105
God dali aga we bidi augwaligo te po wali
1 Dago Genuai Bidi dali usu da weyu,
tama agai genuai nogi elalubo po
hania pusao.
Dago tigidali tǫde we bidi dali
agai genuai sę yali po pusao.
2 Dago tęąbi po agabolo weyu,
tama aga nogi ugwaba sao.
Tama agai dwagi dwagi yai sę yali hania pusao.
3 Da Genuai Bidi aga hani,
tama dago aga dali dwagi yai homu yao.
Genuai Bidi wali pabo we bidi,
augwaligo homu dwagi yai mu yao.
4 Da Genuai Bidi agai tau somainogo pinao.
Tama da sesemane sogo aga dali pąde bidainogo.
5-6 Dage Abrahamgo wąį dabe,
aga Genuai Bidigo sę bidi,
dage Jekop agai wąį dabe nosali pedelai,
te bidi Godigo dąį muani bidi,
dagego homugo agai polobadu gasagi yai bomo yai
genuai sę yali koneyu,
tama agai te dwai sę ebo bidi dabe
augwali dene mabo,
te kolesaga dagego homugo koneao.
7 Genuai Bidi aga dago God dao.
Agai bomo yai po te tigidali tǫde
we bidibolo mabo po dao.
8 Agai dąų olama muani,
te po sesemane sogo elaluaibao.
Tama agai po me elaluama, nosali pedalobo bidi hanigo
te po odaibao.
9 Polobadu agai Abraham dali
te po augwali si dąų wai, tama
agai te dąų wali po Aisak po wai. * Gag 12:7; 17:8; 26:3
10 Genuai Bidigo Israel hani dali po dąų wai,
tama te dąų wali po sesemane sogo
me elaluyu, bidada paibao.
Agai te dąų wali po Jekopgo hani dali
dąų wali, te po siligobeo.
11 Agai Jekop dali te po wai,
“Nage eno te Kenan tǫ mawaibao,” wai,
“tama te tǫ naga tǫ, te naga hani dali.” * Gag 28:13
12 Godigo we bidi augwali dwasianu hani,
tama augwali gasa bulu we bidi te tǫde bidibo tiwai.
13 Augwali bugagia duabe, augwali dodolama biliyu,
gasa bulude bilama, gasa buluba peyu yai.
Augwali dwasianu sogo tuni bidi me deligo tǫde bidai,
tama augwaligo te tǫ tagalama,
gasa tuni bidi mego tǫba bidigi pai.
14 Tialima, Genuai Bidigo augwali gasa bidi dabego
augwali me dolomainogo ebeo.
Tama agai tuni bidi meba dali wado po weyu,
augwali dali dwai sę me igio wai.
15 Agai te po wali, “Eno te we bidi augwali dąį muai,
augwaligo eno sę emainogo.
Dagego dwai sę augwali dali me elamo dao,” wai.
“Tama dagego eno po pusubo bidi
augwali dologio. Mu menio,” wai. * Gag 20:3-7
16 Genuai Bidigo augwaligo tǫde nasi emainao wai,
tama augwaligo nai tigidali agai sela sąwai.* Gag 41:53-57
17 Tialima, agai Josep
aga polasa pomainogo tagala palai.
Tama aga te Isip bulude bidigi pai.
Augwaligo Josep te olo mu sę ebo bidi
abelebo tiwai yai. * Gag 37:28; 45:5
18 Augwaligo te sen aga sągąde dąų olama kęai,
tama aga sągą dene yai.
Tama augwaligo te genuai ain aga dogonide dąų wai.
19 Tama te tiwai me bidaluai, tama agai pusali po
te mu pedalobo suainogo yai.
Genuai Bidigo po augwalibolo ola mayu,
te Josepgo po mu dao wai. * Gag 39:20–40:23
20 Tialima, Isip tuni bidi agai bidi me deli tagala palai,
Josep kalabuside bidali tagalama,
buluba asomainogo tiwai.
Awe, te gasa tuni bidi hani tonalubo bidi
agai Josep kalabus yali silama, tagalai. * Gag 41:14
21 Tama tuni bidi agai Josep agai
gavman tobolu bidi bidao wai.
Tama Josep aga te Isip gavman polalubo bidi bidai.* Gag 41:39-41
22 Agai te tuni bidigo sę ebo ofisa
bidi dabe augwali agai tonalubo sę yai,
tama agai bomogo te tuni bidi
homu kolesaga ola mabo bidi
dabe agai augwali ola mawai.
23 Nosali Jekop te Isip buluba bidigi pai.* Gag 46:6; 47:11
24 Tama nosali Genuai Bidigo aga we bidi tau selama,
augwaligo wai dabe hauwa ame nai.
Tama agai augwaligo bomogo
boi bidi dabego bomo aiyaba elalumainogo yai.
25 Agai te Isip bidi dabego agai
we bidi dali boi bidi emainogo yai,
tama augwaligo tibo sę agai sę bidi dali yai. * Sai 1:7-14
26 Nosali Genuai Bidigo Moses,
agai sę bidi dąį munama bidai,
te Aron me agai sę bidi muani,
tama augwali si Isip te buluba tagala palai.* Sai 3:1–4:17
27 Augwali sigo Godigo bomo yai sę yai,
tama augwali sigo gasagi yai
bomo yai sę Isip bulude yai.
28 Tama Godigo augwaligo tǫ
be hulia siyu, mesega sai,
tialima, Isip bidi dabego agai po sela sąwai.* Sai 10:21-23
29 Agai augwaligo ąį tigidali kaneme emainogo begelai,
tama tigidali te ąįde bidali
sųgų tigidali ela silai. * Sai 7:17-21
30 Tama gedeli dabe hauwa pedelama,
augwaligo tǫ pągąna sai,
tama genuai tuni bidigo be tomode
me pągąna sai. * Sai 8:1-6
31 Godigo po olama, tama bolia me,
dina me, hauwa pedelama,
tigidali tǫ, me bulu dabe tigidali mu
pągąna sai. * Sai 8:16-17, 20-24
32 Agai te tulubage mu augwaligo tǫba tagala palobeo.
Agai te tulubage te talua ge tiwai yai, te tǫba tulaluai,
tama te be sele hauwa ula yai.
33 Agai augwaligo te bono ni du wain me,
ni kaya me, dolai,
tama tigidali ni dabe mu dola silai. * Sai 9:22-25
34 Agai po obadi, te kuli mano dabe pedelai,
te hauwa mu pedelai, dago nedebo usu egobeo wai.
35 Te kuli mano dabe augwaligo
tigidali nai yabe tula silai,
tama augwaligo te bulali nai yabe me
tigidali mu silai. * Sai 10:12-15
36 Tama Godigo Isip hanigo
gomunai ogwa wai dabe tigidali ela muai. * Sai 12:29
37 Nosali agai Israel bidi hani augwali
Isip bulu tagalama, augwali odasa pai.
Augwaligo silva, me gol, te me sela pai.
Tigidali Israel we bidi bugagia bidai, me deli dolobeo.
38 Isip hani augwali Israel hani dali wi yai.
Tama Isip hani augwaligo suali,
Israel bidi hani augwali paibaso,
tama augwali dwagi yai homu yai. * Sai 12:33-36
39 Godigo pǫ hauwa ugwadu munama,
aga hani bidi haluai.
Tama hulide agai genuai sia ula munama,
augwali te ulade bidai. * Sai 13:21-22
40 Augwaligo agabolo nai po hanaluai,
tama agai ba dabe augwalibolo mawai,
tama te ba augwali sela tuai.
Agai dagalude giguai nai bret augwali mawai,
tama augwali te nai tulama,
haliga mu pągąwai. * Sai 16:2-15
41 Agai ąį masigide pedela wai.
Tama genuai ąį te masigide pedelama,
tama te ąį masigi kemi wa pai digi te ąį pai,
te genuai ąį bulude asobo tiwai yai.* Sai 17:1-7; Nam 20:2-13
42 Agai homugo te polobadu
aga sę bidi Abraham dali dąų wali bomo yai po
homude me konealuai.
43 Tama tiyu, agai we bidi augwali agai
te Isip buludu odasa pai.
Tama augwaligo tęąbi ela peyu,
dwagi yai homu dali pai.
Te we bidi augwali aga digi dąį muyu
sa muai, augwaligo i weyu,
dwagi yai homu elama, augwali pai.
44 Gasa we bidi augwaligo tǫ agai
augwalibolo te tǫ mayu,
tama augwaligo te tǫde elaluali
gi dabe me sai. * Jos 11:16-23
45 Agai tama tiwai, te Israel hani
augwaligo agai tigidali bomo yai
po wali pomainogo tiwai.
Tama Genuai Bidi agai nogi ugwaba sao.