1 Te meba Farisi hani bage meba dali, te Juda dabego bomai po page koneai bidi dabe meba dali, augwaligo te mone hanu Jerusalem taga soyu, te augwali Jisas bidibo madiba sisinagasai. 2 Tama augwaligo te aga wali pabo bidi dabe mebago nai tubo suali, te augwaligo nogo bolo hasia węgo te nogo habuba mu tugulama telasiąma te nai sela tuali. 3 Te Farisi dabego me te tigidali Juda dabe augwaligo te augwa wąį nǫų dabego polobadu yali kolesaga wali pelama, tama augwali te nogo ąį hasia nogo habuba usu nama telasiąbadi da, te augwaligo nai tusiąwai dao. 4 Te augwali te Juda hani isąwai bagego maket elaluboba pelama ma asiyu, tama augwaligo nogo wę telasiąbadi da, te augwaligo nai me tuai menio. Tama augwaligo te wąį nǫųde sali gasa kolesaga hauwa me wali peyu yai. Augwaligo te wę tubo kap me, sene me, genuai pou me, te pibo bet sai me wę telayu yai dao.

5 Tama tibaso te Farisi dabe me te Juda dabego bomai po page koneai bidi dabe augwaligo te Jisasbolo hanalu wali, “Magi baso te nage wali pabo bidi dabe augwaligo te dago wąį nǫų dabe augwaligo kolesaga wali pabo meniwe? Te augwaligo dago nogo wę telabo kolesaga isąma, tama nogo meda elalubadi nai tubo dao,” te po wai.

6 Tama Jisasgo augwalibolo te po wai, “Te polobadu bidali profet bidi Aisaia agai dagede te po meba dolo mu weyu, tama te dage ili po wabo bidi dabe da wai. Agai te e tama tiwai po polobadu asęani,

8 “Tama dagego te Godigo bomai po tagalama, tama dagego te bidi dabego ola mabo po naga dąų olama tolalubo dao,” Jisasgo te Farisi bage dali te Juda dabego bomai po page koneani bage me augwalibolo wai.

9 Tama agai augwalibolo te po me wali, “Dagego te Godigo bomai po tagalabo bugagia koneama, tama duga digi ebo kolesaga wali pabo dao. 10 E tiwai dao. Polobadu Mosesgo te bomo yai po pusali, ‘Nago te naga aya idago po wali pao,’ wai, tama me po wali, ‘Bidigo dwai po te aga aya idabolo wabo bidi te aga isimainao,’ te po si Mosesgo ola mani. * Sai 20:12; 21:17; Prs 20:9; Bom 5:16 11 Tiali goli dagego te po si tagalama, dagego e tiwai po dabolo ola mabo da, te bidi me deligo aga aya ma ida tau sabo mone ma doado bage elalubadi, tiali goli agai te po augwali sibolo waibao, ‘Te e mone da, te eno Godiba mawainogo sa muani elalubao’ po obaso da, 12 teda agai te aga ida bugagia wiegi yai ilibo sę te tama tagaliyu da, te usu dao, dagego te tobage po ola mabo dao. 13 Tama naga tiyu, tama dagego te duga wąį nǫųde sali kolesaga wali pelama, tama dagego te Godigo po dolobo ąǫ ebo dao. Tama dagego te tobage tiwai kolesaga hauwa ebao,” Jisasgo te po wai.

14 Tama Jisasgo te we bidi augwali i ma olama, tama agai te po augwalibolo wali, “Dage tigidaligo eno po odama tama homugo konea sao! 15 Te bidi me delide te nai bulu badu elaluali tama te nai aga tomoba pelama, tama te naigo te bidi meda ilibo te usu me egobeo. Menio. Te bidi tomode elaluali nai dabe te buluba soyu, tama tego naga te bidi dwai meda ilaibao. 16 [Te olo elalubo bidigo agai te po odiąo.”]

17 Agai te we bidi bidalubadi taga peyu, te aga beba pai. Tama aga wali pabo bidi dabego agabolo te begelama wali po digi po page hanalu wali. 18 Tama agai te po augwalibolo wali, “Dage me te homu kolesaga meni eyu, obawe? Te dagego konebewe? Te tigidali bulu badu elaluali nai te bidi tomoba pelama, tego te bidi dwai meda ilibo usu egobeo. 19 Magi baso meni, te tiwai naigo te bidi homu tomoba mu pogobeo. Menio. Te haliga tomoba peyu, tama te di tabo sunumidu naga pelama, tama nosali te di beba paibao,” agai te po wai. Te pode Jisasgo te tigidali haniani tubo nai te wiegi yai da, te habu selebo menio, te po wai.

20 Tama agai te po me wai, “Te dwai nai te bidi tomode elaluama tama buluba asobo, tego te bidi meda ilibo dao. 21 Te bidi tomode, te homu kolesaga tomode pedalubo nai dabe te e tiwai: te dwai homu kolesaga dabe, te penani ebo kolesaga, me te nai wi sabo kolesaga me, te bidi ela mubo kolesaga me, 22 te we sabo dolobo kolesaga me, te mena nai sainu homu hogodama pesa dalobo kolesaga me, te haniani dwai dwai kolesaga me, te tibo po weyu te hagoma ebo kolesaga, me te bidi nogi posobo po wabo kolesaga ebo, me te hagoma homu elama te esela pabo bidigo kolesaga tiwai eyu ebo dao. 23 Te tobage tigidali dwai kolesaga te bidi tomode elaluali te buluba asiyu, tama te bidi meda ilibo dao,” Jisasgo te we bidi dabebolo te po wai.

24 Te Jisas hogodama tama aga te bidali bulu taga soali, tama te Tair hanu pedaiba pai. Aga te be me deli tomoba pali, tama aga tede bidibo te bidi me deligo aga koneidali homu yali. Tiali goli aga geme duala sainogo ebo te usu me egobeo. 25 Menio. Te we me deligo aga bidibo po odali. Te we aga wegi elaluali, tama te dwai haubo noma bidi te wegide bidai. Tama te we aga polo tama asama, te Jisas sągą pąba kidu sugunagasali. 26 Te we aga te Juda hani isąwai we da, aga te Fonisia hani we, te Siria moni tǫde elalubo bulu da. Agai te Jisasba i weyu, te agai wegide elalubo dwai haubo noma bidi sela sąyao wai. 27 Tiali goli Jisasgo agabolo po wei ponoyu, te Juda hani dali te Juda hani isąwai bage me te side po digi po begelama tama te po wai, “Dago te wai dabebolo te hasia nai mao. Tiyu dago te wai dabego nai sela tuyu tama te yowi dabeba te nai sąyabuo,” te po wai.

28 Tiali goli te wego agabolo po wei ponoyu, te po wali, “Genuai Bidi, nago te mu po obao. Tiali goli te yowi dabego te wai dabego nai kagali te tebol sai dologoba tulalubo nai sela tubo dao,” te wego te po wai.

29 Tama Jisasgo agabolo te po wali, “Nago te tiwai po obaso da, teda nage ma geasa pagameo. Te dwai haubogo nago wegi dąų elaluali te taga palio,” te po wai. 30 Tama te we aga beba ma geasa pelama, tama aga wai te bet saide pila mubo suali, tama mu tama, te dwai haubogo dąų elaluali te taga pai sualio.

31 Te silama, megi da Jisas ma hogodama, tama te Tair tǫ pedaide bidali tagalama, tama te Saidon bulu tomodu pai. Tama aga te hanu nogo si elalubo genuai tǫ tedu pelama gana, tama te sigi ąį Galili pąba sabolali. 32 Tama augwaligo bidi me deli agaba selasa asali, te aga olo degebadi te hamena begelebadi yai elaluai. Tama augwaligo Jisasba hanalu te bidiba nogo diąyao po wai. 33 Tama tibaso, Jisasgo aga selasa pelama, tama te we bidi taga soali, tama augwaduba si naga bidigi pali. Tama Jisasgo nogo dani te bidigo oloba munama, tama pesa sąnama, tama te pesa nogo daniba muyu, te bidigo hamenaba muanio. 34 Tama agai te dagaluba tonaludu, tama mobo bomonama ponani, te aga homude gela wabo tiwai elama, tama agai agabolo weyu te po wai, “Efata!” po wai. Te tiwai wali, “Nago olo dala pao,” wai. 35 Tama te bidigo olo degai elaluali te dala pali, tama aga te hamena panialuali nai te polo taga pali, tama aga po bugagia wai. 36 Tama Jisasgo augwaliba habu seleyu, bomonama wali, augwaligo te sę yali po te bidi me delibolo munu me wagio po wai. Agai bomonama augwali habu selali, tiali goli menio, augwaligo bomo mu elama, te po pususu palio. 37 Tama te sę yali po odali we bidi tigidali augwali midigi siyu, tama noma mu sali, tama augwaligo te po wai, “Tigidali sę agai ebo, te agai wiegi yai sę naga ebo dao. Agai te olo degai bidi me, te bidigo po odomainogo iliyu, tama te pedauwali pania sai bidigo po ma omainogo eyu yai dao,” te we bidi dabego te po wai.