5
Te Jerusalem dabe augwaligo Genuai Bidigo augwali tau somainu hanalu wali
1 Genuai Bidi, nago dabolo
te dwai nai pedelali kone elama,
tama nago da hobede yagameo.
Suao, da dolama mu bidiyu,
tama da meba we bidi hanigo gedude
da hale dwai mu te ebao.
2 Dago tǫ te gasa kantri bidi dabego nogode te elalubao.
Tama augwali dago be dabede bidibao.
3 Da olo mu bidibao,
te tiana wai bǫų dabe tiwai bidibao.
Me, te we dabe te wilawe we tiwai bidibao.
4 Polobadu da, te isi dabe me te ąį dabe
te dena nai dabe elalualio.
Tiali goli, megi da, dago te ąį me isi sainogo da,
teda dago abeliyu naga ebao.
5 Te boi bidi dabe augwaligo da selebo genuai mu ebao,
bidigo aga sę yabo donki ma kamel selebo tiwai
ebao.
Tama da tigi hagela dwai mu ebao.
Tiali goli, augwaligo da toma tumainu sula me tagalobeo.
6 Da nai mu sǫą palio.
Tama tibaso, dago te Isip dabebolo me Asiria dabebolo
da tau somainu hanalu walio.
7 Dago wąį dabe augwaligo polobadu te dwai sę yai
digi, augwali polo isila palio.
Tama megi da, da augwaligo dagede da sęgę tolobao.
8 Te Babilon dabego olo sę bagego da tonalubao,
tama da augwaligo nogode ma dobola sabo bidi
menio.
9 Da dolabo bidi dabe, augwali dago kantride bida bida
pobao.
Tama da nai gegegi painu pabode da,
augwaligo da ela muainu tonalubo dao.
10 Da nasi genuai mu ebao, tama da
posolo dwai mu ebao.
Tama dago tigi posolo te stov posolo ebo tiwai mu ebao.
11 Te Saion bulu dude digi,
me te Juda dabego taun dabede,
te boi bidi dabe augwaligo dago we dabe,
me dago wegi mani dabe kegelama,
tama augwaligo penani sę dabe yalio.
12 Augwaligo dago tobolu bidi dabe selama,
tama augwali pobila walalio.
Tama augwaligo dago monu dabe dali
me augwaligo wiegi yai kolesaga me ebeo.
13 Augwaligo dago gesi bidi dabego
wit gosegebo sę bomai sę emainu eyu,
me te ogomane dabego genuai isi pobi genuai elama,
tolomainu ilalio.
14 Megi da, te genuai bidi dabe augwali te taun genuai
sunumi dabe pąde me dualalubeo.
Tama te gesi bidi dabego te gita gagali ma ebeo.
15 Dago wiegi yai homu pemene yali sia salio.
Dago te tęąbi wabo kolesaga hasegelama,
megi dago hobedai gela naga obao.
16 Dago genuai nogi polo tulalualio,
te dago gawe yali nai dabe dolai dao.
Da hobede mu yao.
Magi baso meni, dago yali dwai sęde sali sęgę dwai yalio.
17-18 Dago homu te Saion bulu du te dolali dao,
homu yali.
Tama te bulu uni yowigo bulu pedelali dao, homu yalio.
Tama dago dwai homu mu elama,
tama da gela wali madi dago gedu dene mu yalio.
19 Tiali goli, Genuai Bidi, nage sesemane sogo king
bidada pidu bidibao.
20 Tialima, nago da magi baso tudi ola menama,
tama da magi baso sesemane sogo gegeda pobawe?
21-22 Genuai Bidi, nago da tudi ola menama,
tama nago da dali sębę genuai mu yalio.
Tiali goli, da nage pageba ma asaio.
Tama tialima, nago da ma odasa asao.
Tama nago da polobadu bugagia bidali tiwai ma
bidimainu ilao.