129
Te Israel dabego Godiba gedu haluasa po olama, te augwa boi bidi dabe dolomainu yali
1 Israel, nago dabolo te boi bidi dabego
nage dwai mu ilibo sę ebo po pusali,
te nage gesi bidide gagalasa,
megiba te usu nagasobao.
2 Nago te tiwai po wali, “Te boi bidi dabego enaba
dwai sę mu yali,
te ena gesi ogwa bidide gagalasa,
megiba usu nagasobao.
Tiali goli, augwaligo ena aiyaba me elalubeo,” po wai.
3 “Augwaligo ena dodolagia mu elama,
tama elali bįgo ena tigiwali tudi badu togwali.
Augwaligo te bobobage keni hauwa
te gide wę gamia tiwai pedalumainu ilali.
4 Tiali goli, Genuai Bidi te doloba pai mu da,
tama agai ena tau selama,
tama ena te dwai bidi dabego nogode tagalama,
tama ena te olo sę ebo bidi ma bidibeo,” wali.
5 Eno homugo dago te Saionba boi bidi
ebo bidi aiyaba elalumainu homu yai,
tama augwali pobeasa te augwa buluba ma pao.
6 Te tialima, augwali te be daide
ugwadu pedalubo nosa tiwai ebao.
Augwaligo te nosa togosiąbadi, tama polo sasia pabo dao.
7 Te bidi me deligo te nosa me sisinama,
tama dunama, tama me tolasa pabeo.
8 Tama te we bidi dabe augwali pąba pobaso,
te augwaligo te tama po me wagobeo,
“Te dago homugo Genuai Bidigo nage wiegi yai sę yaibao.
Te Genuai Bidigo nogide, dago dagebolo
te tobage wiegi yai po mobao,”
augwaligo te tobage po wagobeo.