148
Te tigidali dagalude me tǫde naigo te Godigo nogi ugwaba somainao
1 Te Genuai Bidigo nogi ugwaba sao.
Dage tigidali dagalude, ugwa badu
bidibo bage, te Genuai Bidigo nogi ugwaba sao.
2 Dage tigidali ensel,
te Genuai Bidigo nogi ugwaba siąo.
Dage tigidali dagalude ami dabe,
te agai nogi ugwaba siąo.
3 Giliga me polua, dage sigo me
te aga nogi ugwaba sao.
Tama te ula mu ebo hǫ tigidaligo
te agai nogi ugwaba sao.
4 Te ugwanu mu elalubo dagalu,
te agai nogi ugwanu sao.
Te dagalude ugwadu elalubo węgo,
te agai nogi ugwaba sao.
5 Te nai dabego te Genuai Bidigo nogi ugwaba sao,
magi baso meni, agai digi po obaso,
tama augwali pedelama bidibao.
6 Agai te po wali gilama tama augwa
te bidimainu yali pesagede mu
sesemane sogo bidibao,
tama te agai po munu me siligobeo.
7 Dage tǫde bidibo bage tigidali, dagego
Genuai Bidigo nogi ugwaba siąo.
Te moni dobo dwai sųgų dabe,
me te tamu ąį aiya badu mu pagede bidibo nai dabe,
8 tama te pǫde elalubo be sele,
tama te talua ge tulubage me,
te pǫ dabe, te bomai waligo me,
te Genuai Bidigo po wali pabo bage,
dagego agai nogi ugwaba siąo.
9 Awe, dage genuai bulu du dabe,
me dwasianu bulu du dabe,
tama nai du walobo ni dabe me,
tama te buside ni dabe,
10 tama te bidi dabego tonalubo kibu hasa dabe, me
te bulu uni hasa dabe,
tama te hasamani dabe, me te ba dabe, te dagego
Genuai Bidigo nogi ugwaba sao.
11 Te king dabe, me tigidali hani bage,
tama te gavman dabe me,
tama te tigidali gasa tobolu bidi dabe me,
12 tama te gesi bidi, me gesi wegimani dabe,
tama te monu dabe, me te wai puluba dabe,
dage tigidaligo
te Genuai Bidigo nogi ugwaba sao.
13 Mu tama, tigidaligo
te Genuai Bidigo nogi ugwaba sao.
Te agaduba genuai nogigo deli te tigidali we bidigo
genuai nogi aiyaba mu elalubao.
Agai genuai nogi te ugwanu mu elalu,
te dagalu me tǫ aiyaba elaluai dao.
14 Agai te Israel dabe wei mu eyu,
tama aga we bidibolo bomo mabo dao,
tama tiyu, augwaligo
agai nogi ugwaba sabo dao.
Te Genuai Bidigo nogi ugwaba sao.