaingi. Dopana, nyakamame tee lataminopa nyakama ditana, tee lapape. Kutataminopa kutao kandatamina, kutalapape. Anda kaita gata-gata lataminopa lumbakatana, anda kaita gata-gata lapape. 11  Embanya wane dokome breta natoo latamopa, emba takange dokome kana mende nena lao maitipi? Baame pisa natoo latamopa, embame kanopato mende nena lao maitipi? 12  Baame yaka tuku mende natoo latamopa, embame nene koo mende nena lao maitipi? 13  Nyakama koo pingima dupame nyakamanya wane dupa oapi epe maingi mana doko kandengema-tamo doko, nyakamanya Takange kaiti-kisa katenge dokome nyakama ita minao, baa-kisa tee latami endakali dupa Oli Spirita doko maitana” lea.

14  Matyu 12:22-30; Make 3:20-27Gii mendepa muumaa jisingi, imambu koo mende Jisasame watao pyateamopa, akali muumaa doko pii leamosa, endakali kambu dupa paka kaeyao walu leami. 15  Matyu 9:34; 10:25Dokopa endakali yangimi lao pituu, “Imambu koo dupanya isingi, Belesabulu dokonya pupu lapae dokome imambu koo dupa baame watao pilyamona” leaminopa, 16  Matyu 12:38; 16:1; Make 8:11yangi dupame Jisasa makande pyoo, kaiti-kisa-tae mirakolo mende kandamana pina leami. 17 Dopa leaminopa, Jisasame dokaitanya masiamino dupa kandatala dokaita lamaiyoo, “Isa yuu dakenya kingdom mendenya endakali dupa pyaloo petala wakale pitamino doko, kingdom doko koeyata. Anda mendenya palenge dupa pyaloo pitamino doko, dokaita kyeto joo nakatatamiaka. 18  Namba Belesabulumi pupu lapae dimupa, imambu koo dupa watao pilyinona lao nyakamame lelyamino doko, Satane baa wakale pyaloo petala, yanda pingi-tamo doko, baanya kingdom doko aipa petala seta? 19  Belesabulu dokonya pupu lapae dokome imambu koo dupa nambame watao pingi-tamo doko, nyakamanya tata dupame apinya pupu lapae dokome imambu koo dupa watao pingima? Nyakamanya tata dupameaka nyakama yapatami. 20  Gotenya kyeto dokome imambu koo dupa nambame watao pingi-tamo doko, Gotenya kingdom doko nyakama-kisa ipao silyamosa pingi. 21  Akali pupu lapae, yanda yandatepi longo setenge mendeme baanya yuu andapi dupa kandao isoo kalyamopa, baanya oapi dupa auu pyoo singi. 22  Dopaka doko, akali etete pupu lapae mendeme akali doko pyao ita minatala, akali dokonya yanda yandatepi, konambipi, tungi pingi dupa nyoo patala, akali etete pupu lapae dokome baanya tata dupa mokosoo maingi. 23  Make 9:40Namba nisala naenge endakali dokome namba yanda pingingi. Namba-pipa kambu pyala naenge endakali dokome endakali dupa tale pisingina” lea.

24  Matyu 12:43-45“Imambu koo mendeme endakali mende-kisa paliu pyakalyetala, endaki naepenge yuu dupanya koto nyoo katapenge panda kutao paenge. Kutao kaeyapala baame lao pituu, ‘Nambame anda wamba yakineo dokonya pilyotoo’ lenge. 25  Dopa latala, imambu koo dokome pilyetala kandelyamopa, anda doko kuni nasoo, auu pyoo wasetae katenge. 26  Dokopa baa ita minao imambu etete koo kalange mendatupa lanyepala, anda dokonya kolandatala katengema. Dokopa, wamba akali doko kopeta katengeaka doko, imambu koo dutupa baa-kisa ipao palelyaminopa, baa etete kopeta katengena” lea.

27 Jisasame pii dutupa lao kateamopa, endakali kambu dokonya enda mende katea dokome puu lao baa lamaiyoo, “Embanya endangi, emba mandipala andu dia doko, Goteme auu pisetaena” lea. 28 Dopa leamopa Jisasame baa lamaiyoo, “Embame pii lelyeno doko dapa pyoo lapenge: Gotenya pii doko sepala wata-miningima dupa Goteme auu pisetae lapengena” lea.

29  Matyu 12:38-42; Make 8:11-13 Matyu 16:4Jisasa katea dokonya endakali longo ipao kambu piaminopa, baame lao pituu, “Endakali indupa palelyamino dupa koo pingima. Dupame mirakolo mende kandamana nambame pii lelyaminoaka doko, propeta Jona-kisa mirakolo pia doko iki makande petae silyamona, mirakolo waka mende nakanjamino. 30  Ninipe tange dupame kandena lao Jona-kisa mirakolo mende pia. Dopaka pyoo, endakali indupa palelyamino dupame kandena lao Akalinya Ikiningi doko-kisa mirakolo mende pitaka. 31  1 Kiŋi 10:1-10; 2 Kron 9:1-12Kuini enda kingi tolaetena tange dokome yuu londati-waka pituu, Solomonenya masepae epe dupanya pii dupa nyotoo lao epea. Salapape! Mendita mendeme Solomone ita minao asa silyamo. Tenge dokonya, Goteme endakali dupa yapatamo gii dokopa, kuini enda kingi tolaetena tange doko akali indupa palelyamino dupa-pipa sakatatala, dupa tenge setapala tanda maipengena lata. 32  Jona 3:5Joname akali Ninipe tange dupa Gotenya pii doko panao lamaiyamopa, dokaitame sepala mona kapilyiami. Salapape! Mendita mendeme Jona ita minao asa silyamo. Tenge dokonya, Goteme endakali dupa yapatamo gii dokopa, Ninipe tange dupa endakali indupa palelyamino dupa-pipa sakatatala, dupa tenge setapala tanda maipengena latamina” lea.

33  Matyu 5:15; Make 4:21; Luku 8:16“Endakali mendeme lama kaiyepala, panda yalo petae mendenya setala naenge. Baseketa mendenya koko setala naengeaka. Endakali andaka kolandatami dupame tii pita doko kandena lao toko-kisa panao setenge. 34  Matyu 6:22-23Lenge doko yongenya lama doko. Dopana, emba lenge mendai iki tao katateno doko, embanya yonge doko pitaka tii pipaeme tumbatamopa katate. Dopaka doko, emba lenge lapo tao katateno doko, embanya yonge doko pitaka iminjetaeme tumbatamopa katate. 35  Dopana, emba-kisa tii pipae silyamo doko iminjetana, kandao isoo katape. 36  Embanya yonge doko pitaka iminjetae nakatenya, tii pipaeme iki tumbatamopa katateno doko, lama kaiyepaeme emba tii pisingili pyoo, embanya yonge doko pitaka tii pisetana” lea.

37 Jisasa pii lao kateamopa, Parasi mendeme nee nambana lao epena lea. Dopa lateamopa, baa pao andaka kolandatala nee nalanya petea. 38 Pitipala nee nalanya wambao kingi wasa pingi doko napiamopa, Parasi dokome kandatala walu lea. 39  Matyu 23:25-26Dokopa Kamongome Parasi doko lamaiyoo, “Indupa nyakama Parasi dupame nyakamanya kapopi, pelesapi, ketaetena iki wasa pilyaminoaka doko, nyakamanya kokotena pake nenge dokopa, koo pingi dokopa, dolapome tumbatae kalyamo. 40  Nyakama kyakaenge! Ketaetena wasiamo akali mendai dokomeaka kokotena apata wasala naeyape? 41  Nyakamame mona katao endakali daa jepae dupa maiyepape. Dopa pitaminopa, nyakamanya oapi dupa pitaka kaimala napita.

42  Lep 27:30; Matyu 23:23-24“Nyakama Parasi dupa koeyatami. Nyakamame takaepi, itamaiyapi, sakaenge tata waka dupa pitakapi, dupa malu akalita mokosoo setapala, dutupanya malu mendai Gote maingima. Dopa pingimaka doko, mana epeme endakali tolasingi dokopa, Gote auu kaenge dokopa, dolapo nyakamame yakinengema. Nyakamame mana dolapo wata-minao katao, mana waka dupa yakinala naeyapenge. 43  Matyu 23:6-7; Make 12:38-39; Luku 20:46Nyakama Parasi dupa koeyatami. Lotuu anda dupanya nyakama enomba nyoaka pitimu laka lao masingima. Maketa dupanya endakali dupame nyakama mambo pyao kingi nyimi laka lao masingimaka. 44  Matyu 23:27Mosesanya loo mana nyepaepi, Parasipi, dupa nyakama koeyatami. Endakali malu yuu koko yalo pyoo petae dopale joo nyakama kataminopa, endakali dupame nakandao ketae moko katao paelyaminona” lea.

45 Dopa leamopa looya dupanya mendeme yanu pyao, “Mana Lenge, embame pii dutupa lapi dokome, naima apata pii koo lelyenona” lea. 46  Matyu 23:4Dokopa Jisasame lao pituu, “Nyakama looya dupa apata koeyatami. Kenda lekeleke tao sepenge dupa nyakamame endakali dupanya lataiyanya nyoo setakamaingima. Dopaka doko, nyakamanya kingi konde mendaipi mendeme kenda dupa watandala naengema. 47  Matyu 23:29-36Nyakama koeyatami. Nyakamanya yumbange dupame propeta mendapu pyao kumasiami dupanya malunya nyakamame anda pyakamaingima. 48  Dopa pilyami dokome, nyakamanya yumbange dupame piami dupa yaka piamina lao, lao panelyaminosa pingi. Nyakamanya yumbange dupame propeta dupa pyao kumaseteaminopa, malu dupanya nyakamame anda pyakamaingima. 49  Tenge dokonyaka Gotenya masepae epe dokome dapa lea: ‘Nambame propetapi, aposolepi mendapu endakali dupanya kainanya pena latopa, endakali dupame yangi dupa pyao kumasetala, yangi dupa tanda maiyoo koeyasetamina’ lea. 50  Endakali indupa palelyamino dupame dopa pitami dokome, yuupa kaitipa dolapo tee pia dokonya pituu, propeta pyao kumasiami dupa pitakanya taeyoko kai lea dupanya tenge dupa endakali indupa palelyamino dupa-kisa ipata. 51  Jen 4:8; 2 Kron 24:20-21Abelenya taeyoko kai lea gii dokonya pituu, lotuu anda nee nyetae dokopa, alta dokopa, dolaponya kainanya kumia akali Sakaraeya dokonya taeyoko kai lea gii dokonya tuu lao, dokaitanya tenge dupa endakali indupa palelyamino dupa-kisa ipatana lao nambame nyakama kiningi langilyo. 52  Matyu 23:14Nyakama looya dupa koeyatami. Masepae epe dokonya kii doko nyakamame nyokonyetelyamino. Masepae epe dokonya nyakama kolandala naenya, endakali kolandalanya pilyamino dupa nyakamame kaita lyokelyaminona” lea. 53-54 Jisasame pii dutupa dokaita lamaiyoo kateamopa, pii kopeta mende latamopa, baa-kisa tenge setamana latala, Mosesanya loo mana nyepaepi, Parasipi dupame pii longo lena lao tee pyao kyeto joo ingi tuu leami.