135
Te Genuai Bidiba wiegi yai pemene eyu, wabo tęąbi po dao
1 Genuai Bidi nogi ugwaba sao.
Te Genuai Bidigo sę bidi dabe,
dagego aga nogi ugwaba sao.
2 Dage te Genuai Bidigo be tomode dolalubao,
te dena Godigo tedali wiegi yai tempel be dao.
3 Aga nogi te ugwaba sao, magi baso meni,
agai wiegi yai sę daba ebao.
Agai te olo tau sabo wiegi yai kolesaga dabolo ebao,
tama tiyu, dago te tęąbi dabe weyu,
agai nogi ugwaba siąo.
4 Genuai Bidigo Jekop te aga mu da weyu, te sa muani,
tama tialima, te Israel dabe
te Godigo hani mu gagawai dao.
5 Eno koneani, Genuai Bidigo nogi
te genuai mu elalubao,
tama aga te tibo god tigidali daide
ugwadu aga bidibao.
6 Genuai Bidigo mena sę te dagalude
me, te tǫde me, te tamu węde me,
te tamu wę pagede yabo homu ebaso da,
teda agai te sę ebo dao.
7 Agai te tulubage tulubo pǫ
te tigidali tǫ badu pedalumainu elama,
tama be sele te tulubage dali
pedalumainu ebo dao, tama te wali hodolama,
te tedela palobo dao.
8 Te Isip tǫ pedai kantride agai
te Isip dabego gomunai ogwa dabe ela mubadi,
te augwa kibu bulmakau omai dabe me ela silali.
9 Tama te Isipde agai te bidigo me
isiąwai bomai sę dabe
te kingba me, aga ofisa dabeba dali,
te dene mawai dao.
10 Genuai Bidigo te bulu tǫ pedai hauwa dolama,
tama te bomai king meba ela muai dao.
11 Agai te Sihon elali, te Amor dabego king,
tama Ok, te Basan bulu king da,
tama te Kenan tǫ king tigidali ela silai dao.
12 Tama agai te king dabego tǫ
te aga hani bageba mani,
te Israel dabebolo mawai dao.
13 Genuai Bidi, sesemane sogo
te we bidi dabego te nage koneama,
te naga digi nage te God da homu yaibao.
Tama te nosali pedalubo hani dabe,
augwaligo me te nage homu konealuaibao.
14 Tama Genuai Bidigo te seselalubo
kolesaga te aga we bidi dabeba eyu,
tama aga te sę bidi dabeba homu dene yaibao.
15 Te gasa hani dabe augwaligo
te augwa tibo god dabe te silva me golgo nigali.
Te bidi dabe augwa nogogo digi
te tibo god dabe nigai.
16 Te tibo god dabe augwa pedauwali elalubao,
tiali goli augwa po wabo usu meni yai.
Tama augwa gedu elalubao,
tiali goli augwa nai dabe me subeo.
17 Tama augwa olo elalubao,
tiali goli augwa po wabo me odosiąwai,
tama augwa mobo sabo usu meni yai.
18 Eno homugo te tibo god nigibo bidi dabego
tama augwa homu te nai dabeba
mubaso, augwa te tibo god dabe
tobage tiwai pedelaibao. * Tib 115:4-8; Ped 9:20
19 Dage Israel we bidi dabe,
te Genuai Bidi nogi ugwaba siąo.
Dage Genuai Bidigo pris dabe,
te Genuai Bidigo nogi ugwaba sao.
20 Te Livai hani dabe, te Genuai Bidigo
nogi ugwaba siąo.
Dage te Genuai Bidide wi eyu
aga dologode bidibo we bidi dabe,
te aga nogi ugwaba sao.
21 Te Saionde bidalubo we bidi dabe,
te Jerusalem, te Genuai Bidigo pesage mu da,
te agai nogi ugwanu sao.
Genuai Bidigo nogi ugwanu mu sao.