17
Te Devitgo asęani balia po me deli dao.
Dwai sę isąwani bidigo gedu haluasa po wai
1 Genuai Bidi God, nago eno gedu haluasa i
wabo po odao.
Ena bugagia dolo bilai, tama eno te po sela aselama
nagebolo obao.
Eno tibo po olama, gedu haluasa po wabe,
tama nago eno te gedu haluasa po wabo odao.
2 Nago ena tau selama,
tama eno po tų ebo aiyaba elaluaio.
Magi basowe, nago koneai,
mena kolesaga dwagi yai ebo.
3 Nago eno homude koneai.
Nago ena hulide me suagasai,
tama nago ena usu sai,
tama nago eno homu kolesaga
dwai elalubo nago me subeo.
4 Eno dwai po bidi mebago wabo po tiwai wabo menio.
Eno nago po bomo elama dąų weyu,
tama eno te wado po weyu,
hwįbo po wabo kolesaga tudiba muai.
5 Eno sesemane sogo nago kolesaga wali peyu,
tama eno sągą dwasianu me geda mubeo.
6 God, eno nagebolo gedu haluasa po wabo dao.
Magi baso meni, nago eno gedu haluasa
po wei ponobo dao.
Nago olo eno gedu haluasa
po wabo digi munama, odao.
7 God, nago dabolo dwagi yai homu elama,
olo mu tau sabo genuai kolesaga
ola mayu, tama ena tau sao.
Da nage dali pąde bidiyu, tama boi bidi augwaligo da
suidali weyu duala sai.
8 Ena tonaluao, nago naga gedu tonalubo tiwai
ena tonaluao.
Ena nago bugagia mu dualao,
te ba kakaruk aga wai dabe bogogo
mesega sabo tiwai ilama yao.
9 Tama dwai bidi dabe augwaligo ena dologobeo.
Augwaligo ena dali boi bidi mu elama,
tama augwaligo ena bobegelebao.
10 Augwaligo gasa bidi dali
homu dene eyu, olo me tau sabeo.
Augwaligo genuai po dągą weyu,
tama augwa nogi naga ugwaba sabo dao.
11 Augwaligo ena pobeasa biliyu,
tama megi augwaligo ena bobegelebao.
Augwaligo ena aiyaba elaluainogo
bodolu munama, tonalubo dao.
12 Augwali te laiongo hasa elainogo ebo tiwai,
tama te bomai laion duala sela
tonalubo tiwai ebo dao.
13 Genuai Bidi, nage aselama,
eno boi bidi dali hwįnama, augwali aiyaba elaluao.
Nago bobobage hwągo augwali dali hwįnama,
tama ena dwai sę ebo bidi dabego nogode ma sao.
14 Mu tama, Genuai Bidi, nago bomogo ena tau siyu,
tama bidi dabe augwaligo ena siligobeo.
Ena te tǫde nai naga sisinibo bidi dabe
augwaligo nogode ma sao.
Nago te dwai sę ebo bidi dabego
kolesaga wei ponainogo sisi yai,
tialima megi augwalibolo te sę yao.
Tama augwaligo wai dabe dali me tiwai,
tama augwaligo wąį dabe nosali pedalubode me
tama naga tiwai sę yao.
15 Tialima, ena da, eno augwalide
dwai sę me deli isąma,
tama nosali eno nage mu sueibao.
Nosali ena piali tagalama, ena hodaluama,
tama nage ena dali bidibo sulama,
ena dwagi yai homu mu yaibao.