Buku 5
107
(Tib 107–150)
Dago Godigo te wiegi yai kolesagade pemene yao
(1 Sto 16:34; 2 Sto 5:13; 7:3; Esr 3:11; Tib 100:5; 106:1; 118:1; 136:1; Jer 33:11)
1 Dago Genuai Bidiba puba hwi po wao.
Magi baso meni, agai daba
te wiegi yai mu ebao.
Sesemane sesemane sogo agai da wei mu ebo dao.
2 Dage tigidali we bidi, Genuai Bidigo dage
te boi bidi dabego nogode ma sali,
dage dali, ena me, dago te Genuai Bidi
nogi ugwaba sinao.
3 Agai dage we bidi dabe te gasa bulu tǫ badu,
te giliga pedalubo badu, ma giliga dega sabo badu,
me te not badu, ma saut badu, te ma sai dao.
4 Meba te genuai bulu te kemi tǫ
wa pai bulude bilaluai dao.
Te augwali bidigi pabo madi
te taunba pabo sunumi me deli te me subeo.
5 Augwali te nasi mu elama, tama te wę nogonego siyu,
tama augwa homugo te augwali dolaiba homu yai.
6 Augwali te tiwai dwai bidibaso,
teda augwa te Genuai Bidiba i obaso,
tama agai wiegi yai sę mu eyu,
te augwali tau sai dao.
7 Agai augwali pabo dodolama,
tama augwali odasa peyu, tama augwali te taun me
deliba pedelama, te augwali tede bidai.
8 Tialima, augwaligo te Genuai Bidiba
usu da mu waiyąo, te sesemane agai augwali
homu dene mu elama,
tama agai augwali tau sabo sę wiegi yai mu yalio.
9 Agai te wę nogonego dogoni wa sali
we bidi dabeba te wę mayu,
tama augwa te wę tulama mu usu yali.
Tama agai te nai hauwa te nasi ebo bidi dabeba
menama,
tama augwa te dwagi yai nai tulama,
tama augwa tabi pągąna pali.
10 Meba te be hulia sai madi,
te kalabus be tomode bidali.
Te bidi dabego augwali te sengo kalabus elama,
tama augwaliba te sęgę mawai.
11 Magi baso meni, augwaligo
te Tigidali Bomo Elalubo Godigo pode hagoma eyu,
tama augwaligo agai po sela sąyu ebaso,
te augwali kalabus eyu, sęgę mawai dao.
12 Augwali te tigi dene sę mu elama,
tama augwa bomo tigidali sia sai.
Tama augwali te tǫba degasa dulama,
tama augwali tau sabo bidi meni yani.
13 Augwali te tiwai dwai bidibaso,
teda augwa te Genuai Bidiba i obaso,
tama agai augwali tau selama,
tama augwalide elaluali te sęgę dagala sąwani.
14 Genuai Bidigo augwali selama,
tama augwali te hulia saide bidali tagalu,
tama agai augwaligo te sen togolama,
tama augwali te kalabus ma elalubeo.
15 Tialima, augwa te usu da mu te Genuai Bidi wao.
Sesemane sogo agai augwali homu dene mu elama,
tama agai wiegi yai sę mu eyu, augwali tau salio.
16 Agai augwaligo te brasgo nigali sunumi dabe aluali,
tama te kalabus be bagulali obo
ain ba aluama, togogo pai dao.
17 Meba te augwa yali dwai kolesagade gasi sali.
Augwa te dwai sę hauwa ebaso,
tama tialigo augwa te sęgę tolai dao.
18 Augwa te nai tubo hagela yai,
tama tiyu, augwa pąde isainu yali.
19 Augwa te tiwai dwai bidiyu,
tialima augwa te Genuai Bidiba i obaso,
tama agai augwalide te sęgę dagala sąyu yalio.
20 Aga digi po obaso, tama augwa tigi usu ma ilama,
tama augwali te gų pagede ma dobola sai dao.
21 Tialima, augwaligo te Genuai Bidiba
usu da mu waiyąo,
sesemane sogo agai augwali homu dene mu elama,
tama agai augwali tau selama,
te wiegi yai sę mu yai dao.
22 Augwa te agaba usu da wabo ofa emainu yao.
Tama augwa te pemene ebo tęąbi po weyu,
tama te we bidi dabeba
te agai wiegi yai sę yali po pusao.
23 Bidi meba te moni geba sipde boskru sę eyu,
tama augwali te genuai tamu ąįdu
te tigidali buluba tedelama pobao,
tama te walu selasa pabo bisnis sę
te bidi dabede ebo dao.
24 Te boskru dabego te Genuai Bidigo
ebo sę dabe subao.
Augwaligo agai te genuai tamu ąįde
wiegi yai sę ebo subo dao.
25 Genuai Bidigo po weyu,
tama agai te genuai boma pai wali te nai hodolama,
tama tego te moni dobo dwai biksi hodolubo dao.
26 Te sip dabe ugwaba mu holama,
tama aiyaba mu dulu ebao.
Tama tiyu, te boskru dabego te augwali
dolaiba homu elama,
tama augwa wi dwai ebo dao.
27 Augwali te sipde umuna sai biliyu,
te bomai wę tuai bidi tiwai ebao,
tama augwaligo te sip tau siyu,
te magi sę me deli ebaso, te usugobeo.
28 Augwali te tiwai dwai bididubaso,
teda augwa te Genuai Bidiba i olama,
tama agai augwali tau selama, tama augwalide
te sęgę dagala sąwaibao.
29 Agai te moni wali me biksi silimainu elama,
tama te tamu ąį ma hogodalugobeo.
30 Augwaligo te tamu ąį dua digi bidibo sulama,
tama augwa wiegi yai pemene mu elama,
tama Genuai Bidigo augwali odasa pelama,
te taun sesege, te augwa painu yali
madiba, sabalubo dao.
31 Tialima, augwa te Genuai Bidiba
usu da wao, sesemane sogo
agai augwali wei mu ebao,
tama agai augwali tau siyu,
wiegi yai sę mu ebo dao.
32 Te augwali Godigo we bidi dali
sisinibo sogo, augwaligo
te agai genuai nogide po pusa mao.
Augwali te tobolu bidi dabe dali
sisinama, tama augwaligo agai nogi
augwa tomode ugwaba somainao.
33 Genuai Bidigo te genuai wę
te mu sula somainu elama,
tama te tǫdu pedalubo wę tigidali
sula somainu ebo dao.
34 Te ili elalubo tǫgo te tamu elalubo tǫ
pedalumainu elama,
tama tede te magi nai deli me pedalisiąwai.
Magi baso meni, te badu bidi dabego
te dwai kolesaga ebaso,
tama Genuai Bidigo te tama tiwai sę ebo dao.
35 Genuai Bidigo te tǫ wa pai bulude
te wę hauwa pedalumainu elama,
tama te wa pai bulude wę hauwa elalumainu yalio.
36 Tama agai te tubo nai meni yai
bidi dabe tede bidimainu ilama, augwali tede
bidalu,
tama augwa te taun nigilama,
tama augwa tede bidali.
37 Augwa te nai dabe, me te ni wain dabe bulama,
tama augwa te nai me wain hauwa salio.
38 Genuai Bidigo te aga we bidi dabeba
wiegi yai sę ela mani.
Tama tiyu, augwa te wai hauwa ame neyu,
tama agai te bulmakau dabe me
hauwa pedalumainu ilalio.
39 Te boi bidi dabego augwali te hwįyu,
aiyaba elaluama,
te augwali hale emainu ebo sogo,
tama augwali aiyaba mu elaluama,
tama augwaliba dene mawai.
40 Genuai Bidigo te boi bidi dabego
tobolu bidi dabe te olo nai tiwai naga
pedalumainu elama,
tama agai augwali te wa pai bulude
te sunumi meni yai madi bilalumainu yalio.
41 Tiali goli, te magi doado bage
meni yai bidi dabe te dwai bidibaso,
agai augwali tau sali.
Tama agai te augwaligo wai dabe
te hauwa te sipsip dabe tiwai pedalumainu yai.
42 Te doloba pai we bidi dabego te sulama,
tama augwa bugai haliga yalio.
Tiali goli, te dwai bidi dabego po meni yani.
Augwa pedauwali pania siyu naga yalio.
43 Tialima, dage te wiegi yai homu
elalubo we bidi dagego
te sę tigidali bugagia homu kone palao.
Tama dagego te Genuai Bidiba po hanilama pusuyu,
te sesemane sogo da wei mu ebo da po waiyąo.