19
Jisasgo te bidigo aga sai we sela sąbo kolesaga ebo po wai
(Mak 10:1-12; Luk 16:18)
1 Te Jisasgo te sę tonalubo bidi dabede po digi po begelai po wali silama, tama agai te Galili tǫde bidali tagalama, tama te moni pabo ąį Jordan bolama, te Judia tǫ badu pai. 2 Tama we bidi hauwa augwali aga wali asai. Tama tede agai augwaligo gasi dabe usu ma ilai.
3 Tama te Farisi hani dabe meba agaba aselama, tama augwaligo agai geda mubo po wagowe te homu eyu, tama augwaligo aga usu sagasai. Augwaligo te po wai, “Nago magi homu ebowe? Ma, dago bomo yai pode te bidigo aga homu naga wali peyu, tama aga we te tigidali magi sęde sela sąbo te usu egowe?” te po wai.
4 Jisasgo po wei ponoyu, te po wai, “Te dagego polobadu te asęani po me nedai meniwe? Agai te po wai dao, ‘Polobadu mu Godigo tigidali nai nigali sogo agai te bidi me we augwali nigilama pedelai dao.’ * Gag 1:27; 5:2 5 Tama agai te po me wai, ‘Tama tiyu, bidigo aga aya ida tagalama, tama aga we dali mu kęą pelama, tama augwa si te deli tigi tiwai mu pedeliyu bidaibao,’ te po wai. * Gag 2:24 6 Tama tibaso, augwa si hasia tedali tedali bidali tiwai egobeo. Menio. Augwa si te dedeli tigi tiwai mu yaibao. Tama Godigo te dąų olama kęnani nai te bidigo me togolamuo,” Jisasgo te po wai.
7 Tama te Farisi dabe augwaligo agabolo te po wai, “Tama tiyu da, te magi baso Mosesgo polobadu te bomai po mayu, te bidigo we sela sąbo po te pasde asęnama te webolo menama, tama aga sela sąyao po magi baso wai dawe?” * Bom 24:1-4; Mat 5:31
8 Te Jisasgo augwalibolo te po wai, “Dage te masigi homu tomoba sąwai elalubo bidama dobaso, tama tiyu Mosesgo suali dagego te tiwai kolesaga ebaso, agai dagego wąį dabebolo te we sela sąbo po wai dao. Tiali goli te Godigo tigidali nai nigali sogo te tiwai kolesaga meni yai dao. 9 Eno, eno e tiwai po dagebolo obao, te bidi mego wego te dwai penani sę me isąbadi, tama bidigo te we aga sela sąnama gasa we sobaso da, teda te bidi aga digi te dwai penani sę ebo kolesagaba kekebo sę tiwai ebo dao,” Jisasgo te po wai.
10 Tama aga wali bilibo bidi dabego agabolo te po wai, “Te bidi aga we dali bidibo kolesaga te tiwai ebaso da, teda te bidigo we sabo sę te tagalabo digi dao, aga olo bidao,” te po wai.
11 Tiali goli agai augwalibolo te po wai, “Te bidi tigidaligo te we sisąbo po me sabo usu egobeo. Menio. Godigo te bidi mebabolo naga te po mabo dao. 12 Magi baso meni. Te haniani bidi augwali te we me sogobeo, te usu egobeo. Augwali meba bidi te augwa idago ame nani sogo te augwali tama tiwai naga ame nai, aga tigi dwali. Tama meba ma te gasa bidi dabego augwaligo domo ge dinama, tama augwaligo we me sogobeo. Tama mebago te Godigo we bidi tonalubo sę asomainogo tiyu, te we sabo sę habu selebo dao. Bidigo te po agai sainogo usu ebo bidi da, teda agai te po somainao,” Jisasgo te po wai.
Jisasgo te wai puluba bugagia bidabo po mobo mani po
(Mak 10:13-16; Luk 18:15-17)
13 Te sogo te we bidi augwaligo te dwasianu wai puluba meba te Jisas agaba odasa asai. Augwaligo agabolo te po wainogo te nago nogo te e wai puluba tobolude munama, bugagia bidimainogo gedu haluasa po wao. Tiali goli te Jisas wali pabo bagego te bidi dabego te po wainogo asobo sulama, tama te we bidibolo wado po weyu, te sę ebo tagalao te po wai. 14 Tiali goli Jisasgo te po wai, “Dagego te wai puluba augwali ena pageba asomainao,” po wali. “Dagego augwali dąų me wagimio. Menio. Te e wai pulubago ebo homu kolesaga tiwai ebo we bidi te augwali Godigo we bidi tonalubo madigi tomoba asagameo,” wali.
15 Tama agai nogo augwali tobolude munama, bugagia bidabo mobo mabo po wai. Tama nosali aga te bulude bidali tagalama, gasaba pai.
Gesi bidigo doado bage hauwa elalubo po
(Mak 10:17-31; Luk 18:18-30)
16 Te me sogo bidi me deli Jisas pageba sabolama, te po wai, “Po ola mabo bidi, eno mena tiwai wiegi yai kolesaga elama, tama ena te bugagia sesemane sogo bidada peyu, bidada pabo ula sogowe?” Te bidigo te po wai.
17 Tama Jisasgo agabolo te po wai, “Te enabolo magi baso nago te wiegi yai sęde hanalu obawe? Te me deli digi naga te aga wiegi yai dao, te God dao. Tama nage te wiegi yai bidabo ula sabo homu ebo wida, teda nago te Godigo bomo yai po wali pao.”
18 Tama te bidigo agabolo te po wai, “Mena bomai po dabewe?” Tama Jisasgo te po wai, “Te e po dabe dao: ‘Nago bidi ela mugio. Nago te penani sę egio. Nago nai wi sigio. Nago gasa bidide tibo po ola magio. * Sai 20:13-16; Bom 5:17-20 19 Nago naga aya idago po wali pao. Tama nago gasa bidi dabe dali dwagi yai homu eyu godolo yao, te nago naga digi naga dwagi yai homu eyu godolo ebo tiwai kolesaga te gasa bidi dabe dali me tama naga tiao,” wali. * Sai 20:12; Prs 19:18; Bom 5:16
20 Te gesi bidigo agabolo te po wai, “Te tigidali bomai po eno wali pela silai dao. Eno magi sę me deli yabo te habuge elalubowe?”
21 Tama Jisasgo agabolo te po wali, “Te nage doloba pai mu pedalabo homu ebaso da, teda nage pelama, nago doado bage tigidali te bidi dabego abelemainogo munama, tama nago te sali mone te magi nai meni yai we bidi augwalibolo te mone mao. Teda nago nosali sabo wiegi yai nai hauwa mu te Godigo bidibo madide sisi ilai elaluaibao. Tama tilama, nage ena wali asao,” Jisasgo te po wai. 22 Te gesi bidigo te po wali odolama, tama aga homu sęgę mu yali, tama aga beba ma pai. Magi basowe, te agai doado bage hauwa mu elaluai.
23 Tama Jisasgo aga wali pabo bidi dabebolo te po wai, “Eno mu po dagebolo obe dao, te mone hauwa munalubo bidi aga te Godigo we bidi tonalubo kolesaga te tomoba painogo te sinabo sę mu yaibao. 24 Eno dagebolo te po ma obe dao, te moni kibu kamel te ugwa hobolo medabu dedage tomoba painogo te sinabo sę yaibawe? Awe, tiali goli te mone hauwa elalubo bidi te Godigo we bidi tonalubo kolesaga tomoba painogo sinabo sę genuai mu yaibao,” te po wai.
25 Te aga wali bilibo bidi dabe augwaligo te po wabo odama, augwali te pode noma mu sali. Tama augwaligo te po wai, “Tama te tiwai ebaso da, teda de Godigo aga ma selama, tama aga te bugagia sesemane sogo bidada pogowe?”
26 Tama Jisasgo augwali dolo mu ponama tonalu, tama te po augwalibolo wali, “Te e tǫde bidi dabe augwaligo te sę ebo te usu me egobeo. Tiali goli God da, te tigidali sę ebo usu yaibao,” wali.
27 Jisas agai te po olama, tama Pitago agabolo po wei ponoyu, te po wai, “Da suao, te dago tigidali nai dabe tagalama, nage wali asobao. Te dago magi nai saibawe?”
28 Tama Jisasgo augwali dali te po wali, “Eno mu po dagebolo obao, te tigidali nai gesi noma ma pedalobo sogo, te Godigo Bidi Mu aga genuai nogi me bomo dali te sogo te tuni bidi duabo sia saide dulaluyu, te sogo te dage, dage ena wali asali bidi dabe me, dage tuni bidi dabe bidiyu, tama te 12 wali te duabo sia saide dualama, tama te 12 te Israel hani augwali tonalubo sę yagameo. 29 Tama tigidali we bidigo eno nogiba homu tia sagaselama, tama augwaligo augwa be dabe me, augwa ama dede me, abe dede me, te augwa ida aya me, augwa wai puluba me, gi dabe me tagalama, tama ena wali asali we bidi da, te augwaligo te tagalali nai wei genuai mu ma saibao. Augwaligo nosali sabo naigo te polobadu tagalali nai edelaibao. Tama te sesemane sogo bugagia bidada pabo wiegi yai ula me saibao.
30 Tiali goli, te megi polasa pali bidi dabe hauwa augwali nosali badu ma igisulama, te nosali badu asali we bidi dabe hauwa te pologi soaibao,” Jisasgo te po wai.