Dwagi Yai Gesi Po Matyugo Asęani
Hasia nedebo tau sabo po
Te bidi Matyu aga te Juda hani bidi bidai, tama agai homugo te Juda we bidi augwaligo agai asęani po nedama tama augwaligo hania koneaibao, Jisas da te Godigo te we bidi tau somainu sa muani bidi Krais dao, te Juda dabego Mesaia bidi mu dao. Tama Matyugo homugo me te Juda dabego e me konea somainu yali, Jisas da te moni genuai Tuni Bidi dao. Te Juda bage mebago Jisasde dwagi yai homu eyu aga sali goli, te augwali hauwa umabo bidi augwaligo aga me sabeo. Matyugo dabolo hania ola mobao, te Jisas agai te Godigo te we bidi tonalubo kolesaga tede po hauwa ola mani.
Matyugo asęani gesi dwagi yai po te buk dabe me si me si elalubo te buku me deli wali e buku da te buku dabego te Jisas e tǫde bidibadi pedelali sę dabede po pusalio. E bukude te wegi Mariago Jisas ame nani sogo yali sę po pusali, te po pususu pali, te Jisas augwaligo elama, tama te gų pagede ma hodaluali sogoba te po usu nigi palio, tama aga hani dabe tagalama, tama aga dagaluba holai dao.
Te genuai sę me deli te Matyugo ola maiabo homu yali, te e tiwai sę, Jisasde yali sęgo te Godigo polobadu po dąų weyu, te po asęani buku dabe nogi Olpela Testamen ma Polobadu Kontrak dabede wali po dabeba mu usu nani. Godigo bomo yai po dąų weyu, te bidi me deli tagala palama, te Israel dabe ma saibao po wali, tama e bukude te ola mayu, te Jisas te bidi tama dao po walio. Te buk Matyu hauwa pedai tomode te pogo ola mayu, te Jisasgo yali sę e tiwai da po ola mani, te po dabe augwaligo te Godigo po pusali bidi profet dabego polobadu pusali po dabeba mu usu nai dao. * Te Dąį 1:22-23; 2:4-6; 2:14-15; 2:23; 4:13-16; 8:16-17; 12:15-21; 13:34-35; 21:2-5; 21:16; 26:24; 26:31; 26:54; 27:6-10, te tama dąį dabede te tiwai po elalubo suao.
Te gasa genuai sę mede te buku Matyugo te po wai, te dagalu tomode elalubo genuai bomo ma te Godigo genuai bomo elalubo te tama po wali. Te Jisasgo yali sęde naga God te tigidali we bidi dabego king mu pedelabo homu elalubao, tama agai homugo tigidali we bidigo agai homu kolesaga naga wali mu pomainogo homu ebo dao. Te buku Matyu pedai a nagade te Jisasgo pusali bobage po dabe a naga elalubao. Hasia pusali po te Dąį 5-7 tede elalubao, tama Jisas te bulu du me deli daide bidu pusali po dabe te elalubao. Tede wali pogo te God aga we bidi hani dabe mu bidibo we bidi dabego yabo kolesaga po ola mawai. Te si wali bobage po te Dąį 10de elalubao. Te wali po te Jisas aga wali bilali sę bidi dabeba mani po da, te augwali pelama, te gasa we bidi hani dabeba te Jisasgo po pusigi pabo side yabo sę dabede po olama wali po dao.
Te sela wali bobage pogo te po wali, te Dąį 13de te tiwai po wali, Jisasgo te God agai genuai bomo tomode elalubo kolesagade po begelama, te we bidi dabe augwaliba ola mabo po pusai. Te me si me si wabo bobage po, te Dąį 18de te po elalubao. Jisasgo te aga wali mu pelama bidibo we bidi dabego ebo kolesagade po pusali. Te a naga wabo bobage po, te Dąį 24-25 tede elalubao. Jisasgo te tama wali, te e tǫ me dagalu te silabo side yabo sę dabe po wali. Te e bukude digi weyu te mena bidi mugo te e buku asęani po wali te me elalubao. Tiali goli e bukugo nogi te tiwai sali, Matyugo asęani gesi dwagi yai po dao. Augwaligo homugo e Matyu homude koneani, aga te takis mone sabo sę ebo bidi bidali, te Dąį 9:9-13 tede te po elalubo suao.
1
Jisas Kraisgo nǫų wąį hani dabe augwaligo nogi
(Luk 3:23-28)
1 E te Jisas Kraisgo nǫų wąį hanigo nogi nedada pabo po e dao. Jisas aga te Devitgo hani, tama Devit aga te Abrahamgo bidi hani dao.
2 Te Abraham aga ogwa Aisak. Tama Aisak aga ogwa Jekop. Tama Jekop aga ogwa Juda te aga ama dede dali dao. 3 Juda aga ogwa Peres me Sera te si da. Te augwa si ida Tamar dao. Tama Peres aga ogwa Hesron. Tama Hesron aga ogwa Ram. 4 Tama Ramgo ogwa Aminadap. Tama Aminadapgo ogwa Nason. Tama Nasongo ogwa Salmon. 5 Tama Salmongo ogwa Boas, tama Boas aga ida te aga Rahap. Tama Boasgo ogwa Obet, tama Obet aga ida te Rut. 6 Tama Obetgo ogwa Jesi. Tama Jesi aga ogwa te tuni bidi Devit dao.
Tama Devitgo ogwa Solomon, te Solomon aga ida te polobadu te bidi Uriago we dao. 7 Tama Solomon aga ogwa Rehoboam. Tama Rehoboam aga ogwa Abiya. Tama Abiya aga ogwa Asa. 8 Tama Asa aga ogwa Jehosafat. Tama Jehosafat aga ogwa Joram. Tama Joram aga ogwa Usia. 9 Tama Usia aga ogwa Jotam. Tama Jotam aga ogwa Ahas. Tama Ahas aga ogwa Hesekia. 10 Tama Hesekia aga ogwa Manase. Tama Manase aga ogwa Amos. Tama Amos aga ogwa Josaia. 11 Tama Josaia aga ogwa Jekonia te aga ama dede dali dao. Te sogo, te augwali bidibadi, te boi bidi dabe augwaligo te Israel dabe aiyaba elaluama, tama augwali te Babilon buluba kalabus sę emainogo sela pali. * 2 Kin 24:14-15; 2 Sto 36:10; Jer 27:20
12 Te augwali Babilon buluba kalabus egi pai, tialima Jekonia aga ogwa Sealtiel. Tama Sealtiel aga ogwa Serubabel. 13 Tama Serubabel aga ogwa Abiut. Tama Abiut aga ogwa Eliakim. Tama Eliakim aga ogwa Asor. 14 Tama Asor aga ogwa Sadok. Tama Sadok aga ogwa Akim. Tama Akim aga ogwa Eliut. 15 Tama Eliut aga ogwa Elesar. Tama Elesar aga ogwa Matan. Tama Matan aga ogwa Jekop. 16 Tama Jekop aga ogwa Josep. Tama Josep te we Maria aga bidi dao. Tama Mariago Jisas ame nai, augwaligo aga nogi te Krais da wabo dao. Te aga sa muyu asaiba wali bidi dao.
17 Tama te tiwai nedada pelama, tama Abrahamgo hani tigidalide gagalasa aselama Devitgo haniba sabolali, te nogo si olama sągą badu me si me si hani dao. Tama tigidali Devitgo hanide gagalama asali augwali te Babilon buluba kalabus egi pali sogo, te me te nogo si olama sągągo me si me si hani dao. Tama augwali Babilonba kalabus egi pali sogo, te Godigo sa muani bidi Krais pedalabo sogo me, te hani tigidali me te nogo si olama sągągo me si me si hani bidi dao.
Mariago Jisas Krais ame nani
(Luk 2:1-7)
18 Te Jisas Krais aga ame nani po, e tiwai dao. Aga ida Maria augwaligo Josepbolo noma po wai. Tiali goli augwali si taluama bidisiąbadi digi, tama Mariago suali aga te Godigo Tedali Mobo Bidigo sę yalima haliga yai elaluai. 19 Maria aga bidi Josep, aga te doloba pai bidi da, tama agai Maria haliga elalubo po odobaso, tama agai Mariabolo hale mabo hagela homu yai. Tama agai dua digi naga tama aga tagalai homu yai. 20 Tama Josepgo te homu idubadi, tama nade Genuai Bidigo ensel mobo bidi me deli agaba pedelai. Ensel bidigo te po wali, “Josep, Devitgo ogwa, nago naga we Maria sabo wi egio. Odao. Te wai aga haligade sali, te Godigo Tedali Mobo Bidigo aga mawai dao. 21 Te agai te wai ogwa ame naibao, tama nago aga nogi Jisas poao. Magi baso meni, agai te we bidi augwaligo sęgę elalubo sela sąnama tama augwali ma saibao,” te po wali.
22 Te tigidali pedelali sę te tiwai te po me deli te Genuai Bidigo te agai po pusubo profet bidigo pedauwalidu wali po usu nanio. Te po pusubo profet bidigo te polobadu mu pusai po e tiwai wai,
23 “Odao, wegi me deli te bidi dali me pisąwai, te
wegi aga haliga elama, te wai ogwa ame naibao.
Tama augwaligo te wai nogi Emanuel nogi yaibao,”
te po wai.
Tama te nogi page e tiwai dao, God aga da dali bidibao. * Ais 7:14
24 Te Josep godege pilama hodaluama, tama agai te Genuai Bidigo ensel mobo bidigo aga dali wali po gilama te tiwai sę yai. Agai aga we sai. 25 Tiali goli te wai ame nisiąbadi agai aga te we dali me pibe, tama aga te wego wai ogwa ame nabo te sogo pedelai. Tama agai te wai aga nogi Jisas poai.
*^ Te Dąį 1:22-23; 2:4-6; 2:14-15; 2:23; 4:13-16; 8:16-17; 12:15-21; 13:34-35; 21:2-5; 21:16; 26:24; 26:31; 26:54; 27:6-10, te tama dąį dabede te tiwai po elalubo suao.
*1:11: 2 Kin 24:14-15; 2 Sto 36:10; Jer 27:20