1 Ogwa, te eno mobo mabo poba olo bugagia muao. Eno te wiegi yai homu me kolesaga nageba mawainu ebao. 2 Tama tibaso da, teda nage te doloba pai kolesagade bilaibao, tama te nago po tigidali te wiegi yai kolesaga koneai bidigo po tiwai yaibao. 3 Nago tama tiao, magi baso meni, te we me deligo aga bidi tagalama, tama nage dali te gedu ebaso da, teda agai te nage homu bega sabo pusu yai po hauwa nage dali waibao. Awe, agai po wabo dwagi yai dao, te wel bugagia bilibo tiwai dao. 4 Tama nago agai po wali pali da, teda nosali nago aga te dwai nai tiwai ąǫ eyu, te ha ebo nai gagawai eyu, tama te dene ebo te hwą bainatgo nage enebo tiwai dene tilama yaibao. 5 Te tobage wego nage te isali bidi dabego pesageba dolo mu odasa paibao. Nago aga wali pobaso da, nage te gų pageba mu paibao. 6 Agai te bidibo ula elaluabo doloba pai sunumidu wali me pogobeo. Menio. Te dwai sunumi dabedu wali pobao weyu, te agai me konegobeo, tama tiyu, te aga subigila naga pabo dao.

7 Tialima, ogwa, eno poba bugagia olo muao. Nago te po me sela sągio. 8 Nage te tobage wede te digibulu mu bidibo tiwai yao. Nage te agai be sunumi pąba me pigio. 9 Tiyu, te nago wiegi yai nogi elaluali te tagalabuo. Te agai bidigo te nageba wiegi yai homu eyu, nago te sę yali te wiegi yai yali da homu elama, nage tau sabo homu me egobeo. Menio. Te nage te gesi ogwa bidi elalubadi, te agai nage ela muaibao. 10 Tama nago te sainogo sę dene yali wiegi yai nai dabe te gasa bidi dabego nogoba pelama saibao. 11 Te gasigo nage selama, tama nage te nomona saibao. Tama te nage isainu ebo sogo, te nage betde pila mudu te dwai gela mu udaibao. 12 Tama nago te tama po waibao, “Eno te augwaligo enabolo mobo mabo po wabode hagela homu yali. Magi baso eno te hagoma eyu, tama ena te bidi dabego dodolomainu ebedawe? 13 Eno te ena tisa dabego po wali me pabeo. Te mobo mani bagego po te eno odobeo. 14 Megi da, ena te mu tama dolama, tama ena te tigidali we bidigo gedude dwai mu yalio.” Nago te po waibao.

15 Nage te gasa bidigo ulu węba tugi pigio. Nage te naga we dali bugagia bidao, tama aga deli dali naga piao, te bidigo wę te aga ulu węde digi naga te wę tubo tiwai gilama yao. 16 Te nago subigila we dabede penani sę elama wai ame nobaso da, teda te wai dabego nage te nosali badu me tau sogobeo. Tama tiyu, te naga wego naga te naga wai dabe naga mu ame nomainao. 17 Te naga wai dabe te we dabego hani dali bididali weyu da, te nago gasa subigila we dabe dali penani ebo sę te igio. 18 Godigo te nago webolo te wiegi yai sę bugagia emainao. Te nage gesi bidi bidiyu dali we te nago ulu wę tiwai da, tama nago agade wiegi yai pemene yao. 19 Te gasa sawi yai mu ebao, tama agai kolesaga te wiegi yai mu da. Agai te nage wei mu ebao, tama sesemane sogo nago agaba homu kone palama, tama aga wei mu yao. Tama nago sesemane sogo te agai ame side wiegi yai pemene yao.

20 Ogwao, nago te gasa bidigo weba homu kone eyu, tama nago te agai amede homu palamuo. 21 Magi baso meni. Genuai Bidigo te dago ebo sę tigidali te sulama, tama agai te dago ebo kolesaga tigidali te bugagia osola subo dao. 22 Te dwai bidi aga sęgęgo digi te aga te wago kalabus elama, te bonogo kęąlubo tiwai ebao. 23 Te tobage tiwai bidigo te aga homugo digi ebo kolesaga te aiyaba me elalugobeo. Menio. Agai te wabo pabo bidigo ebo kolesaga tiwai eyu, tama te kolesagago aga ela mubo dao.