2
1 Tialima, ena te bulude elalubo plaua me deli tiwai
te Saron tǫ malu bulude pedelali.
Tama ena te sawi yai plaua tiwai,
te odogo bulu te bulu du dabe
tomode elalubo dao.
Gesi ogwa bidigo balia po te tiwai wali
2 Eno abagi wali we te gasa we dabe tomode bidali,
te plaua te sesane elalubo nosai
tomode elalubo tiwai yali.
Ogwa we wegigo balia po te tiwai wali
3 Eno abagi te gasa gesi bidi dabe tomode bidibao,
te wiegi yai nai du walai ni me deli
te gasa buside elalubo olo ni dabe
tomode elalubo tiwai ebao.
Te genuai giliga nanobo side, ena te ni dologo madi
dugulaluabo homu godolo ebo dao.
Te ni du walali wiegi yai mu elalubaso,
te eno pedauwalide pusu mu ebo dao.
4 Agai ena te genuai nai da tubo madi
sela pali, te agai genuai beba pali.
Agai ena godolo mu ebo dao,
te eno agaba wiegi yai homu pemene ebo dao,
eno te nai da tuali be au ilali
name ugwade wiegi yai
pemene ebo tiwai gilama yalio.
5 Eno abagi wali bidi, eno nage godolo homu ebao,
tama eno dili kimi isalio.
Te bageo, dagego te nedu du wai dabe ena maiyąo,
tama te wain du wai dabe augwaligo olali elaluali.
Te eno tulama, te ena bomo saibao.
6 Eno abagi wali bidigo agai pobase nogo
eno tobolu dologoba aiyadu muani.
Tama agai dolo nogogo, agai eno tigi tola salio.
7 Te Jerusalem we dabe, dagego te homu ebao,
te wiegi yai bulu uni hasade homu eyu,
te bomai po ena dali dąų walali homu elama,
te dagego da sigo homu hodolo sę me elamuo.
Te dena si sę digi dao.
Si wabo balia po
Ogwa we wegigo balia po te tiwai wali
8 Edao! Eno abagi wali bidi enaba asobao.
Suao! Aga sasa mano dulu
te bulu dabedu ugaba udada asobao,
tama eno aga dogonidu wabo po odalio.
9 Aga te umagia mu uda wali,
te bomai bulu uni hasa me deli udabo tiwai yali.
Aga aselama da,
te be bulu badu dolagaselama,
te be dedage windodu tomoba tonanio.
10 Tama agai ena dali e po wali.
Te ogwa bidigo balia po te tiwai wali
“Eno abagi we sawi yai we mu, nage buluba teda asao,
te nage ena wali asao.
11 Nage te tulubagede wi me elamuo.
Te tulubage be yali sogo silalio.
12 Megi da, tigidali badu plaua dabe pedela silalio,
te balia po wabo sogo pedelali.
Te ba hi dabego bulude balia po ola pabo sę ebao.
13 Te ni kaya du walobo gagalali.
Te buside tigidali bonogo duduli pedelama,
tama te plaua dabego wiegi yai denami ebao.
Eno sawia pai we abagi mu, nage buluba teda asao,
tama nage ena dali asao.
14 Nago naga be tomode bidali,
te ba te bulu du dwai madi dedage
dwasianu tomode geme dualalubo tiwai elaluali.
Te buluba dįą soao,
te eno nago sawi yai gesabidi sulama,
tama nago wiegi yai dogonigo
po wabo eno odaibao.
15 Te dwasianu bulu uni yowi dabe
nogo pageabi elama, tola sao.
Tiyu, augwali dago gi tomoba aselama,
te wain ni duduli walobo plaua dolidalio,” wali.
Gesi wegigo balia po te tiwai wali
16 Te abagi eno bidi da, tama ena agai we da.
Agai te aga meme kibu dabe
te sawi yai plaua dabe tomoba sela pelama,
tama augwali te nosai tubo sę ebo dao.
17 Te agai augwali tonalubadi,
te giliga dega siguluboba usu nama,
te bulu kedau ebo dao.
Eno wiegi yai abagi,
eno homugo nage polo ma asomainu homu ebao,
te wiegi yai bulu uni hasa me deli
te genuai bulu duba uga udada asobo tiwai ebo dao.