71
Monu dabe bidigo gedu haluasa po wali
1 Genuai Bidi, ena nage dali bidibaso,
tama te boi bidi dabego ena me dologobeo.
Nago ena te augwaligo elalumainu me sula tagaligio.
2 Nage doloba pai mu da,
tama tiyu, nago ena tau selama,
tama ena te boi bidi dabego nogode ma sao.
Nago eno gedu haluasa po wabo odama,
tama ena ma sao.
3 Nage te bomai obo tiwai elalu,
tama te bomai be tiwai elalubaso,
teda ena te tomoba aselama,
tama nago ena tonalubao, magi baso meni,
ena te nageba naga aselama, te ena duala sai.
Nago naga ena bugagia tonalubaso,
tama ena bugagia bidibao.
4 Ena God, nago ena te
dwai bidi dabego nogode ma sao.
Augwaligo bomo mu eyu,
tama augwaligo kolesaga dwai mu ebao.
5 Genuai Bidi, eno konealubo homu
nageba naga muani.
Polobadu ena gesi ogwa bidide digi,
te nageba konealubo homu dąų wali,
tama eno konealubo homu dąų ola asali,
megiba usu nagasobao.
6 Sesemane sogo ena nago nogode naga bidiyu bilali.
Idago ena ame nabode,
te nago ena tonalua asali,
te megiba usu nagasobao.
Tama tialima, te eno sesemane sogo
nago nogi ugwaba saibao.
7 Te we bidi hauwago ena sulama,
tama eno ebo sę dabede
te augwali homu hauwa dogia pai.
Tiali goli, te eno bomogo me ebeo. Menio.
Nago naga te ena tonalubo bomo mu ebo dao.
8 Te tigidali sogo te eno nago nogi ugwaba siyu,
tama nago genuai nogi
te we bidi dabeba hanilama, pusubo dao.
9 Megi da, ena monu dabe ebaso,
te eno bomo me menio,
tialima tiyu, nago ena tagalama tudiba muidalio.
10 Te boi bidi dabego ena ela muainu,
tama augwali sisinama, tama po dąų waliyu,
ena dolaibao po wai.
11 Augwa te tama po wali,
“Ae, tegoba, dago aga pobelama,
tama tola sinao,” wali.
“Te aga tau sabo bidi me deli menio.
Godigo aga tagalai dao,” wali.
12 Tialima, God, nage enade digibulu me bidigio.
Eno God, nage polo tama aselama, ena tau sagasao.
13 Te enaba po kisilama wabo bidi dabe,
nago augwali elaluama, tama augwali mu silao.
Augwaligo ena dolainu yali,
tialima, nago augwaligo homu
kolesaga puna palama,
tama augwali hale dwai mu emainu yao.
14 Tiali goli, eno sesemane konealubo
homu nageba dąų olalu,
tama eno nago ena tau sabo tonalubao.
Te eno nago nogi ugwaba mu saibao.
15 Te eno te we bidi augwaliba
te nago doloba pai kolesaga ebo po te pusaibao.
Eno te nago ebo sę page tigidali
te bugagia konesiąbadi digi,
tiali goli tagalao, te tigidali side eno
te augwaliba weyu,
te nago ena ma sali po waibao.
16 God, Genuai Bidi, te eno nago
genuai bomode homu kone palu,
tama te eno nago nogi ugwaba sobao.
Eno te tiwai po waibao,
“Genuai Bidi naga, aga te doloba pai dao,” waibao.
17 God, nago ena te sogo
te dwasianude digi ola mani,
tama megi e sogoba usu nagasobao,
tama eno nago te wiegi wiegi yai
sę dabe ebo po pusudu gebo dao.
18 Megi da, ena monu dabe elama,
te ena tobolu nisi ayadeba yalio,
tiali digi God, nago ena me tagagio.
Nage ena dali bidiyu,
tama eno nago genuai bomode po
te nosali pedalubo we bidi dabe pusaibao.
19 God, nago doloba pai kolesagago
te tigidali badu usu nani,
tama te tigidali we bidigo gedude
te pepeli dilide elalubao.
Nago genuai sę mu yai.
Te tǫde bidi me deli te nage tiwai me elalubeo.
Menio. Nago tigidali mu elaluai dao.
20 Nago te deli tigi poai sęgę enaba tagala palali.
Tiali digi, eno koneai,
te nago ena ma dąų walainu yai.
Te ena gų pageba pidali weyu,
te nago ena ma hodolaibao.
21 Te nago eno nogi te genuai mu igi pomainu yali,
tama nago eno haliga te dua nagame
ma emainu yai dao.
22 Te eno gita me musik eliyu,
te eno nago nogi ugwaba sobao.
Eno God, nago ena me tagalisiąwai,
nago po te mu naga dao,
tama tialima, te eno nago nogi ugwaba sobao.
Te Israelgo God, nage tedali wiegi yai elalubao.
Te eno gita eliyu, tama tęąbi weyu,
nago nogi ugwaba sabo dao.
23 Eno te musik weyu, te ena wiegi yai pemene elama,
i waibao.
Te eno nageba tęąbi po wabo,
te pedauwaligo naga me wagobeo. Menio.
Te homu kolesaga tigidaligo me, haliga daligo me obao,
magi baso meni, nago ena ma sai dao.
24 Tama tialima, tigidali sogo te eno te we bidi dabeba
te nago doloba pai kolesagade po
hanilama pusaibao.
Magi baso meni, te bidi dabego ena dolainu usu sali,
tiali goli, nago augwali aiyaba elaluama,
tama augwali hale mu ilali.