1 Wiegi yai doloba pai homu kolesaga te we me deli dolugulama, te da i wabo tiwai ebao. 2 Aga te bulu du elalubo pesage te sunumi dabe pąde, me te sunumi tulu mage si dabede dolalubo dao. 3 Tama aga te genuai taun hanu bagulali obo te sunumi dabe pąde dolalu, tama te tiwai i wabo sę iduaibao, * Pro 1:20-21 4 “Eno dage tigidali we bidi bomonama i obao. 5 Dage kolesaga konesiąwani bidi, te kolesaga koneiąo. Dage te homu kolesaga siąo. 6 Te eno dagebolo mawainu ebo te wiegi yai doloba pai poba olo bugagia muiąo. 7 Te sesemane sogo eno te mu po naga weyu, tama eno te tobage dwai po dabe wabo te hagela homu ebo dao. 8 Eno po tigidali te doloba pai naga dao. Eno te gagea pai tibo po deli me wagobeo. 9 Te pogo page te homu kolesaga koneani bidigo te mu konea pelama, tama augwa koneyu, te po te dolo po mu wali homu ebo dao. 10 Te eno dagebolo te dage wiegi yai koneabo kolesaga ola momainu eyu, dagego te usu da po wao, magi baso meni, te eno mobo mabo pogo te wiegi yai silva me gol aiyaba elalubo dao.”

11 “Ena digi ena te wiegi yai me doloba pai homu elama, tama eno te gasagi yai sawi yai tobage masigi dabe, me te dagego wei mu ebo nai tigidali me te aiyaba elaluai dao. 12 Tama eno te bugagia bilibo kolesaga koneani. Eno te koneani kolesaga elalu, tama eno te haniani nai dagalabo te usu yaibao. 13 Te Genuai Bidide wi eyu, aga dologode bidibo bidi da, agai te dwai kolesaga dabe te wei mu me egobeo. Eno te hagoma ebo kolesaga me, te bidi aga digi aga nogi ugwaba sabo kolesaga me, tama te tobage dwai sę ebo kolesaga me, te tibo po wabo kolesaga me, te eno wei mu me ebeo. Menio. Eno te tobage kolesaga ebo hagela mu ebo dao. 14 Eno te wiegi yai homu kolesaga te we bidi dabeba mayu, tama eno augwali te tau siyu, te wiegi yai sę ebaso, usu igi dao. Ena digi eno te wiegi yai homu elalu, tama eno genuai bomo elalubo dao. 15-16 Eno te king dabe me, te tobolu bidigo me te bulu tǫ pedai kantri bugagia tonalumainu tau siyu, tama te wiegi yai bomai po me munama, te bulu tǫ pedai kantrigo te doloba pai kolesaga wali pomainu tau sabo dao. 17 Tama mena we bidi dabego ena gegebo sę bomo eyu da, teda augwaligo ena sueibao. Mena we bidigo ena wei yali da, eno me te eno augwali wei mu yaibao. 18 Eno te genuai nogi, me mone, me doado bage hauwa te we bidi dabeba mabo usu igi da. Tama augwaligo te doloba pai kolesaga wali peyu, te wiegi wiegi yai nai dabe somainu tau sobaso, te usu yaibao. 19 Eno te augwalibolo mabo nai dabego te wiegi yai gol, me wiegi yai silva dabe te aiyaba mu elalubo dao. 20 Sesemane sogo eno te doloba pai kolesaga naga wali peyu, te po tų dolo odobo kolesaga naga wali pabo dao. 21 Eno te wiegi yai nai hauwa mu te ena wei mu ebo bidi dabego sabobo madiba te pesage mu holaibao. Tama augwaligo te madi mu pągąna saibao.”

22 “Poloba polobadu mu, te Genuai Bidigo te nai dabe nigainu yali sogo, agai te ena bolo nigali. Tama nosali agai te gasa nai tigidali nigai dao. * Ped 3:14 23 Polobadu mu, te Genuai Bidigo tǫ nigisiąbadi, agai ena nigilama, tama ena bididuali. 24 Ena pedelali sogo, te Genuai Bidigo te tamu ąį me te ulu ąį dabe nigisiąbadi, 25 tama agai te genuai bulu du dabe me, te dwasianu bulu du dabe me nigilama augwa pesageba musiąbadi, te sogo ena pedelai dao. 26 Te ena pedelali sogo, Genuai Bidigo te tigidali tǫ pedai nigisiąwai, tama tiyu, te gi dabede te nai meni yai dao. Te sogo te tǫ hogomu me elalubeo. 27 Te ena Genuai Bidi dali bidibadi, te sogo agai te dagalu nigilama, te tamu ąį te dąįgo bagulali, 28 tama agai te dagalude te pǫ dabe muyu, te ąį dabe te genuai tamu ąį dologodu pedalumainu iliyu, te tamu ąį pągąnumainu yali sogo, te ena me bidai dao. 29 Tama ena aga dali bidibo sogo agai te tamu ąį sesegedu dąį iliyu, tama tamu ąį dali po bomonama weyu, te tamu ąįgo te dąį ilali boligio po olama, tama agai te tǫ muabo pesage dąį mubo sogo, te ena aga dali bidai dao. 30-31 Te Genuai Bidigo te sę dabe yali sogo, ena aga dali bidali, tama agai ena te kolesaga konea pai bidigo te sę tonalubo bidi tiwai nigilali. Tigidali side eno aga wiegi yai homu pemene ilali, magi baso meni, eno te agai nigai nai dabe suyu, te wiegi yai homu pemene yali. Eno te tǫ sulama, te we bidi dabe bidalubode te wiegi yai homu pemene yali, tama ena te Genuai Bidigo gedude sesemane sogo wiegi yai homu pemene elama bidibao,” wiegi yai doloba pai homu kolesagago te po wali.

32 Tama wiegi yai doloba pai homu kolesagago po wadolama weyu, te tama po wali, “Te wai dabeo, dagego eno po bugagia odama, tama eno kolesaga dabe wali pao. Te tiwai dagego ebaso da, te dage wiegi yai homu pemene yaibao. 33 Te dage eno ola momainu elama, tama dagego wiegi yai homu ebo me kolesaga saibao. Dagego te sęba tudi me ola magio. 34 Te eno po bugagia odobo bidi dabe te augwa wiegi yai homu pemene ebo dao. Tigidali side augwali te eno be sunumi pąba dolagaselama, tama ena tonaluali, tama eno po augwaliba mabo dao. 35 Te ena sabo bidi dabe, te augwa bidibo ula sali, tama Genuai Bidigo augwaliba wiegi yai haliga ebo dao. 36 Tiali goli, te ena sisąbo bidi dabe, augwa digi augwa dolaibao. Awe, te ena hagela homu mu ebo bidi dabe augwa isibo sogo godolo ebo dao,” wali.